ಬೆಂಗಳೂರು: ಕುಂಬಳಗೋಡು ಪೊಲೀಸ್‌ ಠಾಣಾ ವ್ಯಾಪ್ತಿಯ ರಾಮಸಂದ್ರದಲ್ಲಿ ಸಂಭವಿಸಿದ ಪರ್ಫ್ಯೂಮ್‌ ಗೋಡೌನ್‌ ಅಗ್ನಿ ದುರಂತದಲ್ಲಿ ತೀವ್ರವಾಗಿ ಗಾಯಗೊಂಡು ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ತಂದೆ ಮತ್ತು ಮಗ ಗುರುವಾರ ಮೃತಪಟ್ಟಿದ್ದಾರೆ.
ಮೃತಪಟ್ಟವರ ಸಂಖ್ಯೆ ಆರಕ್ಕೆ ಏರಿಕೆಯಾಗಿದೆ. ಅಫ್ರೋಜ್‌ ಪಾಷಾ(39) ಮತ್ತು ಆತನ ಪುತ್ರ ರಿಯಾನ್‌ ಪಾಷಾ(10) ಮೃತರು.
ಕಳೆದ ಭಾನುವಾರ ರಾಮಸಂದ್ರದಲ್ಲಿರುವ ಪರ್ಫ್ಯೂಮ್‌ ಗೋಡೌನ್‌ನಲ್ಲಿ ನಡೆದಿದ್ದ ಬೆಂಕಿ ಅವಘಡದಲ್ಲಿ ತಂದೆ-ಮಗನಿಗೆ ಶೇ.45 ಗಂಭೀರ ಗಾಯಗಳಾಗಿದ್ದು, ಆಸ್ಪತ್ರೆಯ ತುರ್ತು ನಿಗಾ ಘಟಕದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ರಿಯಾನ್‌ ಪಾಷಾ ಬುಧವಾರ ತಡರಾತ್ರಿ ಮೃತಪಟ್ಟರೆ, ಅಫ್ರೋಜ್‌ ಪಾಷಾ ಗುರುವಾರ ಸಂಜೆ ಮೃತಪಟ್ಟಿದ್ದಾನೆ ಎಂದು ಪೊಲೀಸರು ಹೇಳಿದರು.
ಹಳೆಯ ಸುಗಂಧ ದ್ರವ್ಯದ ಅಲ್ಯೂಮಿನಿಯಂ ಬಾಟಲಿಗಳನ್ನು ಗುಜರಿಗೆ ಹಾಕುವ ಟೆಂಡರ್‌ ಅನ್ನು ಅಫ್ರೋಜ್‌ ಪಾಷಾ ಪಡೆದುಕೊಂಡಿದ್ದರು. ಹೀಗಾಗಿ ಭಾನುವಾರ ತನ್ನ ಸಂಬಂಧಿಕರು ಹಾಗೂ ಇತರೆ ಕೆಲಸಗಾರರ ಜತೆ ಸುಗಂಧ ದ್ರವ್ಯದ ಮುನ್ನ ಅದರಲ್ಲಿರುವ ರಾಸಾಯನಿಕ ದ್ರವ ಹೊರ ತೆಗೆಯುವಾಗ ಹೊತ್ತಿಕೊಂಡ ಕಿಡಿಯಿಂದ ಸ್ಥಳದಲ್ಲಿಯೇ ಮೂರು ಸಜೀವ ದಹನವಾಗಿದ್ದರು. ಐವರು ಗಾಯಗೊಂಡಿದ್ದು, ವಿಕ್ಟೋರಿಯಾ ಆಸ್ಪತ್ರೆಗೆ ದಾಖಲಿಸಲಾಗಿತ್ತು.
ಅದರಲ್ಲಿ ಶೇ.45 ಸುಟ್ಟ ಗಾಯಗಳಿಂದ ನರಳುತ್ತಿದ್ದ ರಿಯಾನ್‌ ಪಾಷಾ ಮತ್ತು ಆತನ ತಂದೆ ಅಫ್ರೋಜ್‌ ಪಾಷಾ ಚಿಕಿತ್ಸೆ ಫ‌ಲಕಾರಿಯಾಗದೆ ಗುರುವಾರ ಮೃತಪಟ್ಟಿದ್ದಾರೆ.
ಘಟನೆಯಲ್ಲಿ ಗಾಯಗೊಂಡಿದ್ದ ಇತರೆ ಇಬ್ಬರಿಗೆ ಚಿಕಿತ್ಸೆ ಮುಂದುವರಿದಿದೆ ಎಂದು ಕುಂಬಳಗೋಡು ಠಾಣೆ ಪೊಲೀಸರು ಮಾಹಿತಿ ನೀಡಿದರು.
