Gold Scam; ಪವಿತ್ರಾ ಸ್ನೇಹಿತೆ ಜತೆಗೆ ಕಾಣಿಸಿಕೊಂಡ ಚಿನ್ನ ವಂಚನೆ ಕೇಸ್‌ ಆರೋಪಿ ಶ್ವೇತಾ

ಬೆಂಗಳೂರು: ಚಿನ್ನದಂಗಡಿಗೆ ವಂಚಿಸಿದ ಪ್ರಕರಣ ಪತ್ತೆಯಾಗುವುದಕ್ಕೂ ಮೊದಲು ರೇಣುಕಸ್ವಾಮಿ ಕೊಲೆ ಪ್ರಕರಣದ ಮೊದಲ ಆರೋಪಿ ಪವಿತ್ರಾ ಗೌಡ ಸ್ನೇಹಿತೆ ಸಮತಾ ಜತೆ ಶ್ವೇತಾಗೌಡ ಕಾಣಿಸಿಕೊಂಡಿರುವ ವಿಡಿಯೋಗಳು ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿವೆ. ಇದರ ಬೆನ್ನಲ್ಲೇ ಸಮತಾ ಅವರು ಮಾಧ್ಯಮಗಳಿಗೆ ಸ್ಪಷ್ಟನೆ ನೀಡಿದ್ಧಾರೆ.

ಮಾಜಿ ಸಚಿವ ವರ್ತೂರು ಪ್ರಕಾಶ್‌ ಹೆಸರು ದುರ್ಬಳಕೆ ಮಾಡಿಕೊಂಡು ವಂಚಿಸಿದ ಪ್ರಕರಣದಲ್ಲಿ ಬಂಧನಕ್ಕೊಳಗಾಗಿರುವ ಶ್ವೇತಾಗೌಡ, ದರ್ಶನ್‌ ಪ್ರೇಯಸಿ ಪವಿತ್ರಾಗೌಡ ಸ್ನೇಹಿತೆ ಎಂಬ ವಿಚಾರ ಕುರಿತು ಸಮತಾ ಮಾಹಿತಿ ನೀಡಿದ್ದಾರೆ.

ಶ್ವೇತಾಗೌಡಗೂ ನನಗೂ ಯಾವುದೇ ಸಂಬಂಧ ಇಲ್ಲ. ಪವಿತ್ರಾಗೌಡ ಜೈಲಿನಲ್ಲಿ ಇದ್ದಾಗ ಅವರನ್ನು ಭೇಟಿ ಮಾಡಲು ತೆರಳಿದ್ದೆ. ಈ ವೇಳೆ ಶ್ವೇತಾಗೌಡ ಬಂದು ಪರಿಚಯ ಮಾಡಿಕೊಂಡರು. ಅಂದೇ ನಾನು ಅವರನ್ನು ಭೇಟಿ ಮಾಡಿದ್ದು. ಅದನ್ನು ಹೊರತು ಪಡಿಸಿ ಶ್ವೇತಾಗೌಡ ನನಗೂ ಯಾವುದೇ ಸಂಬಂಧ ಇಲ್ಲ’ ಎಂದು ಸಮತಾ ಅವರು ತಿಳಿಸಿದ್ದಾರೆ.

ಪರಪ್ಪನ ಅಗ್ರಹಾರದ ಬಳಿ ಆಕೆ ಏಕಾಏಕಿ ನನ್ನ ಪಕ್ಕದಲ್ಲಿ ಬಂದಾಗ, ನನ್ನ ಜತೆಗೆ ಯಾಕೆ ಬರುತ್ತೀಯಾ ಎಂದು ಕೇಳಿದ್ದೆ. ಅದಾದ ಮೇಲೆ ನನ್ನೊಂದಿಗೆ ಆಟೋದಲ್ಲಿ ಬಂದು ದೂರದಲ್ಲಿ ಇಳಿದು ಹೋದರು.