ಭಡಕಲ್‌ ಅಗಸಿಗಿಲ್ಲ ರಸ್ತೆ ಸೌಲಭ್ಯ

„ಶಶಿಕಾಂತ ಕೆ.ಭಗೋಜಿ
ಹುಮನಾಬಾದ: ಎರಡು ಶತಮಾನಕ್ಕೂ ಹಳೆಯದಾದ ದುಬಲಗುಂಡಿ ಗ್ರಾಮ ಸೃಷ್ಟಿಯಾದಾಗಿನಿಂದಲೂ ಗ್ರಾಮದ ಚಂದಾ ಹುಸೇನಿ ದರ್ಗಾ-ಭಡಕಲ್‌ ಅಗಸಿಗೆ ಸಂಪರ್ಕ ಕಲ್ಪಿಸುವ ರಸ್ತೆಯನ್ನು ಅಭಿವೃದ್ಧಿ ಮಾಡದಿರುವುದರಿಂದ ಆ ಮಾರ್ಗವನ್ನೇ ಅವಲಂಬಿಸಿರುವ ನಿವಾಸಿಗಳು ಸಂಚಾರಕ್ಕೆ ನಿತ್ಯ ಯಾತನೆ ಅನುಭವಿಸುತ್ತಿದ್ದಾರೆ.

ಸುಮಾರು 15 ಸಾವಿರಕ್ಕೂ ಅ ಧಿಕ ಜನಸಂಖ್ಯೆ, ಗ್ರಾಮ ಪಂಚಾಯಿತಿ ಕೇಂದ್ರ ಸ್ಥಾನ, ಒಂದು ತಾಲೂಕು ಪಂಚಾಯಿತಿ, ಜಿಲ್ಲಾ ಪಂಚಾಯಿತಿ ಸದಸ್ಯ ಸ್ಥಾನ ಹೊಂದಿರುವ ಈ ಗ್ರಾಮ ವಿವಿಧ ಪಕ್ಷಗಳ ಗಣ್ಯಾತಿಗಣ್ಯ ವ್ಯಕ್ತಿಗಳನ್ನು ಹೊಂದಿದೆ. ಈ ಗ್ರಾಮದ ಸಮಗ್ರ ಅಭಿವೃದ್ಧಿ ದೃಷ್ಟಿಯಿಂದ 80ರ ದಶಕದಲ್ಲೇ ನಗರ ಯೋಜನಾ ಪ್ರಾ ಧಿಕಾರ ನೀಲನಕ್ಷೆ ಸಿದ್ಧಪಡಿಸಿತ್ತು. ಆದರೆ ಎಲ್ಲವೂ ಯೋಜನೆ ಪ್ರಕಾರ ಅಭಿವೃದ್ಧಿ ಹೊಂದಿದ್ದರೆ ಈ ಗ್ರಾಮವೀಗ ಇಡೀ ಮತ ಕ್ಷೇತ್ರದಲ್ಲೇ ಮಾದರಿ ಗ್ರಾಮವಾಗುತ್ತಿತ್ತು. ಹಾಗೆಂದ ಮಾತ್ರಕ್ಕೆ ಈ ಗ್ರಾಮದಲ್ಲಿ ಅಭಿವೃದ್ಧಿ ಕಾರ್ಯಗಳೇ ನಡೆದಿಲ್ಲ ಎಂದೇನಿಲ್ಲ.

2008ರಲ್ಲಿ ಬೀದರ ಜಿಲ್ಲಾ ಧಿಕಾರಿಯಾಗಿದ್ದ ಹರ್ಷ ಗುಪ್ತ ಅವರ ಅವಧಿಯಲ್ಲಿ ಎರಡು ಮೂರು ಸುತ್ತು ಗ್ರಾಮದ ಸಂಚಾರ ಕೈಗೊಂಡು ಗ್ರಾಮದ ಸರ್ವಾಂಗೀಣ ಅಭಿವೃದ್ಧಿಗೆ ಯೋಜನೆ ರೂಪಿಸಿದ್ದಲ್ಲದೇ ಮುಖ್ಯರಸ್ತೆ ಒಳಗೊಂಡಂತೆ ಇತರೆ ಜನಸಂಚಾರ ಹೊಂದಿರುವ ರಸ್ತೆಗಳನ್ನು ಅಭಿವೃದ್ಧಿಪಡಿಸಲು ಚಿಂತನೆ ನಡೆಸಲಾಗಿತ್ತು. ಆದರೂ ಕಾರಣಾಂತರದಿಂದ ನನೆಗುದಿಗೆ ಬಿದ್ದರೂ 2013-14ನೇ ಸಾಲಿನಲ್ಲಿ ಧ್ವಜ ಕಟ್ಟೆಯಿಂದ ಗ್ರಾಮದಿಂದ ಭಾಲ್ಕಿ ಮಾರ್ಗಕ್ಕೆ ಸಂಪರ್ಕ
ಕಲ್ಪಿಸುವ ರಸ್ತೆ ವರೆಗೆ ಕೋಟ್ಯಂತರ ರೂ. ವೆಚ್ಚದಲ್ಲಿ ಕ್ಷೇತ್ರದ ಶಾಸಕ ರಾಜಶೇಖರ ಬಿ.ಪಾಟೀಲ ಅವರು ಅಭಿವೃದ್ಧಿಪಡಿಸಿದ್ದಾರೆ.

