ಡಿಜಿಪಿ ದತ್ತಾ ಅಧಿಕಾರ ಸ್ವೀಕಾರ

ಬೆಂಗಳೂರು: ರಾಜ್ಯದ ನೂತನ ಪೊಲೀಸ್‌ ಮಹಾನಿರ್ದೇಶಕರಾಗಿ ರೂಪಕ್‌ ಕುಮಾರ್‌ ದತ್ತಾ ಅವರು ಮಂಗಳವಾರ ಸಂಜೆ ಅಧಿಕಾರ ಸ್ವೀಕರಿಸಿದರು. ರಾಜ್ಯ ಪೊಲೀಸ್‌ ಪ್ರಧಾನ ಕಚೇರಿಯಲ್ಲಿ ನಿರ್ಗಮಿತ ಡಿಜಿಪಿ ಓಂ ಪ್ರಕಾಶ್‌ ಅವರಿಂದ ಆರ್‌.ಕೆ. ದತ್ತಾ ಅಧಿಕಾರ ವಹಿಸಿಕೊಂಡರು.

ಈ ಸಂದರ್ಭದಲ್ಲಿ ಪತ್ರಕರ್ತರೊಂದಿಗೆ ದತ್ತಾ, ಪೊಲೀಸ್‌ ಠಾಣೆಗಳಲ್ಲಿನ ತನಿಖಾ ಮಟ್ಟ ಬಲವರ್ಧನೆಗೊಳ್ಳಬೇಕು. ಪ್ರಕರಣವನ್ನು ಠಾಣಾ ವ್ಯಾಪ್ತಿಯಲ್ಲಿ ತನಿಖೆ ನಡೆಸಲು ಆಗದೆ ಸಿಐಡಿಯಂತಹ ಸಂಸ್ಥೆಗೆ ವಹಿಸಲಾಗುತ್ತಿದೆ. ಪ್ರತಿಯೊಂದು ಪ್ರಕರಣಗಳು ಠಾಣಾ ಮಟ್ಟದಲ್ಲೇ ನಡೆಯಬೇಕು. ಠಾಣಾ ಮಟ್ಟದ ತನಿಖೆಯಲ್ಲಿ ಸುಧಾರಣೆ ತರುವ ಮೂಲಕ ಪೊಲೀಸ್‌ ಠಾಣೆಗಳನ್ನು ಗಟ್ಟಿಗೊಳಿಸಲಾಗುವುದು ಎಂದು ಹೇಳಿದರು.

ಎಷ್ಟೋ ಪ್ರಕರಣಗಳಲ್ಲಿ ಜನರು ದೂರು ನೀಡಲು ಹಿಂಜರಿಯುತ್ತಾರೆ. ಬದಲಿಗೆ ಸ್ವಯಂ ಪ್ರೇರಿತ ದೂರು ದಾಖಲಿಸಿ ತನಿಖೆ ನಡೆಸಲಾಗುವುದು ಎಂದು ಭರವಸೆ ನೀಡಿದರು. ಇಲಾಖೆಯಲ್ಲಿ ಕೆಳಹಂತದ ಸಿಬಂದಿ ಯನ್ನು ಗೌರವಯುತವಾಗಿ ನಡೆಸಿಕೊಂಡು ಅವರಿಂದ ಉತ್ತಮ ಕೆಲಸ ಪಡೆಯಬೇಕಿದೆ ಎಂದು ಹಿರಿಯ ಅಧಿಕಾರಿಗಳಿಗೆ ಸೂಚನೆ ನೀಡಿದರು.