ಎಚ್‌ಡಿಡಿ ಅವಮಾನ: ಕ್ರಮಕ್ಕೆ ಆಗ್ರಹಿಸಿ ಜೆಡಿಎಸ್‌ ಪ್ರತಿಭಟನೆ

ಧಾರವಾಡ: ಮಾಜಿ ಪ್ರಧಾನಿ ಎಚ್‌.ಡಿ. ದೇವೇಗೌಡ ಅವರ ಕುರಿತಾಗಿ ಸಾಮಾಜಿಕ ಜಾಲತಾಣ ಫೇಸ್‌ ಬುಕ್‌ನಲ್ಲಿ “ದೇಶದ್ರೋಹಿ ದೇವೇಗೌಡ್ರು’ ಎಂದು ಅವಹೇಳನಕಾರಿಯಾಗಿ ಬರೆದು ಪೋಸ್ಟ್‌ ಮಾಡಿದ ಬಿಜೆಪಿ ಕಾರ್ಯಕರ್ತ ಜಗದೀಶಗೌಡ ಗುಡ್‌ ಎಂಬುವರ ಮೇಲೆ ಐಪಿಸಿ 499ರ ಅಡಿ ಮಾನಹಾನಿ ಪ್ರಕರಣ ದಾಖಲಿಸುವಂತೆ ಒತ್ತಾಯಿಸಿ ಜೆಡಿಎಸ್‌ ಕಾರ್ಯಕರ್ತರು ನಗರದ ಡಿಸಿ ಕಚೇರಿ ಎದುರು ಗುರುವಾರ ಪ್ರತಿಭಟನೆ ನಡೆಸಿದರು. 

ಜಗದೀಶಗೌಡ ಗುಡ್‌ ಎಂಬ ಹೆಸರಿನಡಿಯಲ್ಲಿ ಫೇಸ್‌ಬುಕ್‌ ಖಾತೆ ಹೊಂದಿರುವ ಈ ಬಿಜೆಪಿ ಕಾರ್ಯಕರ್ತ ದೇವೇಗೌಡರು ದೇಶದ್ರೋಹಿ ಎಂದು ಬರೆದು ಪೋಸ್ಟ್‌ ಮಾಡಿದ್ದಾನೆ. ಇದು ರೈತರ ಹಾಗೂ  ಬಡವರ ಬಗ್ಗೆ ಕಾಳಜಿಯುಳ್ಳ ದೇವೇಗೌಡರಿಗೆ ಮಾಡಿದ ದೊಡ್ಡ ಅಪಮಾನ. 

ಅವರ ಚಾರಿತ್ರ ವಧೆ ಮಾಡುವ ಸಲುವಾಗಿ ಈ ಬಿಜೆಪಿ ಕಾರ್ಯಕರ್ತ ಈ ರೀತಿ ಮಾಡಿದ್ದಾನೆ. ಆದ್ದರಿಂದ ರಾಜ್ಯ ಸರ್ಕಾರ ಈ ಜಗದೀಶಗೌಡನನ್ನು ತನಿಖೆಗೆ ಒಳಪಡಿಸಿ ಆತನ ಮೇಲೆ ಐಪಿಸಿ 499ರ ಅಡಿ ಮಾನಹಾನಿ ಮೊಕದ್ದಮೆ ದಾಖಲಿಸಿ ಕಾನೂನು ಕ್ರಮಕೈಗೊಳ್ಳಬೇಕು ಎಂದು ಜಿಲ್ಲಾಧಿಕಾರಿ ಮೂಲಕ ಗೃಹ ಸಚಿವರಿಗೆ ಸಲ್ಲಿಸಿರುವ ಮನವಿಯಲ್ಲಿ ಆಗ್ರಹಿಸಲಾಗಿದೆ. 

ಸುರೇಶ ಹಿರೇಮಠ, ಬಸವರಾಜ ಭಜಂತ್ರಿ,  ರಾಜು ಅಂಬೋರೆ, ಅಲ್ತಾಫ್‌ ಕಿತ್ತೂರ, ಶಾಂತವೀರ ಬೆಟಗೇರಿ, ಪ್ರಕಾಶ ದೊಡವಾಡ, ಮಕು ಸೊಗಲದ, ರಾಜು ಚೌಧರಿ, ನವೀದ್‌ ಮುಲ್ಲಾ, ರಕ್‌ ಚೌಹಾಣ, ಬಿ.ಎಚ್‌. ದ್ಯಾವನೂರ ಸೇರಿದಂತೆ ಅನೇಕ ಕಾರ್ಯಕರ್ತರು ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.