ಶಾಲೆ ಹಾಜರಾತಿ ಹೆಚ್ಚಿಸಿದ್ದ ಲಕ್ಷ್ಮಿ ಇನ್ನಿಲ್ಲ

ಕರ್ನೂಲ್‌: ಮುಖ್ಯೋಪಾಧ್ಯಾಯರೂ ಸೇರಿ ಇಬ್ಬರೇ ಶಿಕ್ಷಕರಿರುವ ಆಂಧ್ರಪ್ರದೇಶದ ಕರ್ನೂಲ್‌ ಜಿಲ್ಲೆಯ ವಂಗಲಂಪಲ್ಲಿ ಗ್ರಾಮದ ಸರ್ಕಾರಿ ಪ್ರಾಥಮಿಕ ಶಾಲೆಯಲ್ಲಿ ಪ್ರತಿದಿನ ಅರ್ಧದಷ್ಟು ಹಾಜರಾತಿಯೂ ಇರಲಿಲ್ಲ. ಶಿಕ್ಷಕರು ಮಕ್ಕಳನ್ನು ಮನವೊಲಿಸಿ ಶಾಲೆಗೆ ಕರೆತರುವಲ್ಲಿ ಸೋತಿದ್ದರು. ಆದರೆ ಒಂದು ಮಂಗ ಈ ಶಾಲೆಯಲ್ಲಿ ಶೇ.100 ದಾಖಲಾತಿ ಇರುವಂತೆ ಮಾಡಿತ್ತು.

ಆ ಮಂಗ ಈಗ ನಾಯಿಗಳ ದಾಳಿಯಿಂದ ಮೃತಪಟ್ಟಿದ್ದು, ಶಾಲೆಯ ಎಲ್ಲಾ ಮಕ್ಕಳ ಕಣ್ಣೀರಿಗೆ ಕಾರಣವಾಗಿದೆ. ಪ್ರತಿದಿನವೂ ಶಾಲೆಗೆ ಬಂದು ವಿದ್ಯಾರ್ಥಿಗಳ ಜೊತೆ ಕುಳಿತುಕೊಳ್ಳುತ್ತಿದ್ದ ಈ ಕೋತಿಗೆ ಮಕ್ಕಳು ಪ್ರೀತಿಯಿಂದ ಲಕ್ಷ್ಮಿ ಎಂದು ಹೆಸರಿಟ್ಟಿದ್ದರು. ಮಕ್ಕಳ ಜೊತೆ ಪಾಠ ಕೇಳುವುದಲ್ಲದೇ, ಊಟವನ್ನೂ ಅವರೊಡನೆಯೇ ಮಾಡುತ್ತಿತ್ತು. ಶನಿವಾರ ಮಧ್ಯಾಹ್ನ ಲಕ್ಷ್ಮಿ ಶಾಲೆಯ ಆವರಣದಲ್ಲಿ ಬೀದಿ ನಾಯಿಗಳ ಹಾವಳಿಗೆ ಬಲಿಯಾಗಿದೆ ಎಂದು ಶಿಕ್ಷಕರು ದುಃಖದಿಂದ ತಿಳಿಸಿದ್ದಾರೆ.