ಮಾರ್ಷ್‌ಗೆ ಸ್ನಾಯು ಸೆಳೆತ; ಐಪಿಎಲ್‌ಗೆ ಅನುಮಾನ

ಲಾಹೋರ್‌: ಸೋಂಟದ ಸ್ನಾಯು ನೋವಿನಿಂದ ಬಳಲುತ್ತಿರುವ ಆಸ್ಟ್ರೇಲಿಯದ ಆಲ್‌ರೌಂಡರ್‌ ಮಿಚೆಲ್‌ ಮಾರ್ಷ್‌ ಈ ಬಾರಿಯ ಐಪಿಎಲ್‌ನಲ್ಲಿ ಆಡುವುದು ಅನುಮಾನವಾಗಿದೆ.

ಗಾಯದಿಂದಾಗಿ ಅವರು ಪಾಕಿಸ್ಥಾನ ವಿರುದ್ಧ ನಡೆಯಲಿರುವ ಮುಂಬರುವ ಏಕದಿನ ಸರಣಿಯಿಂದ ಬಹುತೇಕ ಹೊರಬೀಳುವ ಸಾಧ್ಯತೆಯಿದೆ.

ಒಂದು ವೇಳೆ ಮಾರ್ಷ್‌ ಲಭ್ಯವಾಗದಿದ್ದರೆ ಅವರ ಸ್ಥಾನವನ್ನು ಕ್ಯಾಮರಾನ್‌ ಗ್ರೀನ್‌ ತುಂಬಲಿದ್ದಾರೆ.
ಐಪಿಎಲ್‌ ಹರಾಜಿನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್‌ ಫ್ರಾಂಚೈಸಿ ಮಾರ್ಷ್‌ ಅವರನ್ನು 6.5 ಕೋಟಿ ರೂ.ಗಳಿಗೆ ಖರೀದಿಸಿತ್ತು. ಅವರು ಏಕದಿನ ಸರಣಿ ಬಳಿಕ ಎಪ್ರಿಲ್‌ 6ರಂದು ಡೆಲ್ಲಿ ತಂಡವನ್ನು ಸೇರಬೇಕಿತ್ತು. ಆದರೆ ಇದೀಗ ಗಾಯದ ತೀವ್ರತೆಯನ್ನು ಗಮನಿಸಿ ಅವರು ಯಾವಾಗ ಲಭ್ಯವಾಗುತ್ತಾರೆಂದು ತಿಳಿಯಬೇಕಾಗಿದೆ.

ಇದನ್ನೂ ಓದಿ:ಗೆಲುವಿನ ಗಂಟೆ ಬಾರಿಸಿದ ಗುಜರಾತ್‌ ಟೈಟಾನ್ಸ್‌

ರವಿವಾರ ನಡೆದ ಫ್ಲೀಲ್ಡಿಂಗ್‌ ಅಭ್ಯಾಸದ ವೇಳೆ ಮಾರ್ಷ್‌ ಗಾಯಕ್ಕೆ ಒಳಗಾಗಿದ್ದರು. ಅವರ ಸ್ಕ್ಯಾನ್‌ ವರದಿಯನ್ನು ಪರೀಕ್ಷೆಗಾಗಿ ಕಳುಹಿಸಲಾಗಿದೆ. ಈ ವರದಿಯ ಆಧಾರದಲ್ಲಿ ಅವರು ಲಭ್ಯವಾಗುತ್ತಾರೆಯೇ ಎಂಬುದು ತಿಳಿಯಲಿದೆ. ಆದರೆ ಗಾಯದ ತೀವ್ರತೆಯನ್ನು ಗಮನಿಸಿದರೆ ಅವರು ಏಕದಿನ ಸರಣಿಗೆ ಲಭ್ಯವಾಗುವುದು ಅನುಮಾನ ಎಂದು ಆಸ್ಟ್ರೇಲಿಯ ನಾಯಕ ಆರನ್‌ ಫಿಂಚ್‌ ಹೇಳಿದ್ದಾರೆ.