ವಿಶ್ವ ಆ್ಯತ್ಲೆಟಿಕ್ಸ್‌ ರಿಲೇ : ಹಿಮಾ ದಾಸ್‌, ದ್ಯುತಿ ಚಂದ್‌ ಪ್ರಯಾಣಕ್ಕೆ ಚ್ಯುತಿ

ನವ ದೆಹಲಿ: ಭಾರತದಲ್ಲಿ ಹೆಚ್ಚುತ್ತಿರುವ ಕೊರೊನಾ ಪ್ರಕರಣಗಳಿಂದ ಒಲಿಂಪಿಕ್ಸ್‌ ಅರ್ಹತೆಯ ಹಾದಿಯಲ್ಲಿದ್ದ ಹಿಮಾ ದಾಸ್‌, ದ್ಯುತಿ ಚಂದ್‌ ಮೊದಲಾದ ಸ್ಪ್ರಿಂಟರ್‌ಗಳ ಕನಸಿಗೆ ಕತ್ತರಿ ಬೀಳುವ ಸಾಧ್ಯತೆ ಇದೆ.

ಪೋಲೆಂಡ್‌ನ‌ಲ್ಲಿ ಮೇ 1 ಹಾಗೂ 2ರಂದು ವಿಶ್ವ ಅಥ್ಲೆಟಿಕ್ಸ್‌ ರಿಲೇ ನಡೆಯಲಿದ್ದು, ಕೋವಿಡ್‌-19 ಹೆಚ್ಚುತ್ತಿರುವ ಕಾರಣ ಭಾರತದಿಂದ ಆಮ್‌ಸ್ಟರ್‌ಡಮ್‌ಗೆ ವಿಮಾನ ಸಂಪರ್ಕ ಸ್ಥಗಿತಗೊಂಡಿದೆ. ಇದರಿಂದ ಸ್ಟಾರ್‌ ಅಥ್ಲೀಟ್‌ಗಳಾದ ಹಿಮಾ ದಾಸ್‌ ಮತ್ತು ದ್ಯುತಿ ಚಂದ್‌ ಅವರು ಒಲಿಂಪಿಕ್ಸ್‌ ಅರ್ಹತೆ ಕಲ್ಪಿಸುವ ಕ್ರೀಡಾಕೂಟದಲ್ಲಿ ಭಾಗವಹಿಸುವ ಅವಕಾಶವನ್ನು ಕಳೆದುಕೊಳ್ಳಲಿದ್ದಾರೆ.

ಮಹಿಳೆಯರ 4/100 ಮೀ. ಹಾಗೂ ಪುರುಷರ ವಿಭಾಗದ 4/400 ಮೀ. ತಂಡಗಳು ಆಮ್‌ಸ್ಟರ್‌ಡಮ್‌ಗೆ ಗುರುವಾರ ಬೆಳಗಿನ ಜಾವ ತೆರಳಬೇಕಿತ್ತು. ಆದರೆ ಡಚ್‌ ಸರಕಾರ ಭಾರತದಿಂದ ಬರುವ ವಿಮಾನಗಳನ್ನು ಸೋಮವಾರದ ಸಂಜೆಯಿಂದಲೇ ಸ್ಥಗಿತಗೊಳಿಸಿದೆ.

ಇದನ್ನೂ ಓದಿ :ವೈದ್ಯಾಧಿಕಾರಿಗಳ ನೇಮಕಾತಿ ಕನಿಷ್ಟ ವಯೋಮಿತಿ ಹೆಚ್ಚಳ: ಸರ್ಕಾರದ ಕ್ರಮ ಎತ್ತಿಹಿಡಿದ ಹೈಕೋರ್ಟ್‌

ಪರ್ಯಾಯ ವ್ಯವಸ್ಥೆ?
ಭಾರತೀಯ ಅಥ್ಲೆಟಿಕ್ಸ್‌ ಫೆಡರೇಶನ್‌ ಪೋಲೆಂಡ್‌ಗೆ ತೆರಳುವುದಕ್ಕೆ ಯುರೋಪ್‌ನ ಮೂಲಕ ಪರ್ಯಾಯ ವಿಮಾನ ವ್ಯವಸ್ಥೆ ಮಾಡುವುದಕ್ಕೆ ಪ್ರಯತ್ನಿಸುತ್ತಿದೆ. ಆದರೆ ನಮ್ಮ ತಂಡ ಈ ಕ್ರೀಡಾಕೂಟದಲ್ಲಿ ಭಾಗವಹಿಸುವ ಬಗ್ಗೆ ಅನುಮಾನಗಳಿವೆ. ಹಲವಾರು ಯುರೋಪಿಯನ್‌ ರಾಷ್ಟ್ರಗಳು ಭಾರತದ ವಿಮಾನಗಳನ್ನು ನಿರ್ಬಂಧಿಸಿವೆ ಎಂದು ಹಿರಿಯ ಎಎಫ್ಐ ಅಧಿಕಾರಿಯೊಬ್ಬರು ಹೇಳಿದ್ದಾರೆ.