ರಾಮನಗರ: ಕಣ್ವ ಜಲಾಶಯ ಹಿನ್ನೀರಿನಲ್ಲಿ ಮುಳುಗಡೆಯದ ಭೂಮಿಯ ಬದಲಿಗೆ ತಮಗೆ ನೀಡಿರುವ ಭೂಮಿಯ ಹಕ್ಕುಪತ್ರಗಳಿಗೆ ಖಾತೆ ಮತ್ತು ಪೌತಿ ಖಾತೆ ಮಾಡಿಕೊಡುವಂತೆ ಒತ್ತಾಯಿಸಿ ನಿರಾಶ್ರಿತ ರೈತರು ನಗರದಲ್ಲಿ ಪ್ರತಿಭಟನೆ ನಡೆಸಿದರು. ಅಲ್ಲದೆ, ತಮ್ಮ ಬೇಡಿಕೆ ಈಡೇರಿಸದಿದ್ದರೆ ಲೋಕಸಭೆ ಚುನಾವಣೆಯನ್ನು ಸಾಮೂಹಿಕವಾಗಿ ಬಹಿಷ್ಕರಿಸಲಾಗುವುದು ಎಂದು ಎಚ್ಚರಿಕೆ ನೀಡಿದರು.
ಕರ್ನಾಟಕ ರೈತ ಸಂಘ ಮತ್ತು ಹಸಿರು ಸೇನೆ ಹಾಗೂ ದೊಡ್ಡಮಣ್ಣುಗುಡ್ಡೆ ರೈತರ ಹಿತರಕ್ಷಣಾ ಸಮಿತಿ ನೇತೃತ್ವದಲ್ಲಿ ಜಯಪುರ, ವಿಜಯಪುರ, ಕನ್ನಮಂಗಲದೊಡ್ಡಿ, ದೊಡ್ಡಮಣ್ಣು ಗುಡ್ಡೆದೊಡ್ಡಿ, ರಾಜೀವ್‌ ಗಾಂಧಿಪುರ ಗ್ರಾಮಗಳ ನೂರಾರು ನಿರಾಶ್ರಿತ ರೈತರು ಪ್ರತಿಭಟೆಯಲ್ಲಿ ಪಾಲ್ಗೊಂಡಿದ್ದರು.
ರಾಷ್ಟ್ರೀಯ ಹೆದ್ದಾರಿ ತಡೆ: ನಗರದ ಮಿನಿ ವಿಧಾನಸೌಧದಿಂದ ಮೆರವಣಿಗೆ ಹೊರಟು ಐಜೂರು ವೃತ್ತದಲ್ಲಿ ಕೆಲಹೊತ್ತು ಬೆಂಗಳೂರು-ಮೈಸೂರು ರಾಷ್ಟ್ರೀಯ ಹೆದ್ದಾರಿಯಲ್ಲಿ ರಸ್ತೆ ತಡೆ ನಡೆಸಿದರು. ನಂತರ ಮೆರವಣಿಗೆ ನಡೆಸಿ ಜಿಲ್ಲಾ ಕಚೇರಿಗಳ ಸಂಕಿರ್ಣದ ತಲುಪಿ ಅಲ್ಲಿ ಕೆಲಹೊತ್ತು ಧರಣಿ ನಡೆಸಿದರು.
ಸಾಗುವಳಿ ಪತ್ರ ನೀಡಲು ಆಗ್ರಹ: ಕಣ್ವ ಜಲಾಶಯದ ಹಿನ್ನೀರಿಲ್ಲಿ ತಮ್ಮ ಅನುಭವದಲ್ಲಿದ್ದ ಭೂಮಿ ಮುಳುಗಿದೆ. ಇದಕ್ಕೆ ಪರ್ಯಾಯವಾಗಿ ನೀಡಿರುವ ಭೂಮಿಯ ಹಕ್ಕನ್ನು ಪಹಣಿಯಲ್ಲಿ ದಾಖಲಿಸಬೇಕು. ಭೂಮಿಯಲ್ಲಿ ಅನುಭವದಲ್ಲಿ ಇರುವವರಿಗೆ ಸಾಗುವಳಿ ಪತ್ರ ನೀಡಬೇಕು ಎಂದು ಪ್ರತಿಭಟನಾಕಾರರು ಒತ್ತಾಯಿಸಿದರು.
