ಫೆಲಿಕ್ಸ್‌ ಸ್ಟಾಮ್‌ ಬಾಕ್ಸಿಂಗ್‌: ಗೌರವ್‌, ಮನೀಷ್‌ಗೆ ಚಿನ್ನ

ವಾರ್ಸ (ಪೋಲೆಂಡ್‌): ಗೌರವ್‌ ಸೋಲಂಕಿ ಮತ್ತು ಮನೀಷ್‌ ಕೌಶಿಕ್‌ ಅವರ ಚಿನ್ನದ ಪದಕದೊಂದಿಗೆ ಭಾರತ “ಫೆಲಿಕ್ಸ್‌ ಸ್ಟಾಮ್‌ ಅಂತಾರಾಷ್ಟ್ರೀಯ ಬಾಕ್ಸಿಂಗ್‌’ ಕೂಟವನ್ನು 6 ಪದಕಗಳೊಂದಿಗೆ ಮುಗಿಸಿದೆ.

ಭಾರತದ ಬಾಕ್ಸರ್‌ಗಳು ಎರಡು ಚಿನ್ನ ಸಹಿತ ಒಂದು ಬೆಳ್ಳಿ ಮತ್ತು 3 ಕಂಚಿನ ಪದಕಗಳನ್ನು ಗೆದ್ದಿದ್ದಾರೆ. 22 ವರ್ಷದ ಸೋಲಂಕಿ 52 ಕೆ.ಜಿ. ವಿಭಾಗದ ಫೈನಲ್‌ನಲ್ಲಿ ಇಂಗ್ಲೆಂಡ್‌ನ‌ ವಿಲಿಯಮ್ಸ್‌ ಕ್ಯಾಲೆ ವಿರುದ್ಧ 5-0 ಅಂಕಗಳಿಂದ ಗೆದ್ದು ಚಿನ್ನದ ಪದಕಕ್ಕೆ ಕೊರಳೊಡ್ಡಿದ್ದರು.

60 ಕೆ.ಜಿ. ಸ್ಪರ್ಧೆಯ ಫೈನಲ್‌ನಲ್ಲಿ ಮನೀಷ್‌ ಕೌಶಿಕ್‌ ಮೊರೊಕ್ಕೊದ ಮೊಹಮ್ಮದ್‌ ಹ್ಯಾಮ್‌ಔಟ್‌ ಅವರನ್ನು 4-1 ಅಂಕಗಳಿಂದ ಸೋಲಿಸಿ ಚಿನ್ನದ ಪದಕ ಜಯಿಸಿದರು. 56 ಕೆ.ಜಿ. ವಿಭಾಗದ ಬಾಟಮ್‌ವೇಟ್‌ ಸ್ಪರ್ಧೆಯ ಫೈನಲ್‌ ಪ್ರವೇಶಿಸಿದ್ದ ಮೊಹ್ಮಮ್ಮದ್‌ ಹುಸ್ಸಮುದ್ದೀನ್‌ 1-4 ಅಂಕಗಳ ಹಿನ್ನಡೆಯಿಂದ ರಶ್ಯದ ಮುಖಮ್ಮದ್‌ ಶೆಖೊವ್‌ ವಿರುದ್ಧ ಸೋತು ಬೆಳ್ಳಿ ಪದಕಕ್ಕೆ ತೃಪ್ತಿಪಟ್ಟರು.

3 ಕಂಚು: ಉಳಿದ ಮೂವರು ಬಾಕ್ಸರ್‌ಗಳು ತಮ್ಮ ವಿಭಾಗದ ಸ್ಪರ್ಧೆಯ ಸೆಮಿಫೈನಲ್‌ನಲ್ಲಿ ಸೋತು ಕಂಚು ಗೆದ್ದರು. 69 ಕೆ.ಜಿ. ವಿಭಾಗದಲ್ಲಿ ಮನ್‌ದೀಪ್‌ ಜಂಗ್ರಾ ರಶ್ಯದ ವಡೀಮ್‌ ಮುಸೇವ್‌ ವಿರುದ್ಧ 0-5 ಅಂಕಗಳಿಂದ ಪರಾಭವಗೊಂಡರು. 91 ಕೆ.ಜಿ. ವಿಭಾಗದಲ್ಲಿ ಸಂಜೀತ್‌ ನ್ಯೂಜಿಲ್ಯಾಂಡ್‌ನ‌ ಡೇವಿಡ್‌ ನೈಕಾ ಅವರ ಕೈಯಲ್ಲಿ ಸೋತರು. 64 ಕೆ.ಜಿ. ವಿಭಾಗದಲ್ಲಿ ಅಂಕಿತ್‌ ಖತಾನ್‌ ಭಾರೀ ಫೈಪೋಟಿ ನೀಡಿಯೂ 2-3 ಅಂತರದಿಂದ ಆತಿಥೇಯ ನಾಡಿನ ಡಾಮಿಯನ್‌ ಡರ್ಕಾಕ್‌ ವಿರುದ್ಧ ಮುಗ್ಗರಿಸಿ ಕಂಚಿನ ಪದಕ ಜಯಿಸಿದರು.