ಹಿಮಾ, ಅನಾಸ್‌ಗೆ ಸ್ವರ್ಣ

ಹೊಸದಿಲ್ಲಿ: ಭಾರತದ ಸ್ಟಾರ್‌ ಸ್ಪ್ರಿಂಟರ್‌ ಹಿಮಾ ದಾಸ್‌ ಅಂತಾರಾಷ್ಟ್ರೀಯ ಮಟ್ಟದ ಸ್ಪರ್ಧೆ ಯಲ್ಲಿ, ಒಂದೇ ವಾರದ ಅವಧಿ ಯಲ್ಲಿ ಮತ್ತೂಂದು ಚಿನ್ನ ಗೆದ್ದ ಸಾಧನೆ ಮಾಡಿದ್ದಾರೆ. ಪುರುಷರ ವಿಭಾಗದಲ್ಲಿ ಮೊಹಮ್ಮದ್‌ ಅನಾಸ್‌, ಹರ್ಡಲ್ಸ್ನಲ್ಲಿ ಎಂ.ಪಿ. ಜಬಿರ್‌ ಕೂಡ ಬಂಗಾರದ ಬೇಟೆಯಾಡಿದ್ದಾರೆ.

ಪೋಲೆಂಡಿನಲ್ಲಿ ರವಿವಾರ ನಡೆದ ಕುಟ್ನೊ ಆ್ಯತ್ಲೆಟಿಕ್‌ ಕೂಟದ ವನಿತೆಯರ 200 ಮೀ. ರೇಸ್‌ನಲ್ಲಿ ಹಿಮಾ ದಾಸ್‌ 23.97 ಸೆ.ಗಳಲ್ಲಿ ಗುರಿ ತಲುಪಿ ಚಿನ್ನ ಗೆದ್ದರು. ಕಳೆದ ಕೆಲವು ತಿಂಗಳಿಂದ ಬೆನ್ನುನೋವಿನಿಂದ ಬಳಲುತ್ತಿದ್ದ ಹಿಮಾ ಕೆಲವು ದಿನಗಳ ಹಿಂದೆ ನಡೆದ ಪೊಜ್ನಾನ್‌ ಆ್ಯತ್ಲೆಟಿಕ್‌ ಕೂಟದ 200 ಮೀ.ನಲ್ಲೂ ಚಿನ್ನ ಗೆದ್ದಿದ್ದರು.

ಹಿಮಾ ದಾಸ್‌ ಇಲ್ಲಿ ಚಿನ್ನ ಗೆದ್ದರೂ ಅವರ ನಿರ್ವಹಣೆ ಉತ್ತಮವಾಗಿರಲಿಲ್ಲ. 200 ಮೀ.ನಲ್ಲಿ ಅವರ ವೈಯಕ್ತಿಕ ಶ್ರೇಷ್ಠ ನಿರ್ವಹಣೆಯನ್ನು ಕಳೆದ ವರ್ಷ 23.10 ಸೆ.ನಲ್ಲಿ ಗುರಿ ತಲುಪುವ ಮೂಲಕ ದಾಖಲಿಸಿದ್ದರು.

24.06 ಸೆ.ನಲ್ಲಿ ಗುರಿ ತಲುಪಿದ ವಿ.ಕೆ. ವಿಸ್ಮಯಾ ಬೆಳ್ಳಿ ಗೆದ್ದರು. ಅವರು ಪೊಜ್ನಾನ್‌ ಆ್ಯತ್ಲ್ಲೆಟಿಕ್‌ ಕೂಟದಲ್ಲಿ ವೈಯಕ್ತಿಕ ಶ್ರೇಷ್ಠ ನಿರ್ವಹಣೆಯೊಂದಿಗೆ (23.75 ಸೆ.) ಕಂಚು ಜಯಿಸಿದ್ದರು.

ಅನಾಸ್‌ಗೆ ಚಿನ್ನ
ಮೊಹಮ್ಮದ್‌ ಅನಾಸ್‌ ಪುರುಷರ 200 ಮೀ.ನಲ್ಲಿ 21.18 ಸೆ.ನಲ್ಲಿ ಗುರಿ ತಲುಪಿ ಚಿನ್ನ ಗೆದ್ದರು. ಪುರುಷರ 400 ಮೀ. ಹರ್ಡಲ್ಸ್ನಲ್ಲಿ ಎಂ.ಪಿ. ಜಬಿರ್‌ ಚಿನ್ನ ತಮ್ಮದಾಗಿಸಿಕೊಂಡಿದ್ದಾರೆ.

ವನಿತೆಯರ 400 ಮೀ.ನ ಮೂರು ಪದಕಗಳನ್ನು ಭಾರತೀಯರು ಗೆದ್ದಿದ್ದಾರೆ.