ತೇಜಸ್‌ ಎಕ್ಸ್‌ಪ್ರೆಸ್‌ ರೈಲಿನ ಯಾನಿಗಳಿಗೆ 20ರೂ.ಗಳಲ್ಲಿ ಹೆಡ್‌ಫೋನ್‌!

ಮುಂಬಯಿ: ಅತ್ಯಾಧುನಿಕ  ವ್ಯವಸ್ಥೆ  ಮತ್ತು  ಸೌಲಭ್ಯಗಳನ್ನು  ಒಳಗೊಂಡಿರುವ  ಐಷಾರಾಮಿ  ಪ್ರಯಾಣದ ತೇಜಸ್‌  ಎಕ್ಸ್‌ಪ್ರೆಸ್‌  ರೈಲಿನಲ್ಲಿ  ಪ್ರಯಾ ಣಿಸುವ  ಯಾನಿಗಳಿಗೆ  ಇನ್ನು  ಮುಂದೆ  20 ರೂ.ಗಳಿಗೆ  ಹೆಡ್‌ಫೋನ್‌ಗಳನ್ನು  ಒದಗಿಸಲು  ಇಂಡಿಯನ್‌  ರೈಲ್ವೇ ಕ್ಯಾಟರಿಂಗ್‌ ಆ್ಯಂಡ್‌  ಟೂರಿಸಂ  ಕಾರ್ಪೊರೇಶನ್‌(ಐಆರ್‌ಸಿಟಿಸಿ) ತೀರ್ಮಾನಿದೆ. 

ಈವರೆಗೆ ಐಆರ್‌ಸಿಟಿಸಿ  ತೇಜಸ್‌ ಎಕ್ಸ್‌ಪ್ರೆಸ್‌  ರೈಲಿನ ಯಾನಿಗಳಿಗೆ  ಈ ಹಿಂದೆ  ಬಳಕೆ ಮಾಡಿದ  ಹೆಡ್‌ಪೋನ್‌ಗಳನ್ನು  ಉಚಿತವಾಗಿ  ಒದಗಿಸುತ್ತಿತ್ತು. ಪ್ರಯಾಣದ  ಆರಂಭದಲ್ಲಿ ಯಾನಿಗಳಿಗೆ  ಹೆಡ್‌ಫೋನ್‌ಗಳನ್ನು  ಒದಗಿಸಲಾದರೆ  ಯಾನದ ಕೊನೆಯಲ್ಲಿ  ಅವರಿಂದ  ಅವುಗಳನ್ನು  ವಾಪಾಸು ಪಡೆದುಕೊಳ್ಳಲಾಗುತ್ತಿತ್ತು.  ಆದರೆ  ಈ ಹೆಡ್‌ಫೋನ್‌ಗಳ ಶುಚಿತ್ವದ  ಬಗೆಗೆ  ಯಾನಿಗಳಿಂದ  ದೂರುಗಳು  ಬಂದ  ಹಿನ್ನೆಲೆಯಲ್ಲಿ  ಐಆರ್‌ಸಿಟಿಸಿ  ಪ್ರತಿಯೋರ್ವ  ಯಾನಿಯಿಂದ  20ರೂ.ಗಳನ್ನು  ಹೆಚ್ಚುವರಿಯಾಗಿ  ಪಡೆದು  ಹೆಡ್‌ಫೋನ್‌ಗಳನ್ನು  ಒದಗಿಸುವ  ತೀರ್ಮಾನಕ್ಕೆ  ಬಂದಿದೆ. ಜುಲೈನಿಂದ  ಈ ಹೊಸ  ವ್ಯವಸ್ಥೆ  ಜಾರಿಗೆ ತರಲು ನಿಗಮ ನಿರ್ಧರಿಸಿದೆ. 

ತೇಜಸ್‌  ಎಕ್ಸ್‌ಪ್ರೆಸ್‌  ರೈಲಿನ  ಸಂಚಾರ  ಆರಂಭಗೊಂಡ  ಸಂದರ್ಭದಲ್ಲಿ  ಯಾನಿಗಳಿಗೆ  200ರೂ. ಬೆಲೆಯ  ಹೆಡ್‌ಫೋನ್‌ಗಳನ್ನು  ಒದಗಿಸಲಾಗಿತ್ತು. ಆದರೆ  ಮೊದಲ  ಸಂಚಾರದ  ವೇಳೆ ಹಲವಾರು ಹೆಡ್‌ಫೋನ್‌ಗಳು  ಕಳವಾದ  ಹಿನ್ನೆಲೆಯಲ್ಲಿ  ಆ ಬಳಿಕ  ಕಡಿಮೆ ಗುಣಮಟ್ಟದ  30ರೂ. ಬೆಲೆಯ  ಹೆಡ್‌ಫೋನ್‌ಗಳನ್ನು  ನೀಡಲು  ಯಾನಿಗಳಿಗೆ  ಒದಗಿಸುತ್ತಾ ಬರಲಾಗಿದೆ.