ನರಗುಂದದಲ್ಲಿ ಗಾಳಿ-ಮಳೆ: ಜನಜೀವನ ಅಸ್ತವ್ಯಸ್ತ

ನರಗುಂದ: ತಾಲೂಕಿನಲ್ಲಿ ರವಿವಾರ ಸಂಜೆ ಗಾಳಿ ಮಳೆಯಾಗಿದ್ದು, ಪಟ್ಟಣದ ಕೆಲವೆಡೆ ಮರಗಳು ಧರೆಗುರುಳಿವೆ. ಪರಿಣಾಮ ಕೆಲವೆಡೆ ಮನೆಗಳಿಗೆ ಧಕ್ಕೆಯಾಗಿದ್ದು, ಜನಜೀವನ ಅಸ್ತವ್ಯಸ್ತಗೊಂಡಿದೆ.

ಸಂಜೆ 5ರ ಬಳಿಕ ಜೋರಾದ ಗಾಳಿ ಬೀಸುತ್ತಿದ್ದಂತೆ ಧೋ ಎಂದು ಮಳೆ ಸುರಿದಿದೆ. ಮಳೆಯೊಂದಿಗೆ ರಭಸದ ಗಾಳಿಗೆ ಪಟ್ಟಣದ ವಿನಾಯಕ ನಗರದಲ್ಲಿ ವಿದ್ಯುತ್‌ ಕಂಬವೊಂದು ಧರೆಗುರುಳಿದೆ. ಮೇಲಾಗಿ ಸವದತ್ತಿ ರಾಜ್ಯ ಹೆದ್ದಾರಿಗೆ ಹೊಂದಿಕೊಂಡ ಶಿವಕೃಪಾ ಖಾನಾವಳಿ ಮುಂಭಾಗ ಹೆದ್ದಾರಿಗೆ ಹೊಂದಿಕೊಂಡ ಅರಳಿ ಮರವೊಂದರ ದೊಡ್ಡ ಟೊಂಗೆಯೊಂದು ಮುರಿದು ಧರೆಗುರುಳಿದೆ. ಇದರಿಂದ ಸಂಚಾರ ಮೊಟಕುಗೊಂಡ ಪರಿಣಾಮ ಪಟ್ಟಣದ ಸ್ವಯಂ ಸೇವಕರು ಮತ್ತು ಸಾರ್ವಜನಿಕರು ಸೇರಿ ಮರದ ಟೊಂಗೆ ಬದಿಗೆ ಸರಿಸಿ ಸಂಚಾರಕ್ಕೆ ಅನುವು ಮಾಡಿಕೊಟ್ಟಿದ್ದಾರೆ.

ಮೇಲಾಗಿ ಪಟ್ಟಣದ ಕೆಲವೆಡೆ ಮಳೆಯಿಂದ ಚರಂಡಿಗಳು ತುಂಬಿ ರಸ್ತೆಗಳ ಮೇಲೆ ಹರಿದಿವೆ. ಕೆಲವೆಡೆ ಮನೆಗಳಿಗೆ ಚರಂಡಿ ನೀರು ಹೊಕ್ಕಿದ್ದು, ಸಾರ್ವಜನಿಕರು ಪರದಾಡಿದ್ದಾರೆ. ಗಾಳಿ ಸಹಿತ ಮಳೆಯಾಗುತ್ತಿದ್ದಂತೆ ವಿದ್ಯುತ್‌ ಕಡಿತಗೊಳಿಸಲಾಗಿದೆ. ಸಾಯಂಕಾಲದಿಂದ ಸಂಜೆ 9ರ ವರೆಗೂ ವಿದ್ಯುತ್‌ ಸಂಪರ್ಕ ಕಡಿತಗೊಳಿಸಲಾಗಿತ್ತು. ಇದರಿಂದ ಜನರು ಪರದಾಡುವಂತಾಯಿತು.

ಪಟ್ಟಣದ ಅರ್ಬನ್‌ ಓಣಿಯ ಕೇಸರಿಪ್ರಸಾದ ಸುಬೇದಾರ ಎಂಬುವರ ಮನೆ ಮುಂದಿದ್ದ ಮರವೊಂದು ಬೇರು ಸಮೇತ ಉರುಳಿ ಮನೆ ಮೇಲೆ ಬಿದ್ದಿದ್ದು, ಕುಂಚಿ ಕೊರವರ ಬಡಾವಣೆಯಲ್ಲಿ  ಟ್ರ್ಯಾಕ್ಟರ್ ಮೇಲೆ ಮರ ಉರುಳಿ ಬಿದ್ದಿದೆ. ಒಟ್ಟಾರೆ ಗಾಳಿ ಸಹಿತ ಮಳೆಯಿಂದ ಜನಜೀವನ ಅಸ್ತವ್ಯಸ್ತಗೊಂಡಿದ್ದು, ಯಾವುದೇ ಪ್ರಾಣಹಾನಿ ಸಂಭವಿಸಿಲ್ಲ.