ಅನಾಥ ಮಗುವಿಗೆ ಅಜ್ಜ, ಅಜ್ಜಿ ಆಸರೆಯೇ ಸೂಕ್ತ: ಸುಪ್ರೀಂ

ನವದೆಹಲಿ: ಕೊರೊನಾದಿಂದ ಕಳೆದ ವರ್ಷ ತನ್ನ ಅಪ್ಪ- ಅಮ್ಮನ್ನು ಕಳೆದುಕೊಂಡಿದ್ದ ಅಹ್ಮದಾಬಾದ್‌ನ 6 ವರ್ಷದ ಗಂಡು ಮಗುವಿನ ಪಾಲನೆಯ ಜವಾಬ್ದಾರಿಯನ್ನು ಸುಪ್ರೀಂ ಕೋರ್ಟ್‌ ಮಗುವಿನ ಅಜ್ಜ- ಅಜ್ಜಿಗೆ (ತಂದೆಯ ಅಪ್ಪ-ಅಮ್ಮ) ಒಪ್ಪಿಸಿದೆ. ಮಗು ತನ್ನ ತಾಯಿಯ ತಂಗಿಯ (ಚಿಕ್ಕಮ್ಮ) ಬಳಿಯಲ್ಲೇ ಬೆಳೆಯಬೇಕು ಎಂದು ನೀಡಿದ್ದ ಗುಜರಾತ್‌ ಹೈಕೋರ್ಟ್‌ ಆದೇಶವನ್ನು ರದ್ದುಗೊಳಿಸಿದೆ.

ಮಗುವಿನ ಚಿಕ್ಕಮ್ಮ ಕೇಂದ್ರ ಸರ್ಕಾರಿ ನೌಕರರಾಗಿದ್ದು, ಅವಿವಾಹಿತೆಯಾಗಿದ್ದರಿಂದ ಆಕೆಯ ಪಾಲನೆಯಲ್ಲಿ ಮಗು ಸರ್ವಾಂಗೀಣ ಅಭಿವೃದ್ಧಿಯಾಗಲು ಸಾಧ್ಯ ಎಂದು ಗುಜರಾತ್‌ ಹೈಕೋರ್ಟ್‌ ತಿಳಿಸಿತ್ತು. ಆದರೆ, ಇದನ್ನು ಸುಪ್ರೀಂ ಕೋರ್ಟ್‌ ಒಪ್ಪಿಲ್ಲ. “ಚಿಕ್ಕಮ್ಮನಿಂತ ಅಜ್ಜ-ಅಜ್ಜಿಯರು, ಮೊಮ್ಮಕ್ಕಳೊಂದಿಗೆ ಗಾಢವಾದ ಮಮಕಾರ ಹೊಂದಿರುತ್ತಾರೆ. ಮೊಮ್ಮಕ್ಕಳ ಪಾಲನೆ ವಿಚಾರದಲ್ಲಿ ತಮ್ಮ ವಯಸ್ಸನ್ನೂ ಮರೆತು ಆ ಕರ್ತವ್ಯ ನಿಭಾಯಿಸುತ್ತಾರೆ’ ಎಂದು ಹೇಳಿತು.

“ಇನ್ನು, ಈ ಪ್ರಕರಣದಲ್ಲಿ, ಮಗು ತನ್ನ ಅಜ್ಜ- ಅಜ್ಜಿಯ ಬಳಿಯಲ್ಲೇ ಬೆಳೆಯುವುದು ಸೂಕ್ತ. ಮಗುವಿನ ಚಿಕ್ಕಮ್ಮ, ತನಗೆ ಬೇಕೆನಿಸಿದಾಗ ತಾನಿರುವ ಗುಜರಾತ್‌ನ ದಾಬೋದ್‌ನಿಂದ ಅಹ್ಮದಾಬಾದ್‌ಗೆ ಬಂದು  ಮಗುವನ್ನು ನೋಡಿಕೊಂಡು ಹೋಗಬಹುದು’ ಎಂದು ಕೋರ್ಟ್‌ ಆದೇಶಿಸಿತು.