ಹಣದ ವಿಚಾರಕ್ಕೆ ಸ್ನೇಹಿತನನ್ನೇ ಕೊಂದ

ಬೆಂಗಳೂರು: ರಾಜಗೋಪಾಲ್‌ನಗರದಲ್ಲಿ ಕ್ಷುಲ್ಲಕ ಕಾರಣಕ್ಕೆ ಸ್ನೇಹಿತನೇ ಮಾರಕಾಸ್ತ್ರಗಳಿಂದ ಹಲ್ಲೆ ನಡೆಸಿ ವ್ಯಕ್ತಿಯನ್ನು ಕೊಂದ ಘಟನೆ ಜರುಗಿದೆ. ಹೇಮಂತ್‌ ಮೃತ ವ್ಯಕ್ತಿ. ಮುತ್ತುರಾಜ್‌ ಕೊಲೆ ಮಾಡಿದವ. ಹೇಮಂತ್‌ ಮತ್ತು ಮುತ್ತುರಾಜ್‌ ಒಂದೇ ಹೋಟೆಲ್‌ ನೌಕರರು.

ಸೋಮವಾರ ಸಂಜೆ 4.30ಕ್ಕೆ ಎಂದಿನಂತೆ ಚಾಮುಂಡಿನಗರದಲ್ಲಿ ಜತೆಯಲ್ಲೆ ಕಾಫಿ ಕುಡಿಯಲೆಂದು ಇತರ ಸ್ನೇಹಿತರೊಂದಿಗೆ ತೆರಳಿದ್ದರು. ಈ ವೇಳೆ ಹಣಕಾಸಿನ ಸಂಬಂಧ ಇಬ್ಬರ ನಡುವೆ ಮಾತಿಗೆ ಮಾತು ಬೆಳೆದು ಜಗಳ ತಾರಕಕ್ಕೇರಿದೆ.

ಮುತ್ತುರಾಜ್‌ ತನ್ನ ಸ್ನೇಹಿತರೊಂದಿಗೆ ಸೇರಿಕೊಂಡು ಮಾರಕಾಸ್ತ್ರದಿಂದ ಹೇಮಂತ್‌ ಮೇಲೆ ಹಲ್ಲೆ ನಡೆಸಿ ಪರಾರಿಯಾಗಿದ್ದಾನೆ. ಹೇಮಂತ್‌ ರಕ್ತದ ಮಡುವಿನಲ್ಲಿ ಬಿದ್ದು ಒದ್ದಾಡುತ್ತಿರವುದನ್ನು ಕಂಡ ಸ್ಥಳೀಯರು ಕೂಡಲೇ ಆತನನ್ನು ಖಾಸಗಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ.

ಚಿಕಿತ್ಸೆ ಫ‌ಲಿಸದೆ  ಹೇಮಂತ್‌ ಸೋಮವಾರ ಸಂಜೆ ಅಸುನೀಗಿದ್ದಾನೆ. ಆರೋಪಿ ಚಾಕುವಿನಿಂದ ಹೇಮಂತ್‌ಗೆ ಎರಡು ಬಾರಿ ಇರಿದಿದ್ದಾನೆ ಎಂದು ಪ್ರತ್ಯಕ್ಷದರ್ಶಿಗಳು ಪೊಲೀಸರಿಗೆ ತಿಳಿಸಿದ್ದು, ರಾಜಗೋಪಾಲನಗರ ಠಾಣೆಯಲ್ಲಿ ದೂರು ದಾಖಲಾಗಿದೆ. ತಲೆಮರೆಸಿಕೊಂಡಿರುವ ಮುತ್ತುರಾಜ್‌ಗಾಗಿ  ತನಿಖೆ ಮುಂದುವರಿದೆ.