ಇಫ್ತಾರ್‌ ವಿವಾದದಲ್ಲಿ ಸಚಿವ ಗಿರಿರಾಜ್‌ಸಿಂಗ್‌

ಪಾಟ್ನಾ: ಬಿಹಾರ ಸಿಎಂ ನಿತೀಶ್‌ ಕುಮಾರ್‌, ಡಿಸಿಎಂ ಸುಶೀಲ್‌ ಕುಮಾರ್‌ ಮೋದಿ, ಕೇಂದ್ರ ಸಚಿವ ರಾಮ್‌ ವಿಲಾಸ್‌ ಪಾಸ್ವಾನ್‌ ಭಾಗವಹಿಸಿದ್ದ ಇಫ್ತಾರ್‌ ಕೂಟದ ಫೋಟೋವೊಂದಕ್ಕೆ ಟೀಕೆ ವ್ಯಕ್ತಪಡಿಸಿರುವ ಕೇಂದ್ರ ಸಚಿವ, ಬಿಜೆಪಿ ನಾಯಕ ಗಿರಿರಾಜ್‌ ಸಿಂಗ್‌, ವಿವಾದದಲ್ಲಿ ಸಿಲುಕಿದ್ದಾರೆ. ಫೋಟೋವನ್ನು ಉದ್ದೇ ಶಿಸಿ ಅವರು, “”ಈ ನಾಯಕರು ಇಫ್ತಾರ್‌ ಕೂಟ ಆಯೋಜಿಸಿದಂತೆ ನವರಾತ್ರಿಯ ಉಪವಾಸದ ವೇಳೆ ಯಲ್ಲೂ ಉಪಾಹಾರ ಕೂಟವನ್ನು ಆಯೋಜಿಸಿದರೆ ಉತ್ತಮ” ಎಂಬರ್ಥದಲ್ಲಿ ಟ್ವೀಟ್‌ ಮಾಡಿದ್ದರು.

ಇದು ಕೇಂದ್ರ ಸಂಪುಟದಲ್ಲಿ ಸೂಕ್ತ ಪ್ರಾತಿನಿಧ್ಯ ನೀಡಲಿಲ್ಲವೆಂದು ಈಗಾಗಲೇ ಸಂಪುಟದಿಂದ ದೂರ ಉಳಿದಿರುವ ಜೆಡಿಯು ನಾಯಕರನ್ನು ಕೆರಳಿಸಿದೆ. ಗಿರಿರಾಜ್‌ ವಿರುದ್ಧ ಜೆಡಿಯು ನಾಯಕರ ಅಸಮಾಧಾನ ಭುಗಿಲೇಳುತ್ತಲೇ, ಇತ್ತ ಗೃಹ ಸಚಿವ ಅಮಿತ್‌ ಶಾ ಅವರು, ಗಿರಿರಾಜ್‌ ಸಿಂಗ್‌ಗೆ ಅವಹೇಳನಕಾರಿ ಹೇಳಿಕೆ ನೀಡದಂತೆ ಎಚ್ಚರಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.