ಜಿಎಸ್‌ಟಿ ಪರಿಹಾರ: ರಾಜ್ಯಕ್ಕೆ ಹೆಚ್ಚು

ನವದೆಹಲಿ: ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಜಾರಿಯಿಂದ ನಷ್ಟ ಹೊಂದಿರುವ ರಾಜ್ಯಗಳಿಗೆ ಕೇಂದ್ರ ಸರ್ಕಾರ 24,500 ಕೋಟಿ ರೂ. ಪರಿಹಾರ ಬಿಡುಗಡೆ ಮಾಡಿದೆ. 

ಈ ಪೈಕಿ ಕರ್ನಾಟಕಕ್ಕೆ ಹೆಚ್ಚಿನ ಮೊತ್ತ, ಅಂದರೆ 3,271 ಕೋಟಿ ರೂ. ಸಿಗಲಿದೆ. ಕೇಂದ್ರ ಹಣಕಾಸು ಖಾತೆ ಸಹಾಯಕ ಸಚಿವ ಶಿವಪ್ರತಾಪ್‌ ಶುಕ್ಲಾ ಲೋಕಸಭೆಗೆ ನೀಡಿದ ಲಿಖೀತ ಉತ್ತರದಲ್ಲಿ ಈ ಮಾಹಿತಿ ನೀಡಿದ್ದಾರೆ. 

ಜುಲೈನಿಂದ ಅಕ್ಟೋಬರ್‌ಗೆ ಸಂಬಂಧಿಸಿದ ಮೊತ್ತ ಇದಾಗಿದೆ. ಗುಜರಾತ್‌ಗೆ 2,282 ಕೋಟಿ ರೂ., ಪಂಜಾಬ್‌ಗ 2,098 ಕೋಟಿ ರೂ. ಸಿಗಲಿದೆ ಎಂದು ಅವರು ಹೇಳಿದ್ದಾರೆ. ಸರಕು ಮತ್ತು ಸೇವಾ ತೆರಿಗೆ ಜಾರಿ ಮಾಡುವುದಕ್ಕೆ ಮೊದಲು ಸೆಸ್‌ ಸಂಗ್ರಹವೂ ಜಾರಿಯಲ್ಲಿದ್ದುದರಿಂದ ಹೊಸ ವ್ಯವಸ್ಥೆ ಬಂದ ಬಳಿಕ ಸಂಗ್ರಹವಾಗುವ ತೆರಿಗೆಯ ಒಟ್ಟು ಮೊತ್ತದ ಮೇಲೆ ಪರಿಣಾಮ ಬೀರುವುದಿಲ್ಲ ಎಂದಿದ್ದಾರೆ. ಜಿಎಸ್‌ಟಿ ಜಾರಿ ಬಳಿಕ ಲಾಭಕೋರತನದ ವಿರುದ್ಧ ಒಟ್ಟು 169 ಕೇಸುಗಳು ದಾಖಲಾಗಿವೆ ಎಂದರು.