ಆದರೆ ಅದರಷ್ಟೇ ಅವಶ್ಯವಿರುವ ವಾರ್ಡ್‌ ಸಂಖ್ಯೆ 5ರ ವ್ಯಾಪ್ತಿಗೆ ಒಳಪಡುವ ಭಡಕಲ್‌ ಅಗಸಿ-ಹುಸೇನಿ ದರ್ಗಾಕ್ಕೆ ಸಂಪರ್ಕ ಕಲ್ಪಿಸುವ ಪ್ರಮುಖ ಮಾರ್ಗದ ರಸ್ತೆ ಅಭಿವೃದ್ಧಿ ನಡೆಯದ ಕಾರಣ ತಮ್ಮ ಪ್ರತಿಯೊಂದು ಚಟುವಟಿಕೆಗೆ ಆ ಮಾರ್ಗವನ್ನೇ ಅವಲಂಬಿಸಿರುವ ನಿವಾಸಿಗಳು ನಿತ್ಯ ತೊಂದರೆ ಅನುಭವಿಸುವುದು ತಪ್ಪಿಲ್ಲ.

ರಸ್ತೆ-ಚರಂಡಿ ಎರಡೂ ಇಲ್ಲ: ಆ ಮಾರ್ಗದಲ್ಲಿ ರಸ್ತೆ ಮಾತ್ರವಲ್ಲ ಚರಂಡಿಯೂ ಇಲ್ಲ. ಆ ಸೌಲಭ್ಯವಿಲ್ಲದ ಕಾರಣ ಓಣಿ ನಿವಾಸಿಗಳ ಬಚ್ಚಲ ತ್ಯಾಜ್ಯವೆಲ್ಲವೂ ಮುಖ್ಯ ರಸ್ತೆಯಲ್ಲೇ ಹರಿದಾಡುವ ಕಾರಣ ಅದರಿಂದ ಉಂಟಾಗುವ ದುರ್ನಾತ ಸಹಿಸಲಾಗದೇ ಶಾಲಾ ಮಕ್ಕಳು, ಗ್ರಾಮದ ಇತರೆ ನಿವಾಸಿಗಳು ಮೂಗು ಮುಚ್ಚಿಕೊಂಡು ಸಂಚರಿಸಬೇಕಾದ ಅನಿವಾರ್ಯತೆ ಇದೆ.

ಈ ಮಧ್ಯ ಅದೆಷ್ಟೋ ಗ್ರಾಮ ಪಂಚಾಯಿತಿ, ತಾಲೂಕು ಪಂಚಾಯಿತಿ, ಜಿಲ್ಲಾ ಪಂಚಾಯಿತಿಗೆ ಮನವಿ ಮಾಡಿದರೂ ಈವರೆಗೆ ಯಾವುದೇ ಪ್ರಯೋಜನವಾಗಿಲ್ಲ. ಕಾರಣ ಹಿಂದೆ ಹೋದದ್ದು ಹೋಯಿತು. ಮುಂದೆ ಅನಗತ್ಯ ವಿಳಂಬಿಸದೇ ಸಾರ್ವಜನಿಕರ ಸಮಸ್ಯೆಯನ್ನು ಗಂಭೀರ ಪರಿಗಣಿಸಿ, ಅಭಿವೃದ್ಧಿಗೆ ಮುಂದಾಗಬೇಕು ಎಂಬುದು ಓಣಿ ನಿವಾಸಿಗಳ ಒತ್ತಾಸೆ.