ಪಾರಂಪರಿಕ ಪದ್ಧತಿ ಜನಪ್ರಿಯತೆಗೆ ಕ್ರಮ

ಬೆಂಗಳೂರು: ಆಯುಷ್‌ ಪದವಿ ವಿದ್ಯಾರ್ಥಿಗಳ ಕೌಶಲ ವೃದ್ಧಿಸುವ ಮೂಲಕ ಭಾರತೀಯ ಪಾರಂಪರಿಕ ಚಿಕಿತ್ಸಾ ಪದ್ಧತಿಯನ್ನು ಜನಪ್ರಿಯಗೊಳಿಸಲು ಅಗತ್ಯ ಕ್ರಮಕೈಗೊಳ್ಳಲಾಗುದು ಎಂದು ಕೇಂದ್ರ ಆಯುಷ್‌ ಇಲಾಖೆ ಪ್ರಧಾನ ಕಾರ್ಯದರ್ಶಿ ಡಾ. ರಾಜೇಶ್‌ ಕೊಟೇಚಾ ತಿಳಿಸಿದರು.

ಕೇಂದ್ರ ಆಯುಷ್‌ ಇಲಾಖೆ, ಎಬಿವಿಪಿ ಹಾಗೂ ತ್ಯಾರುಣ್ಯ ಶಿಕ್ಷಣ ಸೇವಾ ಟ್ರಸ್ಟ್‌ ಸಂಯುಕ್ತಾಶ್ರಯದಲ್ಲಿ ಸೆಂಟ್ರಲ್‌ ಕಾಲೇಜು ಮೈದಾನದಲ್ಲಿ ನಡೆಯುತ್ತಿರುವ “ಜಿಜ್ಞಾಸಾ ರಾಷ್ಟ್ರೀಯ ಆರೋಗ್ಯ ಮೇಳಕ್ಕೆ ಗುರುವಾರ ಚಾಲನೆ ನೀಡಿ ಮಾತನಾಡಿದ ಅವರು, ಆಯುರ್ವೇದ, ಹೋಮಿಯೋಪಥಿ, ಸಿದ್ಧ, ಯುನಾನಿ, ನಾಟಿ ಹಾಗೂ ಯೋಗ ಚಿಕಿತ್ಸೆಯಲ್ಲಿ ಪದವಿ ಪಡೆದ ಹಾಗೂ ಪದವಿ ಪಡೆಯುತ್ತಿರುವ ವಿದ್ಯಾರ್ಥಿಗಳ ಕೌಶಲ ವೃದ್ಧಿಗೊಳಿಸುವ ಮೂಲಕ ಭಾರತೀಯ ಪಾರಂಪರಿಕ ವೈದ್ಯಕೀಯ ಪದ್ಧತಿಯನ್ನು ದೇಶ ಹಾಗೂ ವಿದೇಶಗಳಲ್ಲಿ ಸಹ ಜನಪ್ರಿಯಗೊಳಿಸಲಾಗುವುದು. ಈ ನಿಟ್ಟಿನಲ್ಲಿ ಆಯುಷ್‌ ಕೌಶಲ ನಿಗಮದಡಿ ಅಗತ್ಯ ತರಬೇತಿ ನೀಡಲಾಗುವುದು. ಆಸಕ್ತಿ ಹೊಂದಿದ ಪದವೀಧರರು ಇಲ್ಲಿ ಭಾಗವಹಿಸಬಹುದು ಎಂದು ಹೇಳಿದರು.

ಆಯುರ್ವೇದ ಚಿಕಿತ್ಸಾ ಪದ್ಧತಿಯು ವೈಜ್ಞಾನಿಕ ಸಾಕ್ಷ್ಯವಿಲ್ಲದೆ ಹಿಂದುಳಿಯುತ್ತಿದೆ. ಆದರೆ, ಸಂಪ್ರದಾಯಕ ಆರ್ಯುವೇದ ಚಿಕಿತ್ಸೆ ಶಾಶ್ವತ ಪರಿಹಾರ ಹಾಗೂ ಅಗ್ಗದ ವೆಚ್ಚದಾಗಿದ್ದು ಜನ ಸಾಮನ್ಯರು ಆರ್ಯುವೇದ ಬಳಸಬೇಕು. ಇನ್ನು ಕೇಂದ್ರ ಸರ್ಕಾರದ ನಮಸ್ತೆ ವೆಬ್‌ ಸೆಟ್‌ಗೆ ಭೇಟಿ ನೀಡಿ ಪಂಚಕರ್ಮ ಹಾಗೂ ಯುನಾನಿ ಸೇರಿದಂತೆ ಹಲವು ಬಗೆಯ ಆರ್ಯುವೇದ ಚಿಕಿತ್ಸೆಗಳ ಬಗ್ಗೆ ಮಾಹಿತಿ ಪಡೆಯಬಹುದು ಎಂದು ತಿಳಿಸಿದರು. 

ಎಬಿವಿಪಿ ರಾಷ್ಟ್ರೀಯ ಸಂಘಟನಾ ಕಾರ್ಯದರ್ಶಿ ಸುನೀಲ್‌ ಅಂಬೇಕರ್‌ ಮಾತನಾಡಿ, ಭವಿಷ್ಯದಲ್ಲಿ ಭಾರತೀಯ ಪಾರಂಪರಿಕ ಚಿಕಿತ್ಸಾ ವಿಧಾನಕ್ಕೆ ಸಾಕಷ್ಟು ಬೇಡಿಕೆ ಬರಲಿದೆ. ಈಗಾಗಲೇ ಸಾವಯವ ಆಹಾರಕ್ಕೆ ಜಾಗತಿಕ ಮಾರುಕಟ್ಟೆಯಲ್ಲಿ ಬೇಡಿಕೆ ಹೆಚ್ಚುತ್ತಿದೆ. ಇಕೋ ಟೂರಿಸ್‌ಂ, ಯೋಗದ ಕಡೆ ಯುವಜನತೆ ಮುಖ ಮಾಡುತ್ತಿದ್ದಾರೆ. ಇನ್ನು ಆಧುನಿಕ ವೈದ್ಯಕೀಯ ಚಿಕಿತ್ಸಾ ಪದ್ಧತಿ ದುಬಾರಿಯಾಗುತ್ತಿರುವ ಬೆನ್ನಲ್ಲಿಯೇ ಆಯು ರ್ವೇದದ ಹೆಸರಿನಲ್ಲಿ ಹಣ ಮಾಡುವವರು ಹೆಚ್ಚುತ್ತಿದ್ದು, ಇದಕ್ಕೆ ಸರ್ಕಾರ ಕಡಿವಾಣ ಹಾಕಬೇಕು ಎಂದರು. ಕರ್ನಾಟಕ ಆಯುಷ್‌ ಇಲಾಖೆ ನಿರ್ದೇಶಕಿ ಮೀನಾಕ್ಷಿ ನೇಗಿ, ಸಿಸಿಐಎಂ ಉಪಾಧ್ಯಕ್ಷ ಪ್ರೊ. ರಾಮಕೃಷ್ಣ, ಆಯುರ್ವೇದ ತಜ್ಞ ಡಾ. ಕಿಶೋರ್‌ ಕುಮಾರ್‌ ಇದ್ದರು.