ಗೂಗಲ್‌ ಸಿಇಒ ಸುಂದರ್‌ ಪಿಚೈ ಗಳಿಕೆ ದಿನಕ್ಕೆ 3.52 ಕೋಟಿ!

ಕ್ಯಾಲಿಫೋರ್ನಿಯಾ: ಗೂಗಲ್‌ ಕಂಪನಿಯ ಭಾರತ ಮೂಲದ ಸಿಇಒ ಸುಂದರ್‌ ಪಿಚೈ ಅವರು ದಿನಕ್ಕೆ ಗಳಿಕೆ ಮಾಡುವ ಹಣವೆಷ್ಟು ಗೊತ್ತೇ?

3.52 ಕೋಟಿ. ಹೌದು, ಇಡೀ ಜಗತ್ತಿನಲ್ಲೇ ಯಾವ ಸಿಇಒಗೂ ಈ ಪ್ರಮಾಣದ ಹಣ ಕಂಪನಿ ಕಡೆಯಿಂದ ಸಿಗಲು ಸಾಧ್ಯವೇ ಇಲ್ಲ. ಗೂಗಲ್‌ ಸಂಸ್ಥೆಯನ್ನು ಭಾರೀ ಲಾಭದ ಕಡೆಗೆ ಕೊಂಡೊಯ್ದ ಹಿನ್ನೆಲೆಯಲ್ಲಿ ಕಂಪನಿ ಆಡಳಿತ ಮಂಡಳಿ ಸುಂದರ್‌ ಪಿಚೈಗೆ ಈ ಮೊತ್ತದ ಹಣ ನೀಡಿದೆ. ಅಂದರೆ, ವರ್ಷಕ್ಕೆ 1,285 ಕೋಟಿ ರೂ.

ಆದರೆ ಇದು ವೇತನವಲ್ಲ. ಕಳೆದ ವರ್ಷ ವೇತನ ರೂಪದಲ್ಲಿ ಪಿಚೈ ಅವರಿಗೆ ಸಿಕ್ಕಿದ ಹಣ 6,5000 ಅಮೆರಿಕನ್‌ ಡಾಲರ್‌(4.18 ಕೋಟಿ ರೂ.). 2015ರಲ್ಲಿ ಅವರಿಗೆ ಸಿಕ್ಕಿದ್ದು 6,52000 ಡಾಲರ್‌(4.19 ಕೋಟಿ ರೂ). ಆದರೆ, ಷೇರುಗಳ ರೂಪದಲ್ಲಿ ಪಿಚೈಗೆ ಬರೋಬ್ಬರಿ 198 ಮಿಲಿಯನ್‌ ಡಾಲರ್‌(1272.60 ಕೋಟಿ ರೂ.) ದೊರೆತಿದೆ. 2015ರಲ್ಲಿ ಸ್ಟಾಕ್‌ ರೂಪದಲ್ಲಿ ಸಿಕ್ಕ ಹಣ 99.8 ಮಿಲಿಯನ್‌ ಡಾಲರ್‌(641.40 ಕೋಟಿ ರೂ.).

ಪಿಚೈ ಅವರು ಗೂಗಲ್‌ ನಾಯಕತ್ವ ವಹಿಸಿಕೊಂಡ ಬಳಿಕ ಗೂಗಲ್‌ ಸಂಸ್ಥೆಯ ಪ್ರಾಡಕ್ಟ್ಗಳಾದ ಯೂಟ್ಯೂಬ್‌ ಮತ್ತು ಜಾಹೀರಾತಿನಲ್ಲಿ ಭಾರಿ ಲಾಭ ಬಂದಿದೆ. ಅಲ್ಲದೆ ಅಲ್ಫಾಬೆಟ್‌ ಕಂಪನಿಯ ಷೇರುಗಳ ಮೌಲ್ಯವೂ ಹೆಚ್ಚಾಗಿದೆ. ಜತೆಗೆ, 2016ರಲ್ಲಿ ವರ್ಚುಯಲ್‌ ರಿಯಾಲಿಟಿ, ಸ್ಮಾರ್ಟ್‌ಫೋನ್‌, ವಾಯ್ಸ ಕಂಟ್ರೋಲ್ಡ್‌ ಸ್ಪೀಕರ್‌ ಉತ್ಪನ್ನಗಳನ್ನೂ ಗೂಗಲ್‌ ಬಿಡುಗಡೆ ಮಾಡಿದೆ. ಇದಕ್ಕೆಲ್ಲ ಸುಂದರ್‌ ಪಿಚೈ ಅವರೇ ಕಾರಣ ಎಂಬ ದೃಷ್ಟಿಯಿಂದ ಆಡಳಿತ ಮಂಡಳಿ ದುಪ್ಪಟ್ಟು ಷೇರುಗಳನ್ನು ಕೊಟ್ಟಿದೆ.