Impact player ನಿಯಮದಿಂದ ಬೌಲರ್‌ಗಳಿಗೆ ಹೊಡೆತ: ಶಾಬಾಜ್‌

ಹೊಸದಿಲ್ಲಿ: ಇಂಪ್ಯಾಕ್ಟ್ ಪ್ಲೇಯರ್‌ ನಿಯಮದ ವಿರುದ್ಧ ಅನೇಕರು ಧ್ವನಿ ಎತ್ತಿದ್ದಾರೆ. ಇದೀಗ ಆಲ್‌ರೌಂಡರ್‌ ಶಾಬಾಜ್‌ ಅಹ್ಮದ್‌ ಸರದಿ. ಇದರಿಂದ ಆಲ್‌ರೌಂಡರ್‌ಗಳಿಗೆ ಹೋಲಿಸಿದರೆ ಬೌಲರ್‌ಗಳಿಗೆ ಅಧಿಕ ಹೊಡೆತ ಎಂಬುದಾಗಿ ಶಾಬಾಜ್‌ ಹೇಳಿದ್ದಾರೆ.

“ಐಪಿಎಲ್‌ ತಂಡದಲ್ಲೀಗ 8 ಬ್ಯಾಟರ್ ಹಾಗೂ ಓರ್ವ ಆಲ್‌ರೌಂಡರ್‌ ಇದ್ದಾರೆ. ಆದರೂ ಮೊದಲ ಹೊಡೆತದಿಂದಲೇ ಮುನ್ನುಗ್ಗಿ ಬಾರಿಸುವ ಆಟಗಾರನನ್ನು ಬಯಸುತ್ತದೆ. ಕೊನೆಯ ತನಕ ರನ್‌ ಗತಿಯನ್ನು ಕಾಯ್ದುಕೊಳ್ಳುವುದು ಇದರ ಉದ್ದೇಶ. ಇಂಪ್ಯಾಕ್ಟ್ ಪ್ಲೇಯರ್‌ ನಿಯಮದ ಮೂಲಕ ಇಂಥ ಬ್ಯಾಟರ್‌ಗಳಿಗೇ ಆಯ್ಕೆಯ ಆದ್ಯತೆ ಲಭಿಸುತ್ತಿದೆ. ಇದರಿಂದ ಆಲ್‌ರೌಂಡರ್‌ಗಳಿಗೂ ಮಿಗಿಲಾಗಿ ಬೌಲರ್‌ಗಳಿಗೆ ಹೆಚ್ಚು ಹೊಡೆತ ಬೀಳುತ್ತಿದೆ’ ಎಂದು ಶಾಬಾಜ್‌ ಹೇಳಿದರು.

ಹೈದರಾಬಾದ್‌ನ ಎಡಗೈ ಸ್ಪಿನ್ನರ್‌ ಆಗಿರುವ ಶಾಬಾಜ್‌ ಅಹ್ಮದ್‌ ಈ ಸೀಸನ್‌ನಲ್ಲಿ 12 ಪಂದ್ಯಗಳನ್ನಾಡಿದ್ದು, 186 ರನ್‌ ಗಳಿಸಿದ್ದಾರೆ. ಆದರೆ ಅವರ ಸ್ಪಿನ್‌ ಎಸೆತಗಳಿಗೆ ಸೂಕ್ತ ಬೆಲೆ ಸಿಗಲಿಲ್ಲ. ಉರುಳಿಸಿದ್ದು 3 ವಿಕೆಟ್‌ ಮಾತ್ರ.