ಇಲ್ಲೊಂದು ಗೋ ದೇಗುಲ!ಮಮತೆಯ ಗೋಮಾತೆಗೆ ಗುಡಿ ಕಟ್ಟಿದ ದಂಪತಿ

ಕೊಲ್ಲೂರು:ಗೋಮಾತೆಗೆ ಭಾರತೀಯ ಸಂಸ್ಕೃತಿಯಲ್ಲಿ ಅತ್ಯಂತ ಮಹತ್ವದ ಸ್ಥಾನವಿದೆ. ಗೋಮಾತೆಯ ದೇಹದಲ್ಲಿ 33 ಕೋಟಿ ದೇವತೆ ಗಳು ನೆಲೆಯಾಗಿದ್ದಾರೆ ಎಂಬ ನಂಬಿಕೆ ಹಿಂದೂಗಳದು. ಇವೆಲ್ಲಕ್ಕೂ ದ್ಯೋತಕ ಎಂಬಂತೆ ಇಲ್ಲೊಂದು ಮನೆಯವರು ತಾವು ಸಾಕಿ ಸಲಹಿದ ಗೋವು ಮೃತಪಟ್ಟಾಗ ಗುಡಿ ಕಟ್ಟಿ ಪೂಜಿಸುತ್ತಿದ್ದಾರೆ.

ಕೆಳ ಹೊಸೂರಿನ ಸರಕಾರಿ ಶಾಲೆಯ ಮುಖ್ಯ ಶಿಕ್ಷಕಿ ಲಲಿತಾಚಂದ್ರ ಪಟಗಾರ ಮತ್ತು ಐಟಿಐ ಶಿಕ್ಷಕ ಶಿವಾನಂದಯ್ಯ ಹಿರೇಮಠ ದಂಪತಿ ತಾವು ಸಾಕಿ ಸಲಹಿದ ಗೋವು ವಯೋಸಹಜವಾಗಿ ಮೊನ್ನೆ ಗೋಕುಲಾಷ್ಟಮಿಯಂದೇ ಮೃತಪಟ್ಟಿತು. ಪುರೋಹಿತರನ್ನು ಕರೆಸಿ ಶಾಸ್ತ್ರೋಕ್ತವಾಗಿ ಅಂತ್ಯಸಂಸ್ಕಾರ ಪೂರೈಸಿದ ದಂಪತಿ ಅಷ್ಟಕ್ಕೇ ತಮ್ಮ ಹಸುವನ್ನು ಮರೆತುಬಿಡಲಿಲ್ಲ; ಬದಲಿಗೆ ಮನೆಯಂಗಳದಲ್ಲಿ ಅದಕ್ಕೊಂದು ಪುಟ್ಟ ಗುಡಿ ಕಟ್ಟಿಸಿ ಅದರ ಕರು ಸಹಿತವಾದ ಪಂಚಲೋಹದ ಮೂರ್ತಿಯನ್ನಿಟ್ಟು ಪೂಜಿಸಲಾರಂಭಿಸಿದ್ದಾರೆ. ಪ್ರತಿದಿನ ಬೆಳಗ್ಗೆ – ಸಂಜೆ ಪೂಜೆ ನಡೆಯುತ್ತದೆ. ಈ ಮೂಲಕ ಅಮೃತ ಸದೃಶ ಹಾಲನ್ನು ನೀಡಿ ನಮ್ಮನ್ನು ಸಲಹುವ ಗೋಮಾತೆ ಸಾವಿನ ಬಳಿಕವೂ ಪೂಜನೀಯ ಎಂಬುದನ್ನು ಈ ದಂಪತಿ ಸಾರಿದ್ದಾರೆ.