ನವದೆಹಲಿ: ಹೈದರಾಬಾದ್ ನಿಂದ ದೆಹಲಿಗೆ ಇಂಡಿಗೋ ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದ ವ್ಯಕ್ತಿಯೊಬ್ಬ ಮಹಿಳೆಯೊಬ್ಬರಿಗೆ ಲೈಂಗಿಕ ಕಿರುಕುಳ ನೀಡಿದ್ದ ಆರೋಪದಡಿಯಲ್ಲಿ ದೆಹಲಿಯ ಇಂದಿರಾಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಪೊಲೀಸರು ಬಂಧಿಸಿರುವ ಘಟನೆ ನಡೆದಿದೆ.
ವಿಮಾನದೊಳಗೆ ಪ್ಯಾಂಟ್ ಜಿಪ್ ಕಳಚಿದ್ದ…
ಮಹಿಳೆಯ ದೂರಿನ ಪ್ರಕಾರ, ಹೈದರಾಬಾದ್ ದೆಹಲಿ ಪ್ರಯಾಣದ ವಿಮಾನವನ್ನೇರಿ ಸೀಟ್ ನಲ್ಲಿ ಕುಳಿತಾಗ ತನ್ನ ಪಕ್ಕದ ಸೀಟಿನಲ್ಲಿ ವ್ಯಕ್ತಿಯೊಬ್ಬರು ಬಂದು ಕುಳಿತಿದ್ದರು. ತಕ್ಷಣವೇ ಆ ವ್ಯಕ್ತಿ ವಿಮಾನ ಹಾರಾಟ ನಡೆಸುತ್ತಿದ್ದಾಗಲೇ ಪ್ಯಾಂಟ್ ಜಿಪ್ ತೆಗೆದು ಮುಷ್ಠಿ ಮೈಧುನ ಮಾಡಿಕೊಳ್ಳತೊಡಗಿರುವುದಾಗಿ ಆರೋಪಿಸಿದ್ದಾರೆ.
ತನ್ನೊಂದಿಗೆ ಅಸಭ್ಯವಾಗಿ ವರ್ತಿಸಿರುವುದಾಗಿ ದೂರಿರುವ ಮಹಿಳೆ, 56 ವರ್ಷ ಪ್ರಾಯದ ವ್ಯಕ್ತಿ ಮುಷ್ಠಿಮೈಥುನ ಮಾಡಿಕೊಳ್ಳುತ್ತಿರುವುದನ್ನು ಗಮನಿಸಿ ಕೂಡಲೇ ಏರ್ ಲೈನ್ ಸಿಬ್ಬಂದಿಯವರ ಗಮನಕ್ಕೆ ತಂದು ತನ್ನ ಸೀಟನ್ನು ಬದಲಾಯಿಸುವಂತೆ ಮನವಿ ಮಾಡಿಕೊಂಡಿರುವುದಾಗಿ ವರದಿ ತಿಳಿಸಿದೆ.
ಈ ಸಂದರ್ಭದಲ್ಲಿ ವ್ಯಕ್ತಿ ತಾನು ಕ್ಲೀನ್ ಮಾಡಿಕೊಳ್ಳಲು ಶೌಚಾಲಯಕ್ಕೆ ಹೋಗಿ ಬರಬೇಕು ಎಂದು ಏರ್ ಲೈನ್ ಸಿಬ್ಬಂದಿಯವರ ಬಳಿ ಕೇಳಿಕೊಂಡಿರುವುದಾಗಿ ವರದಿ ವಿವರಿಸಿದೆ. ವಿಮಾನ ದೆಹಲಿ ವಿಮಾನ ನಿಲ್ದಾಣದಲ್ಲಿ ಲ್ಯಾಂಡ್ ಆದ ಬಳಿಕ ಮಹಿಳೆ ಪೊಲೀಸರಿಗೆ ವ್ಯಕ್ತಿಯ ವಿರುದ್ಧ ದೂರು ಕೊಟ್ಟಿದ್ದರು.
ವ್ಯಕ್ತಿಯನ್ನು ರೋಹಿಣಿ ನಿವಾಸಿ ರಮೇಶ್ ಚಾಂದ್(56) ಎಂದು ಗುರುತಿಸಲಾಗಿದೆ. ಐಪಿಸಿ ಸೆಕ್ಷನ್ 509, 345ಎ ಕಲಂ ಪ್ರಕಾರ ಬಂಧಿಸಿರುವುದಾಗಿ ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.
