ದೊಡ್ಡಬಳ್ಳಾಪುರ: ಕಣ್ಣಿನ ಬಗ್ಗೆ ಅರಿವು ಮೂಡಿಸಿಕೊಳ್ಳುವುದರೊಂದಿಗೆ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಂಡರೆ ಅಂಧತ್ವ ಸರಿಪಡಿಸಿಕೊಳ್ಳಬಹುದಾಗಿದೆ. ಸತ್ತ ನಂತರ ನೇತ್ರದಾನ ಮಾಡಿದರೆ ಇನ್ನೊಬ್ಬರಿಗೆ ದೃಷ್ಟಿ ನೀಡಬಹುದಾಗಿದೆ ಎಂದು ಗ್ರಾಮೀಣ ಅಭ್ಯುದಯ ಸಂಸ್ಥೆ ಕಾರ್ಯದರ್ಶಿ ಅಮಲಿನಾಯ್ಕ ತಿಳಿಸಿದರು. ನಗರದ ಗ್ರಾಮೀಣ ಅಭ್ಯುದಯ ಸಂಸ್ಥೆ, ಎಸ್ಸಿಎಲ್‌ಆರ್‌ ಕಂಪನಿ, ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಹಾಗೂ ದೇವರಾಜ್‌ ಅರಸ್‌ ಕಾಲೇಜು ಸಹಯೋಗದೊಂದಿಗೆ ವಿಶ್ವ ದೃಷ್ಟಿ ದಿನಾಚರಣೆ ಅಂಗವಾಗಿ ಬಸವ ಭವನದಿಂದ ಭಗತ್‌ಸಿಂಗ್‌ ಕ್ರೀಡಾಂಗಣ ದವರೆಗೆ ನಡೆದ ಅಂಧ ನಡಿಗೆ ಜಾಥಾದಲ್ಲಿ ಅವರು ಮಾತನಾಡಿದರು.
ಸಾವಿನ ನಂತರ ಕಣ್ಣುಗಳನ್ನು ದಾನ ಮಾಡಿ: ಗ್ರಾಮಾಂತರ ಭಾಗಗಳಲ್ಲಿ ಹಳೆ ಪದ್ಧತಿಗಳಿಗೆ ಕಟ್ಟುಬಿದ್ದು, ಕಣ್ಣುಗಳನ್ನು ಮಣ್ಣು ಮಾಡುತ್ತಿದ್ದಾರೆ. ಆ ರೀತಿ ಸತ್ತ ವ್ಯಕ್ತಿಯೊಂದಿಗೆ ಕಣ್ಣುಗಳನ್ನು ಸಮಾಧಿ ಮಾಡಿಬಿಟ್ಟರೆ ಅದು ನಿರುಪಯುಕ್ತ. ಅಂಥ ಸನ್ನಿವೇಶದಲ್ಲಿರುವ ಜನರಿಗೆ ನೇತ್ರದಾನದ ಮಹತ್ವ ತಿಳಿಸಬೇಕು. ಆ ಮೂಲಕ ನಮ್ಮ ನಡುವೆ ಬದುಕುತ್ತಿರುವ ಇಬ್ಬರು ವ್ಯಕ್ತಿಗಳಿಗೆ ದೃಷ್ಟಿ ನೀಡಬಹುದು. ಕಣ್ಣಿನ ಬಗ್ಗೆ ಜಾಗೃತಿ ಮೂಡಿಸಲು ವಿಶ್ವದ್ಯಾಂತ ವಿಶ್ವ ದೃಷ್ಟಿ ದಿನ ಆಚರಿಸಲಾಗುತ್ತಿದ್ದು, ಇದರ ಉದ್ದೇಶ ಜನರಲ್ಲಿ ಅಂಧತ್ವದ ಬಗ್ಗೆ ಮತ್ತು ಕಣ್ಣಿನ ನ್ಯೂನ್ಯತೆಯ ಬಗ್ಗೆ ಅರಿವು ಮೂಡಿಸುವುದಾಗಿದೆ. ಇದರಿಂದ ಶೇಕಡ 80 ರಷ್ಟು ಅಂಧತ್ವ ತಡೆಗಟ್ಟಬಹುದು ಅಥವಾ ಸರಿಪಡಿಸಬಹುದು. ಮನುಷ್ಯನು ಸತ್ತಮೇಲೆ ಅವರ ಕಣ್ಣುಗಳನ್ನು ದಾನಮಾಡುವ ಮುಖಾಂತರ ಇಬ್ಬರಿಗೆ ದೃಷ್ಟಿ ನೀಡಬಹುದು ಎಂದು ತಿಳಿಸಿದರು.
