ಮಲೆನಾಡಲ್ಲಿ ಮತ್ತೆ ಮಳೆ ಅಬ್ಬರ

ಹೊಸನಗರ: ಕಳೆದ ಒಂದು ವಾರದಿಂದ ತಾಲೂಕಿನಾದ್ಯಂತ ಉತ್ತಮ ಮಳೆಯಾಗುತ್ತಿದೆ. ಅದರಲ್ಲೂ ನಗರ ಹೋಬಳಿಯಲ್ಲಂತೂ ಎಡಬಿಡದೆ ಮಳೆ ಸುರಿಯುತ್ತಿದ್ದು ಹೋಬಳಿಯ ವ್ಯಾಪ್ತಿಯಲ್ಲಿ ಬರುವ ಮಾಣಿ, ಚಕ್ರಾ, ಸಾವೇಹಕ್ಲು, ಲಿಂಗನಮಕ್ಕಿ ಜಲಾಶಯಕ್ಕೆ ನೀರಿನ ಹರಿವು ಹೆಚ್ಚಿದೆ. ನಗರ ಹೋಬಳಿಯಾದ್ಯಂತ ಕಳೆದ ಒಂದು ವಾರದಿಂದ ದಿನಂಪ್ರತಿ 8 ರಿಂದ 10 ಸೆಂಮೀ ಮಳೆಯಾಗಿದೆ. ದಿನ ಕಳೆದಂತೆ ಮಳೆಯ ತೀವ್ರತೆ ಹೆಚ್ಚುತ್ತಿದ್ದು ಜನರು ಮನೆಯಿಂದ ಹೊರಬರಲು ಯೋಚಿಸುವಂತೆ ಮಾಡಿದೆ.

ನಗರದಲ್ಲಿ 124 ಮಿಮೀ ಮಳೆ: ಹೋಬಳಿ ಕೇಂದ್ರ ನಗರದಲ್ಲಿ ಒಂದೇ ದಿನ ಅತೀ ಹೆಚ್ಚು 124 ಮಿಮೀ ಮಳೆಯಾಗಿದೆ. ಉಳಿದಂತೆ ಮಾಸ್ತಿಕಟ್ಟೆಯಲ್ಲಿ 101 ಮಿಮೀ, ಹುಲಿಕಲ್ 89 ಮಿಮೀ, ಯಡೂರಿನಲ್ಲಿ 82 ಮಿಮೀ, ಮಾಣಿ ಜಲಾಶಯ ವ್ಯಾಪ್ತಿಯಲ್ಲಿ 65 ಮಿಮೀ ಮಳೆ ಒಂದೇ ದಿನ ಸುರಿದಿದೆ. 594.36 ಗರಿಷ್ಠ ಮಟ್ಟದ ಮಾಣಿ ಡ್ಯಾಂ ನೀರಿನ ಮಟ್ಟ 579.46 ಮೀ ತಲುಪಿದೆ. ನೀರಿನ ಒಳಹರಿವು ಹೆಚ್ಚಿದ್ದು 11660 ಕ್ಯೂಸೆಕ್‌ ತಲುಪಿದೆ. ಈವರೆಗೆ ಮಾಣಿ ಜಲಾಶಯ ವ್ಯಾಪ್ತಿಯಲ್ಲಿ 2756 ಮಿಮೀ ಮಳೆ ಸುರಿದಿದೆ. ಉಳಿದಂತೆ ಯಡೂರು 2985 ಮಿಮೀ, ಹುಲಿಕಲ್ 3527 ಮಿಮೀ, ಮಾಸ್ತಿಕಟ್ಟೆಯಲ್ಲಿ 3230 ಮಿಮೀ ಮಳೆಯಾಗಿದೆ.