ICC T20 Rankings : ಭಾರತ, ಸೂರ್ಯಕುಮಾರ್‌ ನಂ.1

ದುಬೈ: ಐಸಿಸಿ ನೂತನ ಟಿ20 ರ್‍ಯಾಂಕಿಂಗ್‌ ಪ್ರಕಟಗೊಂಡಿದ್ದು, ಇದರಲ್ಲಿ ಭಾರತ ತಂಡ ನಂ.1 ಸ್ಥಾನದಲ್ಲೇ ಮುಂದುವರಿದಿದೆ. ಪುರುಷರ ಬ್ಯಾಟಿಂಗ್‌ ರ್‍ಯಾಂಕಿಂಗ್‌ನಲ್ಲಿ ಸೂರ್ಯಕುಮಾರ್‌ ಯಾದವ್‌ ಕೂಡ ಅಗ್ರ ಸ್ಥಾನದಲ್ಲೇ ಮುಂದುವರೆದಿದ್ದಾರೆ. ಆದರೆ ಆಲ್‌ರೌಂಡರ್‌ಗಳಲ್ಲಿ ಹಾರ್ದಿಕ್‌ ಪಾಂಡ್ಯ 7ನೇ ಸ್ಥಾನದಲ್ಲಿ ಕಾಣಿಸಿಕೊಂಡಿದ್ದಾರೆ.

ಟಿ20 ರ್‍ಯಾಂಕಿಂಗ್‌ನಲ್ಲಿ ಭಾರತ 264 ಅಂಕಗಳೊಂದಿದೆ, ನಂ.1 ಸ್ಥಾನದಲ್ಲಿ ಮುಂದುವರಿದಿದ್ದರೆ, ಆಸ್ಟ್ರೇಲಿಯ (257), ಇಂಗ್ಲೆಂಡ್‌ (252) ಅನಂತರದ ಸ್ಥಾನಗಳಲ್ಲಿವೆ. ಬ್ಯಾಟರ್‌ಗಳಲ್ಲಿ ಸೂರ್ಯಕುಮಾರ್‌ (861) ಮೊದಲ ಸ್ಥಾನದಲ್ಲಿದ್ದರೆ, ಇಂಗ್ಲೆಂಡಿನ ಫಿಲ್‌ ಸಾಲ್ಟ್ ದ್ವಿತೀಯ (802),  ಪಾಕಿಸ್ಥಾನದ ಮೊಹಮ್ಮದ್‌ ರಿಜ್ವಾನ್‌ (781) ಕೆಳಗಿನ ಸ್ಥಾನಗಳಲ್ಲಿದ್ದಾರೆ.

ಆಲ್‌ ರೌಂಡರ್‌ಗಳಲ್ಲಿ ಶ್ರೀಲಂಕಾದ ವನಿಂದು ಹಸರಂಗ ಮತ್ತು ಬಾಂಗ್ಲಾದೇಶದ ಶಕೀಬ್‌ ಅಲ್‌ ಹಸನ್‌ ತಲಾ 228 ಅಂಕಗಳೊಂದಿಗೆ ಅಗ್ರ ಸ್ಥಾನದಲ್ಲಿದ್ದಾರೆ. ಇದರಲ್ಲಿ ಹಾರ್ದಿಕ್‌ 7ನೇ ಸ್ಥಾನದಲ್ಲಿದ್ದಾರೆ. ಇನ್ನು ಬೌಲರ್‌ಗಳಲ್ಲಿ ಇಂಗ್ಲೆಂಡಿನ ಸ್ಪಿನ್ನರ್‌ ಅದಿಲ್‌ ರಶೀದ್‌ (726), ಹಸರಂಗ (687), ವೆಸ್ಟ್‌ಇಂಡೀಸ್‌ನ ಅಖಿಲ್‌ ಹೊಸೈನ್‌ (664) ಅಗ್ರ ಮೂರರಲ್ಲಿ ಕಾಣಿಸಿಕೊಂಡಿದ್ದಾರೆ.ಮತ್ತು ಶ್ರೀಲಂಕಾದ ಮತೀಶ ತೀಕ್ಷಣ (659) ಐದನೇ ಸ್ಥಾನದಲ್ಲಿದ್ದಾರೆ.