ಮತ್ತೆ ಕೈತಪ್ಪಿತು ಕಾಡಾ ಅಧ್ಯಕ್ಷ ಸ್ಥಾನ 

„ಕೆ. ನಿಂಗಜ್ಜ
ಗಂಗಾವತಿ: ತುಂಗಭದ್ರಾ ಯೋಜನೆಯ ಕಾಡಾ ಅಧ್ಯಕ್ಷ ಸ್ಥಾನ ಮತ್ತೂಮ್ಮೆ ಕೊಪ್ಪಳ ಜಿಲ್ಲೆಯಿಂದ ಕೈತಪ್ಪಿದ್ದು, ಅಧಿಕಾರ ವಂಚಿತರ ಪಾಲಾಗಿದೆ.

ತುಂಗಭದ್ರಾ ಡ್ಯಾಂ ಹೂಳು ಸೇರಿ ಹಲವಾರು ಸಮಸ್ಯೆಗಳಿರುವ ಸಂದರ್ಭದಲ್ಲಿ ಅಚ್ಚುಕಟ್ಟು ಪ್ರದೇಶದಲ್ಲಿರುವ ನೀರಾವರಿ ತಜ್ಞ ಅಥವಾ ರೈತ ಹೋರಾಟಗಾರರಿಗೆ ಕಾಡಾ ಅಧ್ಯಕ್ಷ ಸ್ಥಾನವನ್ನು ವಹಿಸುವ ಮೂಲಕ ಡ್ಯಾಂ ಸಮಸ್ಯೆಗಳನ್