ಗೋಲ್ಡನ್‌ ಗರ್ಲ್ ಬಾಕ್ಸಿಂಗ್‌: ಆರು ಚಿನ್ನ ಗೆದ್ದ ಭಾರತ

ಹೊಸದಿಲ್ಲಿ: ಸ್ವೀಡನ್‌ನಲ್ಲಿ ಮುಗಿದ “ಗೋಲ್ಡನ್‌ ಗರ್ಲ್ ಬಾಕ್ಸಿಂಗ್‌ ಚಾಂಪಿಯನ್‌ಶಿಪ್‌’ನಲ್ಲಿ ಭಾರತದ ಜೂನಿಯರ್‌ ಮತ್ತು ಯೂತ್‌ ಬಾಕ್ಸರ್ 14 ಪದಕ ಜಯಿಸಿದ್ದಾರೆ. ಇದರಲ್ಲಿ 6 ಬಂಗಾರ ಸೇರಿದೆ. ಪದಕಗಳ ಜತೆಯಲ್ಲೇ ಸಮಗ್ರ ಚಾಂಪಿಯನ್‌ಶಿಪ್‌ ಮತ್ತು “ಬೆಸ್ಟ್‌ ಬಾಕ್ಸರ್‌’ ಪ್ರಶಸ್ತಿ ಕೂಡ ಭಾರತದ ಪಾಲಾಗಿದೆ ಎಂದು ಬಾಕ್ಸಿಂಗ್‌ ಫೆಡರೇಶನ್‌ ಆಫ್ ಇಂಡಿಯಾ ತಿಳಿಸಿದೆ.

ಜೂನಿಯರ್‌ ವಿಭಾಗದಲ್ಲಿ ಭಾರತಕ್ಕೆ 5 ಚಿನ್ನ, 3 ಬೆಳ್ಳಿ ಹಾಗೂ ಒಂದು ಕಂಚಿನ ಪದಕ ಒಲಿಯಿತು. ಯೂತ್‌ ಟೀಮ್‌ ಒಂದು ಚಿನ್ನ ಹಾಗೂ 4 ಕಂಚಿನ ಪದಕ ಜಯಿಸಿತು. 50 ಕೆಜಿ ಜೂ. ವಿಭಾಗದಲ್ಲಿ ಸ್ಪರ್ಧಿಸಿ ಚಿನ್ನ ಗೆದ್ದ ಹರ್ಯಾಣದ ಪ್ರಾಚಿ ಧಂಕರ್‌ “ಬೆಸ್ಟ್‌ ಬಾಕ್ಸರ್‌’ ಗೌರವಕ್ಕೆ ಪಾತ್ರರಾದರು.ಈ ಕೂಟದಲ್ಲಿ ಒಟ್ಟು 75 ತಂಡಗಳು ಭಾಗವಹಿಸಿದ್ದವು.