ವಾಷಿಂಗ್ಟನ್: ಜಗತ್ತಿನಾದ್ಯಂತ ಕೋವಿಡ್ -19 ಸೊಂಕಿತರ ಸಂಖ್ಯೆ 11 ಮಿಲಿಯನ್ ಗಡಿದಾಟಿದೆ ಎಂದು ಜಾನ್ ಹಾಫ್ ಕಿನ್ಸ್ ವರದಿ ತಿಳಿಸಿದೆ. ವೈರಾಣು ಆರ್ಭಟಕ್ಕೆ ಇಡೀ ವಿಶ್ವವೇ ನಲುಗಿ ಹೋಗಿದ್ದು, ಏಳು ತಿಂಗಳಲ್ಲಿ 5 ಲಕ್ಷಕ್ಕಿಂತ ಹೆಚ್ಚು ಜನರು ಬಲಿಯಾಗಿದ್ದಾರೆ.
ಕೋವಿಡ್ 19 ವೈರಾಣು ಮೊದಲಿಗೆ ಪತ್ತೆಯಾದ ಚೀನಾದಲ್ಲಿ ಸೋಂಕಿನ ಎರಡನೇ ಅಲೆ ಆರಂಭವಾಗಿದ್ದು ಹೊಸದಾಗಿ 3 ಪ್ರಕರಣಗಳು ಕಾಣಿಸಿಕೊಂಡಿದೆ.
ಜಗತ್ತಿನಲ್ಲಿ 1,11,90,678 ಜನರಿಗೆ ಸೋಂಕು ತಗುಲಿದ್ದು, ಸುಮಾರು 5,29,113 ಜನರು ಮೃತಪಟ್ಟಿದ್ದಾರೆ. ಅಮೆರಿಕಾವಂತೂ ವೈರಸ್ ಆರ್ಭಟಕ್ಕೆ ನಲುಗಿ ಹೋಗಿದ್ದು, ಇಲ್ಲಿ ಮಾರ್ಚ್ 11 ರಂದು ಮೊದಲ ಬಾರಿಗೆ ಸೋಂಕು ಕಾಣಿಸಿಕೊಂಡಿತ್ತು. ಇದೀಗ ಅಮೆರಿಕಾ ಕೋವಿಡ್ ನ ಮೊದಲ ಹಾಟ್ ಸ್ಪಾಟ್ ಎನಿಸಿಕೊಂಡಿದ್ದು, 27 ಲಕ್ಷ ಮಂದಿ ವೈರಸ್ ಗೆ ತುತ್ತಾಗಿ, 1,29.275 ಜನರು ಬಲಿಯಾಗಿದ್ದಾರೆ.
ಬ್ರೆಜಿಲ್ ವಿಶ್ವದ ಎರಡನೇ ಕೋವಿಡ್ ಹಾಟ್ ಸ್ಪಾಟ್ ಆಗಿದ್ದು 14 ಲಕ್ಷಕ್ಕಿಂತ ಹೆಚ್ಚು ಪ್ರಕರಣಗಳು ದಾಖಲಾಗಿವೆ. ಸುಮಾರು 61 ಸಾವಿರ ಜನರು ಈ ಮಾರಾಣಾಂತಿಕ ವೈರಸ್ ಗೆ ಪ್ರಾಣತ್ಯೆಜಿಸಿದ್ದಾರೆ.
ರಷ್ಯಾ ಮತ್ತು ಭಾರತದಲ್ಲೂ ಕೂಡ ಈ ಸೋಂಕಿನ ಪ್ರಮಾಣ ದ್ವಿಗುಣಗೊಳ್ಳುತ್ತಲೇ ಬರುತ್ತಿದೆ. ರಷ್ಯಾದಲ್ಲಿ 6.67 ಲಕ್ಷ, ಭಾರತದಲ್ಲಿ 6.47 ಲಕ್ಷ, ಸ್ಪೇನ್ ನಲ್ಲಿ 2,97 ಲಕ್ಷ, ಪೆರುವಿನಲ್ಲಿ 2.95 ಲಕ್ಷ ಸೋಂಕು ಪ್ರಕರಣಗಳು ದಾಖಲಾಗಿವೆ.
