ಗೋ ಏರ್‌ : ಅಕ್ಟೋಬರ್‌ನಿಂದ ಸಾಗರೋತ್ತರ ಹಾರಾಟ ಆರಂಭ

ಕೋಲ್ಕತ : ಮಿತ ವ್ಯಯದ ಗೋ ಏರ್‌ ವಿಮಾನ ಯಾನ ಸಂಸ್ಥೆಯು ಇದೇ ವರ್ಷ ಅಕ್ಟೋಬರ್‌ನಿಂದ ಸಾಗರೋತ್ತರ ಹಾರಾಟಗಳನ್ನು ಆರಂಭಿಸಲಿದೆ ಎಂದು ಸಂಸ್ಥೆಯ ಆಡಳಿತ ನಿರ್ದೇಶಕ ಜೇ ವಾಡಿಯಾ ತಿಳಿಸಿದ್ದಾರೆ.

ಗೋ ಏರ್‌ ಬಳಿ ಈಗ 24 ಪ್ರಯಾಣಿಕ ವಿಮಾನಗಳಿವೆ. ಈಚೆಗಷ್ಟೇ ಅದು 143 ಏರ್‌ಬಸ್‌ ನಿಯೋ ಎ320 ವಿಮಾನಗಳ ಪೂರೈಕೆಗೆ ಆದೇಶ ಸಲ್ಲಿಸಿತ್ತು. ಆ ಪೈಕಿ ಐದು ವಿಮಾನಗಳು ಮಾತ್ರವೇ ಪೂರೈಕೆಯಾಗಿವೆ. 

ಸಾಗರೋತ್ತರ ವಿಮಾನ ಹಾರಾಟವನ್ನು ಆರಂಭಿಸುವ ಯೋಜನೆಯ ಭಾಗವಾಗಿ ಈ ವರ್ಷ ಏಶ್ಯದ ಪ್ರಮುಖ ತಾಣಗಳಿಗೆ ಹಾರಾಟ ಸೇವೆಯನ್ನು ಕೈಗೊಂಡು ಈ ವಲಯದೊಳಗಿನ ಇತರ ತಾಣಗಳನ್ನು ಪರಿಶೀಲಿಸಲಾಗುವುದು ಎಂದು ಸಂಸ್ಥೆ ಹೇಳಿದೆ. 

ಏರಿಂಡಿಯಾ ಬಂಡವಾಳ ಖರೀದಿಯಲ್ಲಿ ಮತ್ತು ಸಾರ್ವಜನಿಕ ಶೇರು ನೀಡಿಕೆ ವಿಷಯದಲ್ಲಿ ಕಂಪೆನಿಯ ಮುಂದೆ ಯಾವುದೇ ಯೋಜನೆಗಳಿಲ್ಲ ಎಂದು ವಾಡಿಯಾ ಹೇಳಿದರು.