ರೈಲು ಹಳಿ ವಿಚಕ್ಷಣೆಗೆ ಐಐಟಿ ರೂರ್ಕಿಯಿಂದ ಡ್ರೋನ್‌ ತಂತ್ರಜ್ಞಾನ

ಹೊಸದಿಲ್ಲಿ : ಹಳಿ ತಪ್ಪುವಂತಹ ರೈಲು ಅಪಘಾತಗಳು ಸಂಭವಿಸದಂತೆ ಮುನ್ನೆಚ್ಚರಿಕೆ ವಹಿಸಲು ಭಾರತೀಯ ರೈಲ್ವೇ ಶೀಘ್ರವೇ ಡ್ರೋನ್‌ ಗಳನ್ನು ಹಳಿ ವಿಚಕ್ಷಣೆಗಾಗಿ ಬಳಸಲಿದೆ. 

ಈ ನಿಟ್ಟಿನಲ್ಲಿ ರೈಲ್ವೆ ಮತ್ತು ಟೆಲಿಕಾಂ ರಂಗ ಕೈಜೋಡಿಸಿವೆ. ರೂರ್ಕಿ ಯಲ್ಲಿನ ಇಂಡಿಯನ್‌ ಇನ್‌ಸ್ಟಿಟ್ಯೂಟ್‌ ಆಫ್ ಟೆಕ್ನಾಲಜಿ, ರೈಲು ಅಪಘಾತಗಳನ್ನು ತಪ್ಪಿಸಲು ಅನುಕೂಲಿಸುವ ವಿಶೇಷ ವಿನ್ಯಾಸದ ಡ್ರೋನ್‌ ಸಿದ್ಧಪಡಿಸಿದೆ.

ಈ ಡ್ರೋನ್‌ ಸದ್ಯಕ್ಕೆ ಉತ್ತರಾಖಂಡ ಪಟ್ಟಣದ ಸುತ್ತಮುತ್ತಲಿನ ಪ್ರದೇಶಗಳಲ್ಲಿರುವ ರೈಲು ಹಳಿಗಳ ವಿಚಕ್ಷಣೆಗಾಗಿ ಪರೀಕ್ಷಾ ನೆಲೆಯಲ್ಲಿ ಬಳಸಲಾಗುತ್ತಿದೆ ಎಂದು ಮೂಲಗಳು ತಿಳಿಸಿವೆ. 

ಐಐಟಿ ರೂರ್ಕಿ ವಿನ್ಯಾಸಗೊಳಿಸಿ ಅಭಿವೃದ್ಧಿಪಡಿಸಿರುವ ಡ್ರೋನ್‌ ತಂತ್ರಜ್ಞಾನವನ್ನು ಬಳಸಿಕೊಂಡು ರೈಲ್ವೇ ಹಳಿಗಳ ಮೇಲೆ ಕಣ್ಣಿಡುವ ಪ್ರಾಯೋಗಿಕ ಯೋಜನೆ ಈಗ ಸಾಗಿದೆ. ಅಂತಹ ಒಂದು ಪ್ರಯತ್ನ ಈಗ ಬಹುತೇಕ ಮುಂದುವರಿದ ಹಂತದಲ್ಲಿದೆ ಎಂದು ಟಿಸಿಓಇ ಇಂಡಿಯಾ ಉಪ ನಿರ್ದೇಶಕ ಅನುರಾಗ್‌ ವಿಭೂತಿ ಇಂದಿಲ್ಲಿ ಹೇಳಿದರು.