ಗೌರವ್‌ ಗಿಲ್‌ಗೆ ಹ್ಯಾಟ್ರಿಕ್‌ ಪ್ರಶಸ್ತಿ

ಚಿಕ್ಕಮಗಳೂರು: ಕಾಫಿ ನಾಡಿನಲ್ಲಿ ನಡೆದ ಏಷ್ಯಾ ಪೆಸಿಫಿಕ್‌ ಕಾರ್‌ ರ್ಯಾಲಿಯಲ್ಲಿ ಸತತ ಎರಡನೇ ಹಾಗೂ ಒಟ್ಟು ಮೂರನೇ
ಬಾರಿಗೆ ಗೌರವ್‌ ಗಿಲ್‌ ಚಾಂಪಿಯನ್‌ ಕಿರೀಟ ಧರಿಸಿದ್ದಾರೆ.

ಕಾಫಿ ನಾಡಿನಲ್ಲಿ ನಡೆದ ಅಂತಿಮ ಸುತ್ತಿಗೂ ಮೊದಲೆ ತಮ್ಮ ಸಮೀಪದ ಪ್ರತಿ  ಸ್ಪರ್ಧಿ ನಾರ್ವೆಯ ಓಲೆ ಕ್ರಿಶ್ಚಿಯನ್‌ ವೈಬಿ
ಅವರಿಗಿಂತ 6 ಪಾಯಿಂಟ್‌ಗಳ ಮುನ್ನಡೆ ಪಡೆದು ಕೊಂಡಿದ್ದ ಗೌರವ್‌ ಗಿಲ್‌ ನಿರೀಕ್ಷೆಯಂತೆ ಚಾಂಪಿಯನ್‌ ಆದರು. ಸ್ಟೆಪೀನ್‌ ಪ್ರಪೋಟ್‌ ಅವರನ್ನು ನ್ಯಾವಿಗೇಟರ್‌ ಆಗಿ ಹೊಂದಿದ್ದ ಗೌರವ್‌ ಗಿಲ್‌ 3 ಗಂಟೆ 20 ನಿಮಿಷ 19.8 ಸೆಕೆಂಡುಗಳಲ್ಲಿ ನಿಗದಿತ ದೂರ ಕ್ರಮಿಸಿದರು. ಪ್ರತಿಯೊಂದು ಹಂತದ ಸ್ಪರ್ಧೆ, ಕಡಿದಾದ ದಾರಿಯಲ್ಲಿನ ಪಯಣ, ಎಲ್ಲದರಲ್ಲೂ ಗೌರವ್‌ ಗಿಲ್‌ ಎಲ್ಲರಿಗಿಂತ ಶ್ರೇಷ್ಠ ಪ್ರದರ್ಶನ ನೀಡಿತು.

ಎರಡನೇ ಸ್ಥಾನವನ್ನು ನಾರ್ವೆಯ ಓಲೆ ಕ್ರಿಶ್ಚಿಯನ್‌ ವೈಬಿ ಮತ್ತು ಸ್ಟಿಗ್‌ ಜಾರ್ಮೊನ್‌ ಪಡೆದರು. ಅವರು ನಿಗದಿತ ದೂರವನ್ನು 3 ಗಂಟೆ 37 ನಿಮಿಷ 58.2 ಸೆಕೆಂಡುಗಳಲ್ಲಿ ಕ್ರಮಿಸಿದರು. ಮೂರನೇ ಸ್ಥಾನವನ್ನು ಸರ್ಫಾಜ್‌ ಜುನೈದ್‌ ಮತ್ತು ಅಕ್ರ ಅಮೀರ್‌ ಪಡೆದರು. ಅವರು 4 ಗಂಟೆ 10 ನಿಮಿಷ 17.4 ಸೆಕೆಂಡುಗಳಲ್ಲಿ ದೂರ ಕ್ರಮಿಸಿದರು. ರ್ಯಾಲಿ ವಿಜೇತರಿಗೆ ಜಿಲ್ಲಾ ರಕ್ಷಣಾಧಿಕಾರಿ ಕೆ.ಅಣ್ಣಾಮಲೈ ಬಹುಮಾನ ವಿತರಿಸಿದರು.

ಎಸ್‌.ಕೆ.ಲಕ್ಷ್ಮೀಪ್ರಸಾದ್‌