ಶಿವಮೊಗ್ಗ: ಜಿಎಸ್‌ಟಿ ಜಾರಿಗೆ ಬರುತ್ತಿದ್ದಂತೆ ಇಲ್ಲಿನ ಅಡಿಕೆ ವಲಯ ಮಾತ್ರ ಅಕ್ಷರಶಃ ಗೊಂದಲಕ್ಕೆ ಈಡಾಗಿದೆ. ಹೀಗಾಗಿ ಮೊದಲ ದಿನ ಯಾವುದೇ ವಹಿವಾಟು ಇಲ್ಲಿ ನಡೆಯಲಿಲ್ಲ. ಇಡೀ ಉದ್ಯಮ ಕಾದು ನೋಡುವ ತಂತ್ರಕ್ಕೆ ಮೊರೆ ಹೋಗಿದೆ.
ಜಿಎಸ್‌ಟಿಯಲ್ಲಿ ಅಡಿಕೆ ಕುರಿತಾಗಿ ಯಾವುದೇ ರೀತಿಯಲ್ಲಿ ಸ್ಪಷ್ಟವಾಗಿ ಹೇಳದೆ ಇರುವುದೇ ಈ ಆತಂಕಕ್ಕೆ ಕಾರಣವಾಗಿದೆ. ಜಿಎಸ್‌ಟಿ ಅಡಿಯಲ್ಲಿ ಅಡಿಕೆಗೆ ಯಾವ ಹಂತದ ತೆರಿಗೆ ಬೀಳುತ್ತದೆ ಎಂಬ ಗೊಂದಲ ವರ್ತಕರಲ್ಲಿದೆ. ಈ ಕುರಿತು ವರ್ತಕರು ಸ್ಪಷ್ಟನೆಗೆ ಯತ್ನಿಸಿದರೂ ಎಲ್ಲಿಂದಲೂ ಯಾವುದೇ ರೀತಿಯ ನಿಖರ ಉತ್ತರ ಸಿಗುತ್ತಿಲ್ಲ ಎಂಬ ದೂರು ಕೇಳಿ ಬರುತ್ತಿದೆ.
ಹಣ್ಣಡಿಕೆಯನ್ನು ಒಣಗಿಸಿ ಇಟ್ಟರೆ ಅದಕ್ಕೆ ತೆರಿಗೆಯಿಲ್ಲ. ಅದನ್ನು ಸುಲಿದರೆ ಶೇ.5 ರಷ್ಟು ತೆರಿಗೆ ವಿಧಿಸಲಾಗಿದೆ. ಇದರೊಂದಿಗೆ ಒಣ ಹಣ್ಣಿಗೆ ಶೇ.12ರಷ್ಟು ತೆರಿಗೆ ವಿಧಿಸಿದ್ದು, ಒಣಗಿಸಿದ ಅಡಿಕೆ ಇದರಡಿ ಬರುವುದರಿಂದ ಇದಕ್ಕೆ ಶೇ.12 ರಷ್ಟು ತೆರಿಗೆ ಎಂದು ವ್ಯಾಖ್ಯಾನಿಸುತ್ತಿದ್ದಾರೆ. ಒಣ ಅಡಿಕೆ ಎಂದರೆ ಹಣ್ಣಡಿಕೆ ಒಣಗಿಸಿ ಬಳಿಕ ಸುಲಿದ ಚಾಲಿ. ಇದಕ್ಕೆ ಶೇ.5 ರಷ್ಟು ತೆರಿಗೆ ಇದೆ.
ಆದರೆ, ಕೆಂಪಡಿಕೆಯನ್ನು ಹಸಿ ಇರುವಾಗಲೇ ಸುಲಿದು, ಬಳಿಕ ಜೊಗರಿನಲ್ಲಿ ಬೇಯಿಸಲಾಗುತ್ತದೆ. ಆಗ ಇದು ಸಂಸ್ಕರಿತ ಅಡಿಕೆಯಾಗತ್ತದೆ. ಆಗ ಇದಕ್ಕೆ ಬೇರೆಯದೇ ತೆರಿಗೆ ಎಂದು ಕೆಲವರು ವ್ಯಾಖ್ಯಾನಿಸುತ್ತಿದ್ದಾರೆ. ಈ ನಡುವೆ ಸಿಪ್ಪೆ ತೆಗೆಯದ ಒಣಗಿದ ಅಡಿಕೆಗೆ ಶೂನ್ಯ ಜಿಎಸ್‌ಟಿ ಇದೆ. ಅಡಿಕೆಯಲ್ಲಿ ಎರಡು ವಿಧದ ವರ್ಗಿàಕರಣ ಮಾತ್ರ ಮಾಡಿ ಕೋಡ್‌ ನೀಡಲಾಗಿದೆ. ಆದರೆ, ಅಡಿಕೆಯಲ್ಲಿ ತರೇಹವಾರಿ ಅಡಿಕೆಯಿದ್ದು, ಒಂದೊಂದು ಅಡಿಕೆ ಮಾದರಿಗೂ ಒಂದೊಂದು ರೀತಿಯ ಧಾರಣೆ ಇದೆ. ಈ ಧಾರಣೆಯಲ್ಲಿ ಕೂಡ ಅಗಾಧ ವ್ಯತ್ಯಾಸವಿದೆ. ಹೀಗಾಗಿ ವರ್ತಕರಲ್ಲಿ ಗೊಂದಲ ಕಾಣಿಸಿದೆ.
