ಬಾಡಿಗೆದಾರರು 18% ಜಿ ಎಸ್ ಟಿ ಪಾವತಿಸಬೇಕೆ ? ಏನಿದರ ಸತ್ಯಾಂಶ…

ಹೊಸದಿಲ್ಲಿ: ಜಿ ಎಸ್ ಟಿ ಯ ಹೊಸ ನಿಯಮಗಳ ಕುರಿತಾಗಿ ಹಬ್ಬುತ್ತಿರುವ ಗಾಳಿಸುದ್ದಿಯ ಬಗ್ಗೆ ಕೇಂದ್ರ ಸರ್ಕಾರವು ಸ್ಪಷ್ಟನೆಯನ್ನು ನೀಡಿದೆ. ಬಾಡಿಗೆ ಮನೆಗಳ  ವಿಚಾರಕ್ಕೆ ಸಂಬಂಧಿಸಿದಂತೆ ಜೊತೆಗೆ ಪಾವತಿಸುವ ತೆರಿಗೆಯ ಬಗ್ಗೆ ಹಲವು ತಪ್ಪು ತಿಳುವಳಿಕೆಗಳಿದ್ದವು. ಅದನ್ನು ನಿವಾರಿಸುವ ಪ್ರಯತ್ನ ಸರ್ಕಾರ ಮಾಡಿದೆ.

ಬಾಡಿಗೆ ಮನೆಗಳ ಮೇಲಿನ ಹೊಸ ಜಿಎಸ್‌ಟಿ ನಿಯಮ ಜುಲೈ 18 ರಿಂದ ಜಾರಿಗೆ ಬಂದಿದೆ. ಆ ನಂತರ ಬಾಡಿಗೆದಾರರು ಮನೆ ಬಾಡಿಗೆಗೆ 18% ಜಿಎಸ್‌ಟಿ ಪಾವತಿಸಬೇಕಾಗುತ್ತದೆ ಎಂಬ ಸುದ್ದಿಗಳು ಜನರಲ್ಲಿ ಗೊಂದಲ ಮೂಡಿಸಿದ್ದವು.

ಇವುಗಳ ಬಗ್ಗೆ ಸ್ಪಷ್ಟನೆ ನೀಡಿದ ಸರ್ಕಾರ, ವಸತಿ ಘಟಕವನ್ನು ವ್ಯಾಪಾರ ಉದ್ದೇಶದಿಂದ ಬಾಡಿಗೆಗೆ ನೀಡಿದಾಗ ಮಾತ್ರ ತೆರಿಗೆ ವಿಧಿಸಲಾಗುತ್ತದೆ ಎಂದು ಟ್ವೀಟ್ ಮಾಡಿದೆ.

 

ಬಾಡಿಗೆ ಮೇಲಿನ ಜಿಎಸ್‌ಟಿಗೆ ಸಂಬಂಧಿಸಿದಂತೆ ಪ್ರೆಸ್ ಟ್ರಸ್ಟ್ ಆಫ್ ಇಂಡಿಯಾ ಮೂರು ಪ್ರಮುಖ ವಿಷಯಗಳನ್ನು ಪಟ್ಟಿ ಮಾಡಿದೆ. ಅವುಗಳೆಂದರೆ,

— ವ್ಯಾಪಾರ ಘಟಕವಾಗಿ ಬಾಡಿಗೆ ನೀಡಿದಾಗ ಮಾತ್ರ ವಸತಿ ಘಟಕದ ಬಾಡಿಗೆಗೆ ತೆರಿಗೆ ವಿಧಿಸಲಾಗುತ್ತದೆ.

— ವೈಯಕ್ತಿಕ ಬಳಕೆಗಾಗಿ ಖಾಸಗಿ ವ್ಯಕ್ತಿಗೆ ಬಾಡಿಗೆಗೆ ನೀಡಿದಾಗ ಜಿ ಎಸ್ ಟಿ ವಿಧಿಸಲಾಗುವುದಿಲ್ಲ.

— ಸಂಸ್ಥೆಯ ಮಾಲೀಕರು ಅಥವಾ ಪಾಲುದಾರರು ವೈಯಕ್ತಿಕ ಬಳಕೆಗಾಗಿ ನಿವಾಸವನ್ನು ಬಾಡಿಗೆಗೆ ಪಡೆದಿದ್ದರೂ ಸಹ ಯಾವುದೇ ಜಿ ಎಸ್ ಟಿ ಇಲ್ಲ.

ಇದರ ಜೊತೆಗೆ ವೈರಲ್ ಸಂದೇಶವಾಗಿ ಕಳುಹಿಸಲಾದ ಯಾವುದೇ ಅನುಮಾನಾಸ್ಪದ ಲಿಂಕ್‌ಗಳನ್ನು ಜನರು ಕ್ಲಿಕ್ ಮಾಡಬಾರದು ಎಂದು ಪ್ರೆಸ್ ಟ್ರಸ್ಟ್ ಆಫ್ ಇಂಡಿಯಾ ನಾಗರಿಕರಿಗೆ ಸಲಹೆ ನೀಡಿದೆ.