ಸಾಧನೆಗೆ ಯಾವುದೂ ಅಡ್ಡಿ ಬರಲ್ಲ: ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಪ್ರಾಂಶುಪಾಲ ರಾಜಣ್ಣ ಮಾತನಾಡಿ, ಪ್ರಪಂಚದಲ್ಲಿ ಅನೇಕ ಜನರು ವಿವಿಧ ಕೊರತೆಗಳಿಂದ ಜೀವನ ಸಾಗಿಸುತ್ತಿದ್ದಾರೆ. ಮನುಷ್ಯರಲ್ಲಿ ಸಾಕಷ್ಟು ನ್ಯೂನತೆಗಳಿರುತ್ತವೆ. ಆದರೆ ಅವನ್ನೆಲ್ಲಾ ಮೆಟ್ಟಿಲುಗಳನ್ನಾಗಿ ಸ್ವೀಕರಿಸಿ ಸಾಧಕರಾಗಬೇಕಾಗಿದೆ. ನಮಗೆ ಇರುವ ಕೊರತೆಗಳ ಬಗ್ಗೆ ಆಲೋಚನೆ ಮಾಡುತ್ತಾ ಜೀವನ ವ್ಯರ್ಥ ಮಾಡಿಕೊಳ್ಳದೇ ದೇವರು ನೀಡಿರುವ ವಿಚಾರಗಳನ್ನು ಗಣನೆಗೆ ತೆಗೆದುಕೊಳ್ಳಬೇಕು. ಆ ಮೂಲಕ ಸಕಾರಾತ್ಮಕ ಚಿಂತನೆಗಳಿಗೆ ಮಹತ್ವ ನೀಡಬೇಕು. ಸಾಧನೆಗೆ ಯಾವುದೂ ಅಡ್ಡಿ ಬರುವುದಿಲ್ಲ ಎನ್ನುವುದನ್ನು ಅನೇಕ ಅಂಧರು ನಿರೂಪಿಸಿದ್ದಾರೆ ಎಂದರು.
ಕಾರ್ಯಕ್ರಮದಲ್ಲಿ ಎಸ್ಸಿಎಲ್‌ಆರ್‌ ಸಂಸ್ಥೆ ವಿತರಣಾ ವ್ಯವಸ್ಥಾಪಕ ಮುರುಳೀಕೃಷ್ಣ, ದೇವರಾಜ್‌ ಅರಸ್‌ ವ್ಯವಹಾರ ನಿರ್ವಹಣಾ ಕಾಲೇಜಿನ ಪ್ರಾಂಶುಪಾಲ ರವಿಕಿರಣ್‌, ಎಸ್ಸಿಎಲ್‌ಆರ್‌ ಉತ್ಪಾದನಾ ವ್ಯವಸ್ಥಾಪಕ ಹಿರೆನ್‌ ಮಲ್ಪೆ, ಕಾನೂನು ವ್ಯವಸ್ಥಾಪಕಿ ಪ್ರಿಯಾ, ಗ್ರಾಮೀಣ ಅಭ್ಯುದಯ ಸಂಸ್ಥೆ ಕಾರ್ಯಕಾರಿ ನಿರ್ದೇಶಕ ಕೃಷ್ಣಾ ನಾಯಕ್‌, ಬಸವರಾಜು, ಸೋಮಶೇಖರ್‌, ಮೋಹನ್‌, ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನ ಎನ್‌ ಎಸ್‌ಎಸ್‌ ಅಧಿಕಾರಿ ಜಿ.ಶ್ರೀನಿವಾಸ್‌, ಡಾ.ಪ್ರಕಾಶ್‌, ಅಮರನಾರಾಯಣ ಸ್ವಾಮಿ, ಸದಾಶಿವ ರಾಮಚಂದ್ರ ಗೌಡ, ಶ್ರೀರಾಮ ಆಸ್ಪತ್ರೆ ನಿರ್ದೇಶಕ ಡಾ.ಎಚ್‌.ಜಿ.ವಿಜಯ ಕುಮಾರ್‌, ಕಾಲೇಜು ವಿದ್ಯಾರ್ಥಿಗಳು
ಭಾಗವಹಿಸಿದ್ದರು.
