ಹಳಕರ್ಟಿ ಗ್ರಾಪಂ ಕಡತ ಕಳವು: ಠಾಣೆಗೆ ದೂರು

ವಾಡಿ: ಸಮೀಪದ ಹಳಕರ್ಟಿ ಗ್ರಾಪಂ ಆಡಳಿತಕ್ಕೆ ಸಂಬಂಧಿಸಿದ ಮಹತ್ವದ ನೂರಾರು ದಾಖಲೆಗಳನ್ನು ಪಂಚಾಯಿತಿ ಬಿಲ್‌ ಕಲೆಕ್ಟರ್‌ ಸಂಬಂಧಿಯೇ ಹಾಡಹಗಲೇ ಕದ್ದೊಯ್ದ ಘಟನೆ ನಡೆದಿದ್ದು, ಸಿಸಿ ಕ್ಯಾಮೆರಾ ದೃಶ್ಯಾವಳಿಗಳಿಂದ ಕಳ್ಳರ ಕೃತ್ಯ ಬಯಲಾಗಿದೆ.

ಈ ಕುರಿತು ಪೊಲೀಸ್‌ ಠಾಣೆಗೆ ದೂರು ನೀಡಿರುವ ಹಳಕರ್ಟಿ ಗ್ರಾಪಂ ಅಧ್ಯಕ್ಷ ಸೋಮು ಚವ್ಹಾಣ ಹಾಗೂ ಪಿಡಿಒ ರಾಚಯ್ಯಸ್ವಾಮಿ ಕಚೇರಿಯ ಅಲಮಾರಿಯಲ್ಲಿ ಸುರಕ್ಷಿತವಾಗಿ ಇಟ್ಟಿದ್ದ ಬಹುತೇಕ ಕಡತಗಳು ನಾಪತ್ತೆಯಾಗಿದ್ದವು. ವಿವಿಧ ಯೋಜನೆಗಳಿಗೆ ಸಂಬಂಧಿಸಿದ ಲೆಕ್ಕಪತ್ರದ ದಾಖಲೆಗಳು ಕಾಣೆಯಾಗಿದ್ದಕ್ಕೆ ಸಿಸಿ ಕ್ಯಾಮೆರಾ ಪರಿಶೀಲಿಸಲಾಯಿತು. ಬಿಲ್‌ ಕಲೆಕ್ಟರ್‌ ಮಹೆಬೂಬ್‌ ಲಾಲಹ್ಮದ್‌ ಎನ್ನುವರ ಸಹೋದರ ಶಹಾರುಕ್‌ ಲಾಲಅಹ್ಮದ್‌ ಎಂಬಾತ ಕಡತಗಳನ್ನು ಚೀಲದಲ್ಲಿ ತುಂಬಿ ಹೊತ್ತೂಯ್ದದ ಕುರಿತು ಸುಳಿವು ದೊರಕಿದೆ.

ಅಧ್ಯಕ್ಷರು ಮತ್ತು ಅಭಿವೃದ್ಧಿ ಅಧಿಕಾರಿ ಗಮನಕ್ಕಿಲ್ಲದೇ ಕಡತಗಳನ್ನು ಕಳವು ಮಾಡಿರುವುದು ಅನುಮಾನಕ್ಕೆ ಕಾರಣವಾಗಿದೆ. ಯಾವ ಹಗರಣದ ಸಾಕ್ಷಿಗಳನ್ನು ನಾಶಪಡಿಸಲು ಬಿಲ್‌ ಕಲೆಕ್ಟರ್‌ ಕಡತ ಕಳ್ಳತನಕ್ಕೆ ಮುಂದಾದರೋ ಗೊತ್ತಿಲ್ಲ ಎಂದು ಪೊಲೀಸರಿಗೆ ನೀಡಿದ ದೂರಿನಲ್ಲಿ ವಿವರಿಸಿದ್ದಾರೆ.

ಕದ್ದುಮುಚ್ಚಿ ಕಡತಗಳನ್ನು ಚೀಲದಲ್ಲಿ ತುಂಬಿ ಹೊತ್ತೂಯ್ದ ಕಳ್ಳ ಸಿಸಿ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ದಾಖಲೆಗಳನ್ನು ಸಾಕ್ಷಿಯಾಗಿಟ್ಟುಕೊಂಡು ತನಿಖೆ ನಡೆಸಬೇಕು. ಕಡತಗಳನ್ನು ವಶಕ್ಕೆ ಪಡೆದು ಆರೋಪಿತರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಠಾಣಾಧಿಕಾರಿಯಲ್ಲಿ ಮನವಿ ಮಾಡಿದ್ದಾರೆ.