ಮಸೂದೆ ಹಿಂಪಡೆದ ಹಾಂಕಾಂಗ್‌ ; ತೀವ್ರ ಪ್ರತಿಭಟನೆಗೆ ಕಾರಣವಾಗಿದ್ದ ಮಸೂದೆ

ಹಾಂಕಾಂಗ್‌: ಹಾಂಕಾಂಗ್‌ನಲ್ಲಿ ಭಾರೀ ಪ್ರತಿಭಟನೆಗೆ ಕಾರಣವಾಗಿದ್ದ, ಅಪರಾಧಿಗಳನ್ನು ಹಾಂಕಾಂಗ್‌ನಿಂದ ಚೀನಗೆ ಗಡಿಪಾರು ಮಾಡುವ ಮಸೂದೆಯನ್ನು ಹಿಂಪಡೆದಿರುವುದಾಗಿ ಹಾಂಕಾಂಗ್‌ ಶಾಸನ ಸಭೆ ಘೋಷಿಸಿದೆ. ಸಾವಿರಾರು ಜನರು ಬೀದಿಗಿಳಿದು ಈ ಮಸೂದೆ ವಿರುದ್ಧ ಪ್ರತಿಭಟಿಸಿದ್ದರು. ಕೊನೆಗೂ ಈ ಮಸೂದೆಯನ್ನು ರದ್ದುಗೊಳಿಸಲು ನಿರ್ಧರಿಸಲಾಗಿದೆ.

ಆದರೆ ಪ್ರತಿಭಟನಕಾರರಿಗೆ ಈ ಘೋಷಣೆ ಸಮಾಧಾನ ತಂದಿಲ್ಲ. ಹೀಗಾಗಿ ಇನ್ನೂ ಪ್ರತಿಭಟನೆಯನ್ನು ಅವರು ಮುಂದುವರಿಸಿದ್ದಾರೆ. ಪ್ರತಿಭಟನಕಾರರು ಇಟ್ಟ ಐದು ಬೇಡಿಕೆಗಳ ಪೈಕಿ ಕೇವಲ ಒಂದು ಬೇಡಿಕೆಗೆ ಮಾತ್ರ ಸರಕಾರ ಸಮ್ಮತಿ ನೀಡಿದ್ದು, ಇತರ ನಾಲ್ಕು ಬೇಡಿಕೆಗಳು ಇನ್ನೂ ಪೂರೈಸಿಲ್ಲ ಎಂದು ಪ್ರತಿಭಟನಕಾರರು ಹೇಳಿದ್ದಾರೆ.

ಈ ಮಸೂದೆಯ ಪ್ರಕಾರ ಅಪರಾಧಿಗಳನ್ನು ಚೀನ, ತೈವಾನ್‌ ಮತ್ತು ಮಕಾವುಗೆ ಹಸ್ತಾಂತರ ಮಾಡಬಹುದಾಗಿತ್ತು. ಈ ಅಪರಾಧಿಗಳನ್ನು ಸರಿಯಾದ ರೀತಿಯಲ್ಲಿ ಚೀನದಲ್ಲಿ ನಡೆಸಿಕೊಳ್ಳುವುದಿಲ್ಲ ಎಂಬ ಕಾರಣಕ್ಕೆ ಹಾಂಕಾಂಗ್‌ ಜನರು ಪ್ರತಿಭಟನೆ ನಡೆಸುತ್ತಿದ್ದರು.

ಕ್ಯಾರಿ ಲ್ಯಾಮ್‌ ಎತ್ತಂಗಡಿ?: ಈ ಮಧ್ಯೆ ಪ್ರತಿಭಟನೆಗಳನ್ನು ಹತ್ತಿಕ್ಕಲು ವಿಫ‌ಲವಾಗಿದ್ದಕ್ಕೆ ಹಾಂಕಾಂಗ್‌ನ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿ ಕ್ಯಾರಿ ಲ್ಯಾಮ್‌ರನ್ನು ಬದಲಿಸಲು ಚೀನ ಆಡಳಿತ ನಿರ್ಧರಿಸಿದೆ ಎನ್ನಲಾಗಿದೆ. ಆದರೆ ಈ ವರದಿಗಳನ್ನು ಚೀನ ತಳ್ಳಿಹಾಕಿದೆ. ಕ್ಯಾರಿ ಲ್ಯಾಮ್‌ರನ್ನು ಬದಲಿಸುವ ಯಾವುದೇ ಪ್ರಸ್ತಾವವಿಲ್ಲ. ಹಾಂಕಾಂಗ್‌ನಲ್ಲಿ ಹಿಂಸೆಯನ್ನು ತಡೆದು, ಶಾಂತಿ ಸ್ಥಾಪನೆಗೆ ಚೀನ ಎಲ್ಲ ಬೆಂಬಲವನ್ನೂ ಕ್ಯಾರಿಗೆ ಒದಗಿಸುತ್ತದೆ ಎಂದು ವಿದೇಶಾಂಗ ಸಚಿವಾಲಯದ ವಕ್ತಾರ ಹುವಾ ಚುನ್ಯಿಂಗ್‌ ಹೇಳಿದ್ದಾರೆ.