ಕಣ್ವ ಜಲಾಶಯ ನಿರ್ಮಾಣ ಮಾಡುವ ಸಂದರ್ಭದಲ್ಲಿ ಮುಳುಗಡೆಯಾದ ಭೂಮಿಗೆ 1948ರಲ್ಲಿ ದೊಡ್ಡಮಣ್ಣುಗುಡ್ಡೆ ಸರ್ವೆ ನಂಬರ್‌ 1ರಲ್ಲಿ ಸುಮಾರು 500 ಎಕರೆ ಭೂಮಿಯನ್ನು ಮಂಜೂರು ಮಾಡಿದೆ. ಅದರಲ್ಲಿ 100 ಎಕರೆ ಭೂಮಿಯನ್ನು ಸೈನಿಕರಿಗೆ ಮೀಸಲಿರಿಸಿದೆ. ಉಳಿದ 400 ಎಕರೆ ಭೂಮಿಯನ್ನು ತಮಗೆ ಹಂಚಲಾಗಿದೆ. ಆದರೆ ತಮಗೆ ತಮ್ಮ ಭೂಮಿಯ ಒಡೆತನ ಅಥವಾ ಮಾಲೀಕತ್ವವೇ ಇಲ್ಲದಾಗಿದ್ದು, ಜೀವನ ಡೋಲಾಯಮಾನವಾಗಿದೆ ಎಂದು ರೈತರು ಅಳಲು ತೋಡಿಕೊಂಡರು.
ಚುನಾವಣೆ ಬಹಿಷ್ಕಾರದ ಎಚ್ಚರಿಕೆ: ತಮ್ಮ ಬೇಡಿಕೆಗಳನ್ನು ಈಡೇರಿಸುವಂತೆ ನಿರಂತರವಾಗಿ ಒತ್ತಾಯಿಸುತ್ತಿದ್ದರು ಜಿಲ್ಲಾಡಳಿತವಾಗಲಿ, ಚುನಾಯಿತ ಪ್ರತಿನಿಧಿಗಳಾಗಲಿ ಸ್ಪಂದಿಸುತ್ತಿಲ್ಲ. ತಮ್ಮ ಬೇಡಿಕೆ ಈಗಲೂ ಈಡೇರದಿದ್ದರೆ, ಎದುರಾಗುತ್ತಿರುವ 2019ರ ಲೋಕಸಭಾ ಚುನಾವಣೆಯನ್ನು ಸಾಮೂಹಿಕವಾಗಿ ಬಹಿಷ್ಕರಿಸುವ ಎಚ್ಚರಿಕೆ ನೀಡಿದರು.
ಜಮೀನಿನ ಗೊಂದಲ ಬಗೆಹರಿಸಿ: ರೈತರಲ್ಲಿರುವ ದಾಖಲಾತಿ ಪಡೆದು ಕಂಪ್ಯೂಟರ್‌ ಪಹಣಿಯಲ್ಲಿ ಹಕ್ಕುಗಳನ್ನು ದಾಖಲಿಸಬೇಕು. ಭೂಮಿಯಲ್ಲಿ ಅನುಭವದಲ್ಲಿರುವವರಿಗೆ ಸಾಗುವಳಿ ಪತ್ರ ನೀಡಬೇಕು. ಇದಲ್ಲದೆ, ರಾಷ್ಟ್ರೀಯ ಹೆದ್ದಾರಿಗೆ ಜಮೀನು ಕಳೆದುಕೊಳ್ಳುತ್ತಿರುವ ರೈತರಿಗೆ ಪರಿಹಾರ ಸಿಗಲು ರೈತನ ಜಮೀನಿನ ಗೊಂದಲ ಬಗೆಹರಿಸಬೇಕು ಎಂದು ಒತ್ತಾಯಿಸಿದರು.
ಪ್ರತಿಭಟನೆಯಲ್ಲಿ ಕರ್ನಾಟಕ ರೈತಸಂಘ ಮತ್ತು ಹಸಿರು ಸೇನೆ ರಾಜ್ಯಾಧ್ಯಕ್ಷ ತುಂಬೇನಹಳ್ಳಿ ಶಿವಕುಮಾರ್‌, ನಿರಾಶ್ರಿತ ಗ್ರಾಮದ ಪ್ರಮುಖರಾದ ನವೀನ್‌, ಗೌರಮ್ಮ, ಚನ್ನೇಗೌಡ ಮುಂತಾದವರಿದ್ದರು.
