ಲಂಡನ್‌: ನಗರದ ಸೂಪರ್‌ ಮಾರ್ಕೆಟ್‌ವೊಂದರಲ್ಲಿ ಉದ್ಯೋಗಿಯಾಗಿದ್ದ ಹೈದ್ರಾಬಾದ್‌ ಮೂಲದ ವ್ಯಕ್ತಿಯೊಬ್ಬನನ್ನು ಇರಿದು ಬರ್ಬರವಾಗಿ ಹತ್ಯೆಗೈದಿರುವ ಘಟನೆ ಗುರುವಾರ ನಡೆದಿದೆ.
ಮೊಹಮದ್‌ ನದೀಮುದ್ದೀನ್‌ ಹತ್ಯೆಗೀಡಾಗಿದ್ದು, ಟೆಸ್ಕೋ ಸೂಪರ್‌ ಮಾರ್ಕೆಟ್‌ನ ಮಾಲ್‌ವೊಂದರಲ್ಲಿ 6 ವರ್ಷಗಳಿಂದ ಕೆಲಸ ಮಾಡುತ್ತಿದ್ದರು.
ನದೀಮುದ್ದೀನ್‌ ಅವರ ಪತ್ನಿ ವೈದ್ಯಕೀಯ ಪದವಿ ಮುಗಿಸಿ ತಿಂಗಳ ಹಿಂದಷ್ಟೇ ಲಂಡನ್‌ಗೆ ತೆರಳಿದ್ದರು ಎಂದು ತಿಳಿದು ಬಂದಿದೆ.
ಕಾರ್‌ ಪಾರ್ಕಿಂಗ್‌ ಪ್ರದೇಶದಲ್ಲಿ ನದೀಮುದ್ದಿನ್‌ ಶವವಾಗಿ ಪತ್ತೆಯಾಗಿದ್ದಾರೆ. ಪೊಲೀಸರು ಪರಿಶೀಲನೆ ನಡೆಸಿ ತನಿಖೆ ಮುಂದುವರಿಸಿದ್ದಾರೆ.
ನದೀಮುದ್ದೀನ್‌ ಕುಟುಂಬ ಸದಸ್ಯರು ವಿದೇಶಾಂಗ ಇಲಾಖೆಯನ್ನು ಸಂಪರ್ಕಿಸಿದ್ದಾರೆ. ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್‌ ಅವರನ್ನು ಸಂಪರ್ಕಿಸಿ ಲಂಡನ್‌ಗೆ ತೆರಳಲು ಅವಕಾಶ ಮಾಡಿಕೊಡುವಂತೆ ಕೇಳಿಕೊಂಡಿದ್ದಾರೆ.
ಎಲ್ಲಾ ಪ್ರಕ್ರಿಯೆಗಳು ಮುಗಿದು ನದೀಮುದ್ದೀನ್‌ ಅವರ ಶವ ಭಾರತಕ್ಕೆ ತರಲು ಹದಿನೈದು ದಿನಗಳು ಬೇಕಾಗಬಹದು ಎಂದು ತಿಳಿದು ಬಂದಿದೆ.
