ಹಂತ್ರ ಹಿಡಿದು ಬಂದ ಹೇಮಂತ್‌

ಈ ಹಿಂದೆ “ಸ’ ಎಂಬ ಚಿತ್ರ ನಿರ್ದೇಶಿಸಿದ್ದ ಹೇಮಂತ್‌ ಹೆಗಡೆ, ಮತ್ತೆ ಯಾವ ಚಿತ್ರಕ್ಕೆ ಕೈ ಹಾಕಿದ್ದಾರೆ ಎಂಬ ಬಗ್ಗೆ ಗಾಂಧಿನಗರದಲ್ಲಿ ಒಂದು ಪ್ರಶ್ನೆ ಮೂಡಿತ್ತು. ಅದಕ್ಕೀಗ ಉತ್ತರ ಸಿಕ್ಕಿದೆ. ಹೇಮಂತ್‌ ಹೆಗಡೆ, ಈಗ ಸದ್ದಿಲ್ಲದೆಯೇ ಒಂದು ಸಿನಿಮಾ ನಿರ್ದೇಶನಕ್ಕೆ ಸಜ್ಜಾಗುತ್ತಿದ್ದಾರೆ. ಆ ಚಿತ್ರಕ್ಕೆ “ಹಂತ್ರ’ ಎಂದು ಹೆಸರಿಟ್ಟಿದ್ದಾರೆ.

 “ಹಂತ್ರ’ ಎಂಬುದು ಸಂಸ್ಕೃತ ಪದ. ನಿರ್ದೇಶಕ ಹೇಮಂತ್‌ ಹೇಳುವಂತೆ, “ಹಂತ್ರ’ ಅಂದರೆ “ಹಂಟರ್‌’ ಎಂಬರ್ಥವಂತೆ. ಈ ಚಿತ್ರಕ್ಕೆ ಕಥೆ, ಚಿತ್ರಕಥೆ ಬರೆದು ನಿರ್ದೇಶನದ ಜವಾಬ್ದಾರಿ ಹೊತ್ತಿದ್ದಾರೆ ಹೇಮಂತ್‌. ಇನ್ನು, ಎಕೆಕೆ ಎಂಟರ್‌ಟೈನ್‌ಮೆಂಟ್‌ ಬ್ಯಾನರ್‌ನಡಿ ಈ ಸಿನಿಮಾ ತಯಾರಾಗುತ್ತಿದೆ. ಚಿತ್ರಕ್ಕೆ ಕಥೆಯೇ ಮುಖ್ಯವಾಗಿದ್ದು, ಈಗಷ್ಟೇ ಪಾತ್ರವರ್ಗವನ್ನು ಆಯ್ಕೆ ಮಾಡುವಲ್ಲಿ ನಿರತರಾಗಿದ್ದಾರಂತೆ ಹೇಮಂತ್‌. ಅಂದಹಾಗೆ, ಸದ್ಯಕ್ಕೆ ಪಾರ್ವತಿ ನಾಯರ್‌ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ.

ಇದೊಂದು ಒಳ್ಳೆಯ ಸಿನಿಮಾ ಆಗುತ್ತೆ ಎಂಬ ವಿಶ್ವಾಸವಿದೆ. ಸಸ್ಪೆನ್ಸ್‌ ಥ್ರಿಲ್ಲರ್‌ ಕಥೆ ಹೊಂದಿರುವ ಈ ಚಿತ್ರ ನನ್ನ ವೃತ್ತಿ ಜೀವನದಲ್ಲಿ ಒಳ್ಳೆಯ ಸಿನಿಮಾ ಆಗಲಿದೆ’ ಎಂದು ಹೆಮ್ಮೆಯಿಂದ ಹೇಳಿಕೊಳ್ಳುವ ಹೇಮಂತ್‌ಹೆಗಡೆ, ಇಷ್ಟರಲ್ಲೇ ಉಳಿದ ಪಾತ್ರವರ್ಗ ಹಾಗೂ ತಂತ್ರಜ್ಞರ ಆಯ್ಕೆ ಮಾಡಿ, ಜೂನ್‌ 23ಕ್ಕೆ ಮುಹೂರ್ತ ನಡೆಸುವ ಉದ್ದೇಶವಿದೆ’ ಎಂದಷ್ಟೇ ಹೇಳುತ್ತಾರೆ ಹೇಮಂತ್‌.