ಹೊಳೆಆಲೂರ: ನೆರೆಹಾವಳಿಯಿಂದ ಮನೆ ಕಳೆದುಕೊಂಡು ನಿರ್ಗತಿಕರಾಗಿರುವ ನಿರಾಶ್ರಿತರ ಪರಿಹಾರ ವಿತರಣೆಯಲ್ಲಿ ತಾರತಮ್ಯ ಮಾಡಿರುವ ಧೋರಣೆ ಖಂಡಿಸಿ ಹೊಳೆಆಲೂರ ನಾಡ ಕಚೇರಿ ಎದುರು ಸಾರ್ವಜನಿಕರು ಬೆಳಗ್ಗೆಯಿಂದ ಸಂಜೆಯವರೆಗೆ ಧರಣಿ ಸತ್ಯಾಗ್ರಹ ನಡೆಸಿದರು.
ಸಂಜೆ ತಹಶೀಲ್ದಾರ್‌ ಸಮಾಧಾನ ಪಡಿಸಿದ್ದರಿಂದ ಧರಣಿ ಕೈಬಿಡಲಾಯಿತು. ಮೊದಲ ಹಂತದಲ್ಲಿ ಅವಕಾಶ ವಂಚಿತರಾಗಿದ್ದ ನಿರಾಶ್ರಿತರು ಜಿಲ್ಲಾಧಿಕಾರಿಗಳಿಗೆ ಮನವಿ ಮಾಡಿಕೊಂಡ ಪರಿಣಾಮ ಪುನಃ ಸಮೀಕ್ಷೆ ಮಾಡಿ 320 ಫಲಾನುಭವಿಗಳನ್ನು ಗುರುತಿಸಲಾಗಿತ್ತು. ಆದರೆ ಅವರಿಗೆ ಇದುವರೆಗೆ ಜಿಪಿಎಸ್‌ ಮಾಡದಿರುವುದರಿಂದ ಪರಿಹಾರ ಬಂದಿರಲಿಲ್ಲ. ಸಂಪೂರ್ಣ ಬಿದ್ದ ಮನೆಗಳನ್ನು ಎ ಗ್ರೇಡ್‌ನ‌ಲ್ಲಿ ಪರಿಗಣಿಸುವ ಬದಲು ಕೇವಲ ಸಿ ಗ್ರೇಡ್‌ ನೀಡಿದ್ದರಿಂದ ಆಕ್ರೋಶಗೊಂಡ ಸಂತ್ರಸ್ತರು ಎಲ್ಲವನ್ನು ಸರಿಪಡಿಸುವಂತೆ ಧರಣಿ ಸತ್ಯಾಗ್ರಹ ಕೈಗೊಂಡಿದ್ದರು.
ಇವರನ್ನು ಸಮಾಧಾನ ಪಡಿಸಲು ಸ್ಥಳಕ್ಕೆ ಭೇಟಿ ನೀಡಿದ ಉಪ ತಹಶೀಲ್ದಾರ್‌ ಕೆ.ವೈ. ಬೆಟಗೇರಿ, ಕಂದಾಯ ಅಧಿಕಾರಿ ಆರ್‌.ಸಿ.ಬಾರಕೇರ, ಪಿಎಸ್‌ಐ ಪರಮೇಶ್ವರ ಕವಟಗಿ ಸಂತ್ರಸ್ತರ ಮನವೊಲಿಸಲು ಪ್ರಯತ್ನಿಸಿದರೂ ಅದಕ್ಕೆ ನಿರಾಶ್ರಿತರು ಜಗ್ಗಲಿಲ್ಲ. ಸಂಜೆ 5ಕ್ಕೆ ಧರಣಿ ನಿರತ ಸ್ಥಳಕ್ಕೆ ಆಗಮಿಸಿದ ತಹಶೀಲ್ದಾರ್‌ ಜೆ.ಬಿ. ಜಕ್ಕನಗೌಡ್ರ ಮಾತನಾಡಿ, ಸರಕಾರ ರಾಜೀವಗಾಂಧಿ ನಿಗಮದ ತಂತ್ರಾಂಶ ತಾತ್ಕಾಲಿಕವಾಗಿ ಬಂದ್‌ ಮಾಡಿರುವುದರಿಂದ 320 ಮನೆಗಳ ಜಿಪಿಎಸ್‌ ಕೆಲಸ ನಿಂತಿದ್ದು, ಈ ವಿಷಯವನ್ನು ಜಿಲ್ಲಾಧಿಕಾರಿಗಳ ಗಮನಕ್ಕೆ ತರಲಾಗಿದ್ದು, ಸರಕಾರಕ್ಕೆ ಮನವರಿಕೆ ಮಾಡಿಕೊಟ್ಟು ನಾನೇ ಸ್ವತಃ ಹಾನಿಗೊಳಗಾದ ಪ್ರತಿ ಮನೆಗೆ ಭೇಟಿ ನೀಡಿ ಶೀಘ್ರ ಪರಿಹಾರ ಒದಗಿಸಿ ನಿಜವಾದ ಸಂತ್ರಸ್ತರಿಗೆ ಪ್ರಾಮಾಣಿಕವಾಗಿ ನ್ಯಾಯ ಕೊಡಿಸುತ್ತೇನೆ ಎಂದು ಭರವಸೆ ನೀಡಿದರು.ಇದರಿಂದಾಗಿ ಧರಣಿ ಕೈಬಿಡಲಾಯಿತು.
ನರಗುಂದ ಬ್ಲಾಕ್‌ ಕಾಂಗ್ರೆಸ್‌ ಅಧ್ಯಕ್ಷ ಪ್ರವೀಣ ಯಾವಗಲ್ಲ, ತಾ.ಪಂ. ಅಧ್ಯಕ್ಷ ಪ್ರಕಾಶ ತಿರಕನಗೌಡ್ರ, ಪ್ರಕಾಶ ಬಜೇಂತ್ರಿ, ಬಸವರಾಜ ಪಾಟೀಲ, ಎಫ್‌.ಎಸ್‌.ಚಿಕ್ಕಮಣ್ಣೂರ, ಮಹಾಬಳೇಶ ಗಾಣಿಗೇರ, ವಾಣಿಜ್ಯೋದ್ಯಮ ಸಂಸ್ಥೆ ಮಾಜಿ ಅಧ್ಯಕ್ಷ ಎಸ್‌.ಜಿ. ತೋಟದ, ಗ್ರಾ.ಪಂ. ಅಧ್ಯಕ್ಷೆ ಸುಮಂಗಲಾ ಕಾತರಕಿ, ಉಪಾಧ್ಯಕ್ಷೆ ಸರೋಜಮ್ಮ ಗೌರಿಮಠ, ರೈತ ಸಂಘದ ಅಧ್ಯಕ್ಷೆ ಶಾಂತಾ ಕಾತರಕಿ, ಶರಣಮ್ಮ ಯಾದವಾಡ, ಲಕ್ಷ್ಮೀ ಭಾಯಿ ಹೆಗ್ರಿ, ಭಾರತಿ ಕಾತರಕಿ, ಶಾವಕ್ಕ ಕಂದಗಲ್ಲ, ದ್ರಾಕ್ಷಾಯಣಿ ಹೆಬ್ಬಳ್ಳಿ ಶಾಂತಾ ದೂಡ್ಡಮನಿ, ಲಕ್ಷ್ಮೀಭಾಯಿ ಮಡಿವಾಳರ ಇದ್ದರು.
