ಸರ್ಕಾರಿ ಅಧಿಕಾರಿಗಳು ಕೆಲಸಕ್ಕೆ ಬಂದರಷ್ಟೇ ವೇತನ: ನೌಕರರಿಗೆ ಮಣಿಪುರ ಸರ್ಕಾರ ಎಚ್ಚರಿಕೆ

ಇಂಫಾಲ್‌: ಮಣಿಪುರದಲ್ಲಿನ ಹಿಂಸಾಚಾರದ ಸ್ಥಿತಿಯ ಹಿನ್ನೆಲೆಯಲ್ಲಿ ಸರ್ಕಾರಿ ಕೆಲಸವನ್ನು ಉಡಾಫೆಯಾಗಿ ತೆಗೆದುಕೊಳ್ಳುವ ಅಧಿಕಾರಿಗಳನ್ನು ಎಚ್ಚರಿಸುವ ನಿಟ್ಟಿನಲ್ಲಿ ಸರ್ಕಾರ ಎಚ್ಚರಿಕೆ ನೀಡಿದೆ. ಸರ್ಕಾರಿ ಇಲಾಖೆಗಳ ಅಧಿಕಾರಿಗಳು, ನೌಕರರು ಕಚೇರಿಗೆ ಬಂದು ಕೆಲಸ ಮಾಡಿದರೆ ಮಾತ್ರವೇ ವೇತನ ನೀಡಲಾಗುತ್ತದೆ. ಇಲ್ಲದಿದ್ದಲ್ಲಿ ವೇತನ ಕಡಿತಗೊಳಿಸುವುದಾಗಿ ಮುನ್ನೆಚ್ಚರಿಕೆ ನೀಡಲಾಗಿದೆ. ಸರ್ಕಾರದ ವಿವಿಧ ಸಚಿವಾಲಯಗಳ ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಎಲ್ಲ ಇಲಾಖೆಗಳಲ್ಲಿ ರಾಜ್ಯದ ಪರಿಸ್ಥಿತಿಯ ನೆಪ ನೀಡಿ ಕೆಲಸಕ್ಕೆ ಹಾಜರಾಗದವರ ಪಟ್ಟಿಯನ್ನು ನೀಡುವಂತೆ ಕೇಳಲಾಗಿದೆ. ಜತೆಗೆ ಅಂಥ ಉದ್ಯೋಗಿಗಳ ಹೆಸರು, ಕಾರ್ಯನಿರ್ವಹಿಸುತ್ತಿರುವ ವಿಭಾಗ, ಹುದ್ದೆ ಎಲ್ಲ ಮಾಹಿತಿಯನ್ನೂ ಉಲ್ಲೇಖೀಸಿ, ಬಳಿಕ ಪಟ್ಟಿಯನ್ನು ಪ್ರಸ್ತುತ ಪಡಿಸುವಂತೆ ಸೂಚಿಸಲಾಗಿದೆ.

ರಾಜ್ಯದ 1 ಲಕ್ಷಕ್ಕೂ ಅಧಿಕ ಸರ್ಕಾರಿ ಕೆಲಸಗಾರರಿಗೆ ಅಧಿಕೃತ ರಜೆಯನ್ನು ಹೊರತುಪಡಿಸಿ, ಯಾವುದೇ ರಜೆಗಳನ್ನು ಪಡೆದುಕೊಂಡರೆ ಅದಕ್ಕೆ ವೇತನ ನೀಡಲಾಗುವುದಿಲ್ಲವೆಂಬುದನ್ನು ಸ್ಪಷ್ಟಪಡಿಸುವಂತೆಯೂ ಸಾಮಾನ್ಯ ಆಡಳಿತ ವಿಭಾಗ ಇಲಾಖೆಗಳಿಗೆ ಸೂಚಿಸಿದೆ.