ಆಡದಿರುವುದು ಸ್ವತಃ ಗಂಭೀರ್‌ ನಿರ್ಧಾರ: ಶ್ರೇಯಸ್‌

ಹೊಸದಿಲ್ಲಿ: ಡೆಲ್ಲಿ-ಕೆಕೆಆರ್‌ ನಡುವೆ ಶುಕ್ರವಾರ ನಡೆದ ಐಪಿಎಲ್‌ ಪಂದ್ಯದಲ್ಲಿ ಮಾಜಿ ನಾಯಕ ಗೌತಮ್‌ ಗಂಭೀರ್‌ ಅಚ್ಚರಿಯೆನ್ನುವಂತೆ ಹೊರಗುಳಿದಿದ್ದರು. ಇದಕ್ಕೆ ಕಾರಣವೇನು ಎಂಬ ಪ್ರಶ್ನೆಗಳು ಉದ್ಭವಿಸಿದ್ದವು. ಈ ಬಗ್ಗೆ ಎದ್ದಿದ್ದ ಗೊಂದಲವನ್ನು ನೂತನ ನಾಯಕ ಶ್ರೇಯಸ್‌ ಅಯ್ಯರ್‌ ಬಗೆಹರಿಸಿದ್ದಾರೆ. 

ಗಂಭೀರ್‌ ತಂಡದಿಂದ ಹೊರಗುಳಿಯಲು ನಾನು ಕಾರಣವಲ್ಲ, ಸ್ವತಃ ಅವರೇ ಈ ನಿರ್ಧಾರ ಮಾಡಿದ್ದರು. ತಂಡದ ಸೋಲಿನ ಹಿನ್ನೆಲೆಯಲ್ಲಿ ನಾಯಕತ್ವ ಬಿಟ್ಟ ಅವರು ಫಾರ್ಮ್ ಇಲ್ಲ ಎಂಬ ಕಾರಣಕ್ಕೆ ಪಂದ್ಯದಲ್ಲೂ ಆಡದಿರುವ ನಿರ್ಧಾರ ಮಾಡಿದರು. ಇದಕ್ಕೆ ಬಹಳ ಧೈರ್ಯ ಬೇಕು. ಈಗ ಅವರ ಮೇಲಿನ ಗೌರವ ಇನ್ನೂ ಹೆಚ್ಚಿದೆ ಎಂದು ಶ್ರೇಯಸ್‌ ಅಯ್ಯರ್‌ ಹೇಳಿಕೊಂಡಿದ್ದಾರೆ.