“ಆತ್ಮನಿರ್ಭರ’ದಡಿ 114 ಫೈಟರ್‌ ಜೆಟ್‌ ತಯಾರಿಕೆ

ಹೊಸದಿಲ್ಲಿ: ಯುದ್ಧ ಸಾಮಗ್ರಿಗಳ ತಯಾರಿಕೆಯಲ್ಲಿ ಆತ್ಮನಿರ್ಭರತೆ ಸಾಧಿಸುವ ಗುರಿಯನ್ನು ಹೊಂದಿರುವ ಕೇಂದ್ರ ಸರಕಾರ, “ಮೇಕ್‌ ಇನ್‌ ಇಂಡಿಯಾ’ ಯೋಜನೆಯ “ಬೈ ಗ್ಲೋಬಲ್‌ ಆ್ಯಂಡ್‌ ಮೇಕ್‌ ಇನ್‌ ಇಂಡಿಯಾ’ ಪರಿಕಲ್ಪನೆಯಡಿ, 114 ಫೈಟರ್‌ ಜೆಟ್‌ ವಿಮಾನಗಳನ್ನು ಸ್ವದೇಶಿ-ವಿದೇಶಿ ಕಂಪೆನಿಗಳ ಜಂಟಿ ಸಹಭಾಗಿತ್ವದಲ್ಲಿ ತಯಾರಿಸಲು ತೀರ್ಮಾನಿಸಿದೆ.

96 ವಿಮಾನ ನಮ್ಮಲ್ಲೇ ತಯಾರು
ಮಲ್ಟಿರೋಲ್‌ ಫೈಟರ್‌ ಏರ್‌ಕ್ರಾಫ್ಟ್ (ಎಂಆರ್‌ಎಫ್ಎ) ಮಾದರಿಯ 114 ವಿಮಾನಗಳಲ್ಲಿ 96 ವಿಮಾನಗಳನ್ನು ಭಾರತದಲ್ಲಿ ಹಾಗೂ ಉಳಿದ 18 ವಿಮಾನಗಳನ್ನು ಈ ಒಪ್ಪಂದದಲ್ಲಿ ಭಾಗಿಯಾಗುವ ಕಂಪೆನಿಗಳು ತಮ್ಮ ದೇಶಗಳಲ್ಲಿ ತಯಾರಿಸಲು ಅವಕಾಶ ನೀಡಲಾಗುತ್ತದೆ.

ಮೊದಲ ಸುತ್ತಿನ ಮಾತುಕತೆ ಪೂರ್ಣ
ಈ ಕುರಿತಂತೆ ಭಾರತೀಯ ವಾಯುಪಡೆಯ ಹಿರಿಯ ಅಧಿಕಾರಿಗಳು ವಿವಿಧ ದೇಶಗಳ ಫೈಟರ್‌ ಜೆಟ್‌ ತಯಾರಿಕ ಕಂಪೆನಿಗಳ ಪ್ರತಿನಿಧಿಗಳ ಜತೆಗೆ ಒಂದು ಸುತ್ತಿನ ಮಾತುಕತೆ ನಡೆಸಿದ್ದಾರೆ.

ಆ ವೇಳೆ, ಭಾರತವು ಯುದ್ಧ ಸಲಕರಣೆಗಳ ತಯಾರಿಕೆಯಲ್ಲಿ ಆತ್ಮನಿರ್ಭರತೆ ಸಾಧಿಸುವ ಗುರಿಯನ್ನು ಹೊಂದಿರುವ ವಿಚಾರವನ್ನು ಕಂಪೆನಿಗಳ ಪ್ರತಿನಿಧಿಗಳಿಗೆ ಮನವರಿಕೆ ಮಾಡಿಕೊಟ್ಟಿದ್ದಾರೆ ಎನ್ನಲಾಗಿದೆ.