ಪಿ.ಸತ್ಯನಾರಾಯಣ
ಹೊಸಪೇಟೆ: ಹೈದ್ರಾಬಾದ್‌-ಕರ್ನಾಟಕ, ಆಂಧ್ರ ಹಾಗೂ ತೆಲಂಗಾಣ ರಾಜ್ಯಗಳ ರೈತರ ಜೀವನಾಡಿಯಾದ ತುಂಗಭದ್ರಾ ಜಲಾಶಯ ನೀರಿಲ್ಲದೆ ಭಣಗುಡುತ್ತಿದೆ. ಮಲೆನಾಡು ಭಾಗದಲ್ಲೂ ಸಹ ಇನ್ನೂ ಮಳೆ ಆರಂಭಗೊಳ್ಳದ್ದರಿಂದ ಜಲಾಶಯಕ್ಕೆ ನೀರು ಹರಿದುಬರುತ್ತಿಲ್ಲ. ಅಲ್ಲದೆ ಬಿರುಬಿಸಿಲಿಗೆ ಜಲಾಶಯದಲ್ಲಿದ್ದ ನೀರು ಸಹ ದಿನೇ ದಿನೇ ಕಡಿಮೆಯಾಗುತ್ತಿದೆ.
ಜಲಾಶಯದಲ್ಲಿ ನೀರು ಡೆಡ್‌ ಸ್ಟೋರೇಜ್‌ ತಲುಪಿದ್ದು, ಜೀವಜಲಕ್ಕಾಗಿ ಜನ, ಜಲಚರಗಳ ಪರದಾಟ ಶುರುವಾಗಿದೆ. ಇನ್ನು ಹದಿನೈದು ದಿನದಲ್ಲಿ ಮಳೆಯಾಗದಿದ್ದಲ್ಲಿ ಬಳ್ಳಾರಿ ಜಿಲ್ಲೆ ಸೇರಿದಂತೆ ಜಲಾಶಯವನ್ನೇ ಅವಲಂಬಿಸಿರುವವರ ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸಲಿದೆ. ಮಳೆಯಾಗುವ ಮುನ್ನವೇ ಜಲಾಶಯ ಬರಿದಾದಲ್ಲಿ ಕುಡಿಯುವ ನೀರಿಗೂ ಹಾಹಾಕಾರ ಉಂಟಾಗಲಿದೆ.
ಜಲಾಶಯದಲ್ಲಿ ನೀರಿಲ್ಲದ್ದರಿಂದ ಹೈದ್ರಾಬಾದ್‌ ಕರ್ನಾಟಕವಲ್ಲದೆ ನೆರೆಯ ಆಂಧ್ರ, ತೆಲಂಗಾಣ ರಾಜ್ಯಗಳಲ್ಲೂ ನೀರಿನ ಸಮಸ್ಯೆ ತಲೆದೋರಿದೆ. ಸದ್ಯ ಜಲಾಶಯದಲ್ಲಿ ಎರಡೂವರೆ ಟಿಎಂಸಿ ನೀರು ಮಾತ್ರ ಇದ್ದು, ಡೆಡ್‌ ಸ್ಟೋರೇಜ್‌ಗೆ ತಲುಪಿದೆ. ಬಿರುಬಿಸಿಲಿನಿಂದ ಬಚಾವ್‌ ಆಗಲು ಜಲಚರಗಳು ಸಹ ಇರುವ ಅಲ್ವ ಸ್ವಲ್ಪ ಹಿನ್ನೀರಿನಲ್ಲಿ ಆಶ್ರಯ ಪಡೆದಿದ್ದು, ಜೀವ ಉಳಿಸಿಕೊಳ್ಳಲು ಹರಸಾಹಸ ಪಡುತ್ತಿವೆ. ಕಳೆದ ವರ್ಷ ಮೇ, ಅಂತ್ಯ ಹಾಗೂ ಜೂನ್‌ ಆರಂಭದಲ್ಲೇ ಮಲೆನಾಡು ಭಾಗದಲ್ಲಿ ಮಳೆ ಸುರಿದಿದ್ದರಿಂದ ಜಲಾಶಯಕ್ಕೆ 4.5 ಟಿಎಂಸಿ ನೀರು ಹರಿದು ಬಂದಿತ್ತು. ಆದರೆ ಈ ಬಾರಿ ರಾಜ್ಯದ ಎಲ್ಲೆಡೆ ಮುಂಗಾರು ಮಳೆ ವಿಳಂಬವಾಗಿದೆ. ಹೀಗಾಗಿ ಸಮಸ್ಯೆ ಮತ್ತಷ್ಟು ಉಲ್ಬಣಿಸಿದೆ. ಬರಿದಾದ ಜಲಾಶಯಕ್ಕೆ ಭದ್ರಾ ಜಲಾಶಯದ ಮೂಲಕ ನೀರು ಹರಿಸಬೇಕು ಎಂದು ರೈತರು ಒತ್ತಾಯಿಸುತ್ತಿದ್ದಾರೆ.
ತುಂಗಭದ್ರಾ ಜಲಾಶಯದಲ್ಲಿ ನೀರಿಲ್ಲದ ಕಾರಣ ಬಳ್ಳಾರಿ, ರಾಯಚೂರು ಹಾಗೂ ಕೊಪ್ಪಳ ಜಿಲ್ಲೆಯ ಜನರಿಗೆ ಜಲ ಸಂಕಷ್ಟ ಎದುರಾಗಿದೆ. ಬಳ್ಳಾರಿ ನಗರದಲ್ಲಿ ಹದಿನೈದು ದಿನಕ್ಕೊಮ್ಮೆ ನೀರು ಪೂರೈಕೆಯಾದರೆ, ಜಲಾಶಯದ ಪಕ್ಕದಲ್ಲಿಯೇ ಇರುವ ಹೊಸಪೇಟೆಗೆ ತಿಂಗಳು ಕಳೆದರೂ ನೀರು ಪೂರೈಕೆಯಾಗಿಲ್ಲ. ಬೋರ್‌ವೆಲ್ ನೀರನ್ನೇ ಅವಲಂಬಿಸಿರುವ ಜನ ಅಂತರ್ಜಲವೂ ಬತ್ತಿದರೆ ಹನಿ ನೀರಿಗೂ ಪರದಾಡಬೇಕಾಗಿದೆ.
ಇನ್ನು ಗ್ರಾಮೀಣ ಭಾಗಗಳಲ್ಲಿ ಬರದಿಂದ ಕಂಗೆಟ್ಟ ಜನರ ಗೋಳು ಹೆಚ್ಚಿದ್ದು, ನೀರಿಗಾಗಿ ಜನ ಹರ ಸಾಹಸ ಪಡುತ್ತಿದ್ದಾರೆ. ಇನ್ನು ಹದಿನೈದು ದಿನಗಳಲ್ಲಿ ಮಲೆನಾಡು ಹಾಗೂ ಬಳ್ಳಾರಿಯಲ್ಲಿ ಮಳೆಯಾಗದಿದ್ದರೆ ಜಲಾಶಯವನ್ನೇ ನಂಬಿದ ಮೂರು ಜಿಲ್ಲೆಗಳ ಜನರ ಬದುಕು ನರಕವಾಗೋದರಲ್ಲಿ ಸಂಶಯವೇ ಇಲ್ಲ. ಈ ಹಿಂದೆ ಇಂತಹುದೇ ಪರಿಸ್ಥಿತಿ ಬಂದಾಗ ಭದ್ರಾ ಜಲಾಶಯದ ಮೂಲಕ ನೀರು ಹರಿಸಿ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲಾಗಿತ್ತು. ಅದೇ ರೀತಿ ಈ ಬಾರಿ ಮಳೆಯಾಗದೇ ಹೋದಲ್ಲಿ ಭದ್ರ ಮೂಲಕ ಟಿ ಬಿ ಡ್ಯಾಂ ನೀರು ಸಂಗ್ರಹಿಸಿಕೊಳ್ಳಬೇಕು ಎಂದು ಜನ ಒತ್ತಾಯಿಸುತ್ತಿದ್ದಾರೆ.
ಕಳೆದ ನಾಲ್ಕು ವರ್ಷ ಬರದಿಂದ ಬಸವಳಿದಿರುವ ರೈತರಿಗೆ ಎರಡು ಬೆಳೆ ಬೆಳೆಯಲು ಆಗುತ್ತಿಲ್ಲ. ಡೆಡ್‌ ಸ್ಟೋರೇಜ್‌ ತಲುಪಿದ ಜಲಾಶಯ ನಂಬಿದ ರೈತರಿಗೆ ಈ ಬಾರಿ ಉತ್ತಮ ಮಳೆಯಾಗದೇ ಹೋದರೆ ಮತ್ತೆ ಬರದ ಬರೆ ಬೀಳುವ ಭಯ ಕಾಡುತ್ತಿದೆ. ಹದಿನೈದು ದಿನದಲ್ಲಿ ಮಳೆಯಾಗದೇ ಹೋದರಂತೂ ಹೈ.ಕ ಭಾಗದ ಮೂರು ಜಿಲ್ಲೆಗಳಿಗೆ ಜಲ ಗಂಡಾಂತರ ಕಾದಿದೆ.
