ಹಾಂಕಾಂಗ್‌: ಮಿಂಚುವರೇ ಸೈನಾ ನೆಹ್ವಾಲ್‌, ಸಿಂಧು?

ಹಾಂಕಾಂಗ್‌: ಇತ್ತೀಚಿನ ಬ್ಯಾಡ್ಮಿಂಟನ್‌ ಕೂಟಗಳಿಂದ ಬೇಗನೇ ನಿರ್ಗಮಿಸಿ ನಿರಾಸೆ ಮೂಡಿಸುತ್ತಿರುವ ಸೈನಾ ನೆಹ್ವಾಲ್‌ ಮತ್ತು ಪಿ.ವಿ. ಸಿಂಧು ಅವರಿಗೆ ಮಂಗಳವಾರದಿಂದ ಮತ್ತೂಂದು ಸವಾಲು ಎದುರಾಗಲಿದೆ. ಹಾಂಕಾಂಗ್‌ ಓಪನ್‌ ಪಂದ್ಯಾವಳಿ ಮೊದಲ್ಗೊಳ್ಳಲಿದ್ದು, ಇಲ್ಲಿ ಇವರು ದೂರ ಸಾಗುವರೇ ಎಂಬುದೊಂದು ನಿರೀಕ್ಷೆ.

ಚೀನ ಓಪನ್‌ನಂತೆ ಇಲ್ಲಿ ಕೂಡ ಸೈನಾ ನೆಹ್ವಾಲ್‌ ಚೀನದ ಕೈ ಯಾನ್‌ ಯಾನ್‌ ಅವರನ್ನು ಮೊದಲ ಸುತ್ತಿನಲ್ಲೇ ಎದುರಿಸಲಿದ್ದಾರೆ. ಅಲ್ಲಿ ಸೈನಾ ಆರಂಭಿಕ ಆಘಾತಕ್ಕೆ ಸಿಲುಕಿದ್ದರು.

ಆದರೆ ಪುರುಷರ ಡಬಲ್ಸ್‌ನಲ್ಲಿ ಸಾತ್ವಿಕ್‌ರಾಜ್‌ ರಾಂಕಿರೆಡ್ಡಿ-ಚಿರಾಗ್‌ ಶೆಟ್ಟಿ ಜೋಡಿ ಉತ್ತಮ ಲಯದಲ್ಲಿದೆ. ವಿಶ್ವದ ನಂ.9 ಜೋಡಿಯಾಗಿರುವ ಇವರು ಫ್ರೆಂಚ್‌ ಓಪನ್‌ನಲ್ಲಿ ರನ್ನರ್‌ ಅಪ್‌ ಆಗಿದ್ದರು. ಕಳೆದ ವಾರದ ಚೀನ ಓಪನ್‌ನಲ್ಲಿ ಸೆಮಿಫೈನಲ್‌ ತನಕ ಸಾಗಿದ್ದರು. ಹೀಗಾಗಿ ಹಾಂಕಾಂಗ್‌ನಲ್ಲಿ ಇವರ ಮೇಲೆ ಭಾರೀ ನಿರೀಕ್ಷೆ ಇರಿಸಲಾಗಿದೆ.

ಪುರುಷರ ಸಿಂಗಲ್ಸ್‌ನಲ್ಲಿ ಶ್ರೀಕಾಂತ್‌ ಅವರಿಗೆ ಮೊದಲ ಸುತ್ತಿನಲ್ಲೇ ಕಠಿನ ಸವಾಲು ಎದುರಾಗಿದೆ. ಇಲ್ಲಿ ಅವರು ವಿಶ್ವದ ನಂ.1 ಆಟಗಾರ ಕೆಂಟೊ ಮೊಮೊಟ ವಿರುದ್ಧ ಸೆಣಸಬೇಕಿದೆ.