ಹುಬ್ಬಳ್ಳಿ: ದೇಶದಲ್ಲಿನ ಬಡತನ ನಿರ್ಮೂಲನೆಗೆ ದಿಟ್ಟ ಹೆಜ್ಜೆ ಇಟ್ಟಿರುವ ಕಾಂಗ್ರೆಸ್‌ ಪಕ್ಷ ಅಧಿಕಾರಕ್ಕೆ ಬಂದರೆ ಕನಿಷ್ಠ ಆರ್ಥಿಕ ಭದ್ರತೆ ಯೋಜನೆಯಡಿ ದೇಶದ ಪ್ರತಿ ಬಡ ಕುಟುಂಬಕ್ಕೆ ಮಾಸಿಕ 6 ಸಾವಿರ ರೂ.ನಂತೆ ನೀಡಲಾಗುವುದು ಎಂದು ಲೀಡ್ಕರ್‌ ಅಧ್ಯಕ್ಷ ಹಾಗೂ ಶಾಸಕ ಪ್ರಸಾದ ಅಬ್ಬಯ್ಯ ಹೇಳಿದರು.
ಧಾರವಾಡ ಲೋಕಸಭಾ ಕ್ಷೇತ್ರದ ಕಾಂಗ್ರೆಸ್‌ -ಜೆಡಿಎಸ್‌ ಮೈತ್ರಿ ಪಕ್ಷದ ಅಭ್ಯರ್ಥಿ ವಿನಯ ಕುಲಕರ್ಣಿ ಪರ ಬುಧವಾರ ಹು-ಧಾ ಮಹಾನಗರ ವಾರ್ಡ್‌ 50 ರ ಮಂಟೂರು ರಸ್ತೆಯ ಮಿಲ್ಲತ್‌ ನಗರ, ಅಬ್ರಾರ್‌ ಕಾಲೋನಿ, ಕಸ್ತೂರ ಬಾ ನಗರ,
ಪ್ರಿಯದರ್ಶಿನಿ ಕಾಲೋನಿ, ಕೃಪಾ ನಗರ, ಅಂಬೇಡ್ಕರ್‌ ಕಾಲೋನಿ, ಬ್ಯಾಳಿ ಪ್ಲಾಟ್‌ ಸೇರಿದಂತೆ ಇನ್ನಿತರ ಪ್ರದೇಶಗಳಿಗೆ ಮನೆ ಮನೆಗೆ ತೆರಳಿ ಪ್ರಚಾರ ನಡೆಸಿ ಅವರು ಮಾತನಾಡಿದರು.
ಬಡವರಿಗೆ ಎಲ್ಲ ರಂಗದಲ್ಲೂ ಸೂಕ್ತ ನ್ಯಾಯ ಒದಗಿಸಲು ಕಾಂಗ್ರೆಸ್‌ ಪಕ್ಷ ಅಧಿಕಾರಕ್ಕೆ ಬರಬೇಕಿದ್ದು, ಧಾರವಾಡ ಲೋಕಸಭಾ ಕ್ಷೇತ್ರದ ಮೈತ್ರಿ ಪಕ್ಷದ ಅಭ್ಯರ್ಥಿ ವಿನಯ ಕುಲಕರ್ಣಿ ಅವರನ್ನು ಹೆಚ್ಚು ಮತಗಳಿಂದ ಆಯ್ಕೆ ಮಾಡುವಂತೆ ಮನವಿ ಮಾಡಿದರು. ಕಾಂಗ್ರೆಸ್‌ ಮುಖಂಡರಾದ ಮೆಹಮೂದ ಕೋಳೂರು, ಶರೀಫ್‌ ಅದವಾನಿ, ಬಾಷಾ ಬೇಪಾರಿ, ಇನಾಯತ್‌ ಖಾನ್‌ ಪಠಾಣ, ರಶೀದ ಶೇಖ್‌, ಸೈಯದ್‌ ಸಲೀಂ, ರಾಜಾರಾವ್‌, ಕಾರ್ತಿಕ್‌ ಇನ್ನಿತರರಿದ್ದರು.