ಆಟಗಾರರೇ ಭಾಗಿಯಾಗದೆ ಫಿಕ್ಸಿಂಗ್‌ ಹೇಗೆ ಸಾಧ್ಯ: ಜಯವರ್ಧನ ಪ್ರಶ್ನೆ

ಕೊಲಂಬೊ: ಆಡುವ ಬಳಗದ ಎರಡೂ ತಂಡಗಳ ಆಟಗಾರರ್ಯಾರೂ ಭಾಗಿ ಯಾಗದೇ ಇರುವಾಗ ಕ್ರಿಕೆಟ್‌ ಪಂದ್ಯವೊಂದನ್ನು ಫಿಕ್ಸ್‌ ಮಾಡಲು ಹೇಗೆ ಸಾಧ್ಯ ಎಂಬುದಾಗಿ ಶ್ರೀಲಂಕಾದ ಮಾಜಿ ನಾಯಕ ಮಾಹೇಲ ಜಯವರ್ಧನ ಪ್ರಶ್ನಿಸಿದ್ದಾರೆ. ಭಾರತದೆದುರಿನ 2011ರ ವಿಶ್ವಕಪ್‌ ಫೈನಲ್‌ ಪಂದ್ಯವನ್ನು ಶ್ರೀಲಂಕಾ “ಮಾರಾಟ ಮಾಡಿತ್ತು’ ಎಂಬ ತನ್ನ ದೇಶದ ಮಾಜಿ ಕ್ರೀಡಾ ಸಚಿವರ ಆರೋಪಕ್ಕೆ ಅವರು ಪ್ರತಿಕ್ರಿಯಿಸಿದ್ದಾರೆ.

“ಇದೊಂದು ದೊಡ್ಡ ವ್ಯವ ಹಾರವೆಂದೇ ಭಾವಿಸೋಣ. ಆದರೆ ಹನ್ನೊಂದರ ಯಾವ ಆಟಗಾರರೂ ಒಳಗೊಂಡಿಲ್ಲ ಅಂದಮೇಲೆ ಪಂದ್ಯವೊಂದನ್ನು ಫಿಕ್ಸ್‌ ಮಾಡಲು ಹೇಗೆ ಸಾಧ್ಯ? 9 ವರ್ಷಗಳ ಬಳಿಕ ಅವರಿಗೆ ಜ್ಞಾನೋದಯ ಆಯಿತೇ?’ ಎಂಬುದಾಗಿ ಮಾಹೇಲ ಜಯವರ್ಧನ ವ್ಯಂಗ್ಯ ವಾಗಿ ಪ್ರಶ್ನಿಸಿದ್ದಾರೆ.

ಅಂದೇ ಅರ್ಜುನ ರಣತುಂಗ ಆರೋಪ
ಈ ಪಂದ್ಯ ಫಿಕ್ಸ್‌ ಆಗಿತ್ತು ಎಂಬುದಾಗಿ ನೇರ ಆರೋಪ ಮಾಡಿದವರಲ್ಲಿ ಅಲುತಗಾಮಗೆ ಮೊದಲಿಗರೇನಲ್ಲ. ಲಂಕೆಗೆ ಏಕೈಕ ವಿಶ್ವಕಪ್‌ ತಂದಿತ್ತ ಕಪ್ತಾನ ಅರ್ಜುನ ರಣತುಂಗ 2017ರಲ್ಲಿ ಮೊದಲ ಸಲ ಇಂಥದೇ ಅನುಮಾನ ವ್ಯಕ್ತಪಡಿಸಿದ್ದರು. “ಆಗ ನಾನು ಭಾರತದಲ್ಲೇ ಇದ್ದು, ವೀಕ್ಷಕ ವಿವರಣೆ ನೀಡುತ್ತಿದ್ದೆ. ಲಂಕಾ ಸೋತಾಗ ನನಗೆ ಆಘಾತವಾಗಿತ್ತು, ಅನುಮಾನವೂ ಬಂದಿತ್ತು. ಅಂದಿನ ಫೈನಲ್‌ ಪಂದ್ಯವನ್ನು ತನಿಖೆಗೆ ಒಳಪಡಿಸಬೇಕು ಎಂದಿದ್ದೆ…’ ಎಂಬುದಾಗಿ ರಣತುಂಗ ಆಗ್ರಹಿಸಿದ್ದರು.