ಮಗನಿಗೆ ಕೋವಿಡ್ ಸೋಂಕು ತಗುಲುವ ಭಯ! ಹೃದಯಾಘಾತದಿಂದ ತಾಯಿ ಬಲಿ

ವಿಜಯಪುರ : ಎರಡು ಬಾರಿ ಗಂಟಲು ದ್ರವ ಪರೀಕ್ಷೆ ಮಾಡಿಸಿದರೂ ತನ್ನ ಮಗನಿಗೆ ಜ್ವರ ಬಾಧಿಸುತ್ತಿದ್ದು, ಆಸ್ಪತ್ರೆಗೆ ದಾಖಲಾಗಿರುವ ತನ್ನ ಮಗನಿಗೆ ಕೋವಿಡ್ ಸೋಂಕು ತಗುಲುವ ಭಯದಲ್ಲಿ ತಾಯಿ ಹೃದಯಾಘಾತದಿಂದ ಮೃತಪಟ್ಟ ಘಟನೆ ವರದಿಯಾಗಿದೆ.

ಲಕ್ಷ್ಮೀಬಾಯಿ ರಾಮಸಿಂಗ್ ಜಾಧವ್ (70) ಹೃದಯಾಘಾತದಿಂದ ಮೃತಪಟ್ಟವರು. ತಮ್ಮ ಹಿರಿಯ ಮಗ ಆಶೋಕಕುಮಾರಗೆ ನಿಮೋನಿಯಾ ಜ್ವರ ಬಾಧಿಸಿದ್ದು, ನಗರದ ಖಾಸಗಿ ವೈದ್ಯಕೀಯ ಕಾಲೇಜಿನ ಆಸ್ಪತ್ರೆಗೆ ದಾಖಲಾಗಿದ್ದರು. ಇದಕ್ಕೂ ಮೊದಲು ಕುಟುಂಬದ ಎಲ್ಲ ಸದಸ್ಯರು ವಾರದ ಹಿಂದೆ ಗಂಟಲು ದ್ವರ ಪರೀಕ್ಷೆ ಮಾಡಿಸಿದ್ದು, ನೆಗೆಟಿವ್ ವರದಿ ಬಂದಿದ್ದವು. ಆದರೆ ಆಸ್ಪತ್ರೆಗೆ ದಾಖಲಾಗಿರುವ ತಮ್ಮ ಮಗನಿಗೆ ಕೋವಿಡ್ ಸೋಂಕು ತಗುಲುವ ಭಯದಲ್ಲಿ ತಾಯಿಗೆ ಹೃದಯಾಘಾತವಾಗಿ, ಆಸ್ಪತ್ರೆಗೆ ದಾಖಲಿಸಿದರೂ ಚಿಕಿತ್ಸೆ ಫಲಿಸದೇ ಮೃತಪಟ್ಟಿದ್ದಾರೆ ಎಂದು ಕುಟುಂಬ ಸದಸ್ಯ ಗುಲಾಬಚಂದ ಜಾಧವ ತಿಳಿಸಿದ್ದಾರೆ.