ಗಡಿಕೇಶ್ವಾರದಲ್ಲಿ ತಾತ್ಕಾಲಿಕ ಶೆಡ್‌ ನಿರ್ಮಾಣಕ್ಕೆ ಸರ್ಕಾರ ಅಸ್ತು

ಚಿಂಚೋಳಿ: ತಾಲೂಕಿನ ಗಡಿಕೇಶ್ವಾರ ಗ್ರಾಮದಲ್ಲಿ ಕಳೆದ ಐದಾರು ವರ್ಷದಿಂದ ಮೇಲಿಂದ ಮೇಲೆ ಸಂಭವಿಸುತ್ತಿರುವ ಭೂಕಂಪದಿಂದ ಗ್ರಾಮಸ್ಥರು ಭಯಭೀತರಾಗಿ ಮನೆ ಎದುರು ತಾತ್ಕಾಲಿಕ ಟಿನ್‌ ಶೆಡ್‌ ನಿರ್ಮಿಸಿಕೊಡಲು ಸರ್ಕಾರಕ್ಕೆ ಕೋರಿದ್ದ ಬೇಡಿಕೆ ಈಗ ಈಡೇರಿದೆ.

ಭೂಕಂಪದ ಭಯದೊಂದಿಗೆ ಆಯಾ ಕಾಲಕ್ಕೆ ತಕ್ಕಂತೆ ಮಳೆ, ಚಳಿ, ಬಿಸಿಲಿನಿಂದ ರಕ್ಷಿಸಿಕೊಳ್ಳಲು ಮನೆ ಎದುರಲ್ಲೇ ಶೆಡ್‌ ನಿರ್ಮಿಸಿಕೊಡಿ ಎಂದು ಗಡಿಕೇಶ್ವಾರ ಮತ್ತು ಸುತ್ತಲಿನ ಗ್ರಾಮಗಳ ಜನರು ಗ್ರಾಮಕ್ಕೆ ಭೇಟಿ ನೀಡಿದ್ದ ಸಚಿವರಲ್ಲಿ, ವಿರೋಧ ಪಕ್ಷದ ನಾಯಕರಲ್ಲಿ, ಸಂಸದರಲ್ಲಿ, ಅಧಿಕಾರಿಗಳಲ್ಲಿ, ವಿವಿಧ ಪಕ್ಷಗಳ ಮುಖಂಡರಲ್ಲಿ ಮನವಿ ಮಾಡಿಕೊಂಡಿದ್ದರು. ಈ ಮನವಿಗೆ ಸ್ಪಂದಿಸಿರುವ ರಾಜ್ಯ ಸರ್ಕಾರ ಮೂರು ಕೋಟಿ ರೂ.ಗಳನ್ನು ಮಂಜೂರಿಗೊಳಿಸಿದೆ.

ಇದರಿಂದ ಗಡಿಕೇಶ್ವಾರ ಹಾಗೂ ಸುತ್ತಲಿನ ಗ್ರಾಮಸ್ಥರು ನಿಟ್ಟುಸಿರು ಬಿಡುವಂತೆ ಆಗಿದೆ. ಗಡಿಕೇಶ್ವಾರ ಗ್ರಾಮದಲ್ಲಿ ಪರಸಿಕಲ್ಲು ಹಾಗೂ ಮಣ್ಣಿನಿಂದ ನಿರ್ಮಿಸಿದ ಮನೆಗಳು ಇರುವುದರಿಂದ ಮೇಲಿಂದ ಮೇಲೆ ಸಂಭವಿಸಿದ ಲಘು ಭೂಕಂಪ ದಿಂದಾಗಿ ಬಿರುಕು ಬಿಟ್ಟಿವೆ. ಹೀಗಾಗಿ ಮನೆಯಲ್ಲಿ ವಾಸವಾಗಿರಲು ಜನತೆ ಭಯಭೀತರಾಗಿದ್ದರು. ಅಲ್ಲದೇ ರಾತ್ರಿ ಮನೆಯಲ್ಲೇ ಮಲಗಲು ಆತಂಕ ಪಡುವಂತೆ ಆಗಿತ್ತು.

ಹೊಡೇಬೀರನಳ್ಳಿ ಕ್ರಾಸ್‌ ಹತ್ತಿರದ ಗಡಿಕೇಶ್ವಾರ, ಹೊಸಳ್ಳಿ, ಹಲಚೇರಾ, ತೇಗಲತಿಪ್ಪಿ, ಕೊರವಿ, ಕುಡಹಳ್ಳಿ, ಭಂಟನಳ್ಳಿ, ಬೆನಕನಳ್ಳಿ, ಕುಪನೂರ, ರಾಯಕೋಡ, ಚಿಂತಪಳ್ಳಿ, ರುದನೂರ, ಹೊಡೆಬೀರನಳ್ಳಿ ಗ್ರಾಮಸ್ಥರು ಕಳೆದ ಅಕ್ಟೋಬರ್‌ 11ರಂದು ಪ್ರತಿಭಟನೆ ನಡೆಸಿ ಸರ್ಕಾರಕ್ಕೆ ಮನವಿ ಪತ್ರವನ್ನು ಸಲ್ಲಿಸಿದ್ದರು.

ಮಾಜಿ ಸಚಿವ ಡಾ| ಶರಣಪ್ರಕಾಶ ಪಾಟೀಲ, ವಿರೋಧ ಪಕ್ಷದ ನಾಯಕ ಸಿದ್ದರಾಮಯ್ಯ ಗಡಿಕೇಶ್ವಾರ ಗ್ರಾಮಕ್ಕೆ ಭೇಟಿ ನೀಡಿ ಗ್ರಾಮಸ್ಥರ ಬೇಡಿಕೆಗೆ ಸ್ಪಂದಿಸುವಂತೆ ಸರ್ಕಾರಕ್ಕೆ ಕೋರಿದ್ದರು. ಅಲ್ಲದೇ ಕಲಬುರಗಿ ಸಂಸದ ಡಾ| ಉಮೇಶ ಜಾಧವ, ಕಂದಾಯ ಸಚಿವ ಆರ್‌. ಅಶೋಕ, ಸೇಡಂ ಶಾಸಕ ರಾಜಕುಮಾರ ಪಾಟೀಲ ತೇಲ್ಕೂರ ಗ್ರಾಮಸ್ಥರ ಬೇಡಿಕೆ ಈಡೇರಿಸುವುದಾಗಿ ಭರವಸೆ ನೀಡಿದ್ದರು.

ಇದಕ್ಕೂ ಮುನ್ನ ಭೂಕಂಪದ ಭಯದಿಂದ ಗ್ರಾಮಸ್ಥರು ಊರನ್ನೇ ತೊರೆದು ನೆಂಟರ ಮನೆಗಳಿಗೆ ಹೋಗಿದ್ದರು. ಆನಂತರ ಸರ್ಕಾರ ಗಡಿಕೇಶ್ವಾರ, ಹೊಸಳ್ಳಿ(ಎಚ್‌), ರಾಮನಗರ (ಕೊರವಿ) ತಾಂಡಾದಲ್ಲಿ ಕಾಳಜಿ ಕೇಂದ್ರಗಳನ್ನು ಪ್ರಾರಂಭಿಸಿ ಗ್ರಾಮಸ್ಥರಿಗೆ ಉಪಹಾರ, ಊಟದ ವ್ಯವಸ್ಥೆ ಮಾಡಿತ್ತು. ಆ ನಂತರ ಈ ಸೌಲಭ್ಯವನ್ನು ಸ್ಥಗಿತಗೊಳಿಸಲಾಗಿತ್ತು.

ಗ್ರಾಮಸ್ಥರ ಹರ್ಷ

ಗಡಿಕೇಶ್ವಾರ ಗ್ರಾಮದಲ್ಲಿ ಭೂಕಂಪದ ಹೆದರಿಕೆಯಲ್ಲಿಯೇ ಬದುಕುತ್ತಿದ್ದ ಜನರ ಬಗ್ಗೆ ಸರ್ಕಾರಕ್ಕೆ ಮನವರಿಕೆ ಆಗಿದ್ದರಿಂದ ಶೆಡ್‌ ನಿರ್ಮಿಸಲು 3ಕೋಟಿ ರೂ. ಪರಿಹಾರ ನಿಧಿ ಮಂಜೂರಿ ಮಾಡಿರುವುದು ಸಂತಸವಾಗಿದೆ ಎಂದು ಗ್ರಾಮಸ್ಥರಾದ ರೇವಣಸಿದ್ಧಪ್ಪ ಅಣಕಲ್‌, ಸಂತೋಷ ಬಳಿ, ಸುರೇಶ ಪಾಟೀಲ ರಾಯಕೋಡ ಮತ್ತಿತರರು ಹರ್ಷ ವ್ಯಕ್ತಪಡಿಸಿದ್ದಾರೆ.

ಚಿಂಚೋಳಿ ತಾಲೂಕಿನ ಭೂಕಂಪ ಪೀಡಿತ ಗಡಿಕೇಶ್ವಾರ ಗ್ರಾಮಸ್ಥರ ಬೇಡಿಕೆಗೆ ಸರ್ಕಾರ ಸ್ಪಂದಿಸಿದ್ದು, ಅವರ ಮನೆಯ ಅಂಗಳದ ಎದುರು ತಾತ್ಕಾಲಿಕ ಟಿನ್‌ ಶೆಡ್‌ ನಿರ್ಮಿಸಲು ಸರ್ಕಾರದಿಂದ ಮೂರು ಕೋಟಿ ರೂ. ಅನುದಾನವನ್ನು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ, ಕಂದಾಯ ಸಚಿವ ಆರ್‌.ಅಶೋಕ ಬಿಡುಗಡೆ ಮಾಡಿದ್ದಾರೆ. ಭೂಕಂಪ ಸಂದರ್ಭದಲ್ಲಿ ಗಡಿಕೇಶ್ವಾರ ಸೇರಿದಂತೆ ಎಲ್ಲ ಗ್ರಾಮಗಳಿಗೂ ಭೇಟಿ ನೀಡಿ, ಗ್ರಾಮ ವಾಸ್ತವ್ಯ ಮಾಡಿ ಸರ್ಕಾರಕ್ಕೆ ಇಲ್ಲಿನ ಸಂಕಷ್ಟ ಮನವರಿಕೆ ಮಾಡಿದ್ದೆ. ಸರ್ಕಾರ ಮನವಿಗೆ ಸ್ಪಂದಿಸಿದ್ದು ಸಂತಸ ತಂದಿದೆ. -ಡಾ| ಉಮೇಶ ಜಾಧವ, ಸಂಸದ, ಕಲಬುರಗಿ

ಗಡಿಕೇಶ್ವರ ಗ್ರಾಮಸ್ಥರು ಚಳಿ, ಮಳೆ, ಬಿಸಿಲು ಎನ್ನದೇ ಯಾವಾಗ ಭೂಮಿ ಕಂಪಿಸುತ್ತದೆಯೋ ಎಂದು ಹೆದರಿ ತಮ್ಮ ಮನೆ ಎದುರು ತಾಡಪತ್ರಿ ಹಾಕಿಕೊಂಡು ಜೀವನ ಸಾಗಿಸುತ್ತಿದ್ದರು. ಈಗ ಸರ್ಕಾರವೇ ಮನೆ ಎದುರು ಶೆಡ್‌ ನಿರ್ಮಿಸುತ್ತಿರುವುದು ಹರ್ಷದ ಸಂಗತಿಯಾಗಿದೆ. -ಅಶೋಕ ರಂಗನೂರ, ಹೋರಾಟಗಾರ

-ಶಾಮರಾವ ಚಿಂಚೋಳಿ