ಎಚ್‌1ಎನ್‌1: ಎರಡು ದಿನದಲ್ಲಿ 10 ಮಂದಿ ಸಾವು

ಲಕ್ನೋ: ಉತ್ತರಪ್ರದೇಶದಲ್ಲಿ ಹಂದಿ ಜ್ವರ(ಎಚ್‌1ಎನ್‌1)ದ ಆತಂಕ ಎದುರಾಗಿದ್ದು, ಇಲ್ಲಿನ ಮೀರತ್‌ನಲ್ಲಿ ಕೇವಲ ಎರಡೇ ದಿನಗಳ ಅವಧಿಯಲ್ಲಿ 10 ಮಂದಿ ಈ ಕಾಯಿಲೆಗೆ ಬಲಿಯಾಗಿದ್ದಾರೆ.

ಮೀರತ್‌ವೊಂದರಲ್ಲೇ ಕನಿಷ್ಠ 71 ಮಂದಿಗೆ ಸೋಂಕು ತಗುಲಿದ್ದು, ಈ ಪೈಕಿ 17 ಮಂದಿ ಯೋಧರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಮೀರತ್‌ ಹೊರತುಪಡಿಸಿದರೆ, ರಾಜ್ಯದ ಇತರೆ ಪ್ರದೇಶಗಳಲ್ಲಿ ಒಟ್ಟಾರೆ 25 ಹಂದಿ ಜ್ವರದ ಪ್ರಕರಣಗಳು ಪತ್ತೆಯಾಗಿವೆ. ಎಚ್‌1ಎನ್‌1 ಪ್ರಕರಣಗಳ ಸಂಖ್ಯೆ ಏರಿಕೆಯಾಗುತ್ತಿರುವ ಹಿನ್ನೆಲೆಯಲ್ಲಿ ರಾಜ್ಯ ಸರ್ಕಾರವು ಮೀರತ್‌ಗೆ ಮೂವರು ಸದಸ್ಯರಿರುವ ತಜ್ಞರ ತಂಡವನ್ನು ಮೀರತ್‌ಗೆ ಕಳುಹಿಸಿದೆ. ಜತೆಗೆ ಸೋಕಿಂತರನ್ನು ಪ್ರತ್ಯೇಕ ವಾರ್ಡ್‌ನಲ್ಲಿ ಇರಿಸಲಾಗುತ್ತಿದೆ. ಆಸ್ಪತ್ರೆಗಳಲ್ಲಿ ಹಾಸಿಗೆಗಳ ಸಂಖ್ಯೆ ಹೆಚ್ಚಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.