ಕಸ: “ಕ್ಲೀನಪ್‌ಮಾರ್ಷಲ್‌’ಜತೆಗೂಡಿದ “ಹೀ ಮ್ಯಾನ್‌’!

ಬೆಂಗಳೂರು: ಬಿಬಿಎಂಪಿ ವ್ಯಾಪ್ತಿಯಲ್ಲಿ ತ್ಯಾಜ್ಯ ಸಮಸ್ಯೆ ನಿವಾರಣೆಗೆ ನಿವೃತ್ತ ಯೋಧರನ್ನು “ಕ್ಲೀನಪ್‌ ಮಾರ್ಷಲ್‌’ಗಳನ್ನಾಗಿ ಬಳಸಿಕೊಳ್ಳಲು ಕ್ರಮ ಕೈಗೊಂಡಿರುವ ಬಿಬಿಎಂಪಿ, ಮಾರ್ಷಲ್‌ಗ‌ಳ ನೆರವಿಗೆ “ಹೀ ಮ್ಯಾನ್‌’ ಕರೆ ತರಲು ನಿರ್ಧರಿಸಿದೆ.

ಬಿಬಿಎಂಪಿ ಕಸ ಸಮಸ್ಯೆ ನಿವಾರಣೆಗೆ “ಹೀ ಮ್ಯಾನ್‌’ ಬಳಕೆ ಮಾಡಲು ನಿರ್ಧರಿಸಿದ್ದು ನಿಜವಾದರೂ ಅದು ಹಾಲಿವುಡ್‌ ಸಿನಿಮಾ ಪಾತ್ರಧಾರಿ ಹೀ ಮ್ಯಾನ್‌ ಅಲ್ಲ. ಬದಲಿಗೆ ಭಾರೀ ಪ್ರಮಾಣದ ತ್ಯಾಜ್ಯ ರಾಶಿಯಾಗಿರುವಂತಹ ಸ್ಥಳಗಳಲ್ಲಿ ಜೆಸಿಬಿ ಮಾದರಿಯ ಹೀ ಮ್ಯಾನ್‌ ಎಂಬ ಯಂತ್ರ, ಕಸವನ್ನು ಒಂದೆಡೆಗೆ ಶೇಖರಿಸಿ ಆಟೋ ಟಿಪ್ಪರ್‌ಗಳಿಗೆ ತುಂಬುತ್ತದೆ.

ಬಿಬಿಎಂಪಿ ವ್ಯಾಪ್ತಿಯಲ್ಲಿ ಕಸ ವಿಂಗಡಣೆ ಮಾಡದವರಿಗೆ ಹಾಗೂ ಎಲ್ಲೆಂದರಲ್ಲಿ ಕಸ ಎಸೆಯುವವರಿಗೆ ದಂಡ ವಿಧಿಸಲು ನಿವೃತ್ತ ಯೋಧರನ್ನು “ಕ್ಲೀನಪ್‌ ಮಾರ್ಷಲ್‌’ ಹುದ್ದೆಗೆ ನೇಮಿಸಿಕೊಳ್ಳುತ್ತಿರುವ ಬಿಬಿಎಂಪಿಯು, ತ್ಯಾಜ್ಯ ಸಮಸ್ಯೆ ನಿವಾರಣೆಗೆ ಮತ್ತೂಂದು ಪ್ರಯತ್ನವಾಗಿ ಹೀ ಮ್ಯಾನ್‌ ವಾಹನಗಳ ಬಳಕೆಗೆ ಮುಂದಾಗಿರುವುದು ಖಚಿತವಾಗಿದೆ.

594 ನಿವೃತ್ತ ಯೋಧರಿಂದ ಕಸ ನಿರ್ವಹಣೆ ಕಾರ್ಯ: ಕಸ ವಿಂಗಡಣೆ ನಿಯಮ ಉಲ್ಲಂ ಸಿದವರಿಗೆ ಕೆಎಂಸಿ- 1976ರ ಸೆಕ್ಷನ್‌ 431(ಆ) ಪ್ರಕಾರ ಕನಿಷ್ಠ 100 ರೂ.ಗಳಿಂದ ಗರಿಷ್ಠ 5000 ರೂ.ವರೆಗೆ ಭಾರಿ ದಂಡ ವಿಧಿಸಲು ಅವಕಾಶವಿದೆ. ಆದರೆ, ನಿಯಮ ಉಲ್ಲಂ ಸಿದವರಿಗೆ ದಂಡ ವಿಧಿಸಲು ಬಿಬಿಎಂಪಿ ಅಧಿಕಾರಿಗಳಿಗೆ ಅಗತ್ಯ ಅಧಿಕಾರವಿಲ್ಲ. ಹೀಗಾಗಿ ದಂಡ ವಿಧಿಸುವ ಸಲುವಾಗಿಯೇ ಕ್ಲೀನಪ್‌ ಮಾರ್ಷಲ್‌ಗ‌ಳ ನೇಮಕ ಪ್ರಕ್ರಿಯೆಗೆ ಬಿಬಿಎಂಪಿ ಚಾಲನೆ ನೀಡಿದ್ದು, ಬಿಬಿಎಂಪಿ 2017ರ ಫೆಬ್ರವರಿಗೆ ಆಯ್ಕೆ ಅಂತಿಮಗೊಳ್ಳುವ ಸಾಧ್ಯತೆ ಇದೆ. 

ಒಂದು ತಿಂಗಳ ತರಬೇತಿ ನೀಡಿದ ಬಳಿಕ ಮಾರ್ಷಲ್‌ಗ‌ಳು ತಪ್ಪು ಮಾಡಿದವರಿಗೆ ದಂಡ ವಿಧಿಸಲಿದ್ದಾರೆ. ಅವರಿಗೆ ಇದಕ್ಕಾಗಿಯೇ ಸಂಚಾರಿ ಪೊಲೀಸರ ಬಳಿಯಿರುವ ಬ್ಲ್ಯಾಕ್‌ ಬೆರ್ರಿ ರೀತಿಯ ಯಂತ್ರವನ್ನು ನೀಡಲಾಗುತ್ತದೆ. ಮೊದಲ ಬಾರಿಯ ನಿಯಮ ಉಲ್ಲಂಘನೆಗೆ ಎಚ್ಚರಿಕೆ ನೀಡುವ ಮಾರ್ಷಲ್‌ಗ‌ಳು, ತಪ್ಪು ಪುನರಾವರ್ತನೆಯಾದರೆ ದಂಡ ವಿಧಿಸಲಿದ್ದಾರೆ.

ಮಾರ್ಷಲ್‌ ಜತೆಗೂಡಿದ “ಹೀಮ್ಯಾನ್‌’: ಕ್ಲೀನಪ್‌ ಮಾರ್ಷಲ್‌ಗ‌ಳ ಜತೆಗೆ ಹೀಮ್ಯಾನ್‌ ವಾಹನಗಳು ಹೊಸದಾಗಿ ಸೇರ್ಪಡೆಯಾಗಲಿವೆ. ಕಸ ಹೆಚ್ಚಾಗಿ ಶೇಖರಣೆಯಾಗುವ ಕಡೆಗಳಲ್ಲಿ ಸೂಕ್ತವಾಗಿ ಕಸ ವಿಲೇವಾರಿ ಮಾಡಲು ಹೀ ಮ್ಯಾನ್‌ ಯಂತ್ರವನ್ನು ಬಳಸಲಾಗುತ್ತದೆ. ಈಗಾಗಲೇ ಸಂಕ್ರಾತಿ ಹಬ್ಬದ ಸಂದರ್ಭದಲ್ಲಿ ಕೆ.ಆರ್‌.ಮಾರುಕಟ್ಟೆಯಲ್ಲಿ ಶೇಖರಣೆಯಾಗಿದ್ದ ನೂರಾರು ಟನ್‌ ಕಸವನ್ನು ಹೀ ಮ್ಯಾನ್‌ ಯಂತ್ರದ ಮೂಲಕ ಒಂದೇ ದಿನದಲ್ಲಿ ವಿಲೇವಾರಿ ಮಾಡಲಾಗಿದೆ. ಹೀಗಾಗಿ ಮುಂದೆ ಗುತ್ತಿಗೆ ಆಧಾರದ ಮೇಲೆ ವಾಹನ ಪಡೆದು ಕೆಲಸ ಮಾಡಲಾಗುವುದು ಎಂದು ಬಿಬಿಎಂಪಿ ಅಧಿಕಾರಿಗಳು ಹೇಳಿದ್ದಾರೆ.

ತ್ಯಾಜ್ಯ ನಿಯಮ ಉಲ್ಲಂ ಸಿದವರಿಗೆ ದಂಡ ವಿಧಿಸಲು “ಕ್ಲೀನಪ್‌ ಮಾರ್ಷಲ್‌’ಗಳನ್ನು ಶೀಘ್ರದಲ್ಲೇ ನೇಮಕ ಮಾಡಲಾಗುತ್ತಿದೆ. ಜತೆಗೆ ಹೆಚ್ಚಾಗಿ ಶೇಖರಣೆಯಾಗುವ ಕಡೆಗಳಲ್ಲಿ ತ್ಯಾಜ್ಯವನ್ನು ಸಂಗ್ರಹಿಸಿ, ವಿಲೇವಾರಿ ಮಾಡಲು ಹೀ ಮ್ಯಾನ್‌ ವಾಹನ ಬಳಸಲಾಗುವುದು. ಸಂಕ್ರಾಂತಿ ಸಂದರ್ಭದಲ್ಲಿ ಮೊದಲ ಬಾರಿಗೆ ಬಳಸಿದ್ದ ವಾಹನ ಉತ್ತಮವಾಗಿ ಕೆಲಸ ಮಾಡಿದೆ. ಹೀಗಾಗಿ ಗುತ್ತಿಗೆ ಆಧಾರದ ಮೇಲೆ ಮತ್ತಷ್ಟು ವಾಹನ ಪಡೆಯಲಾಗುವುದು.
-ಜಿ.ಪದ್ಮಾವತಿ, ಮೇಯರ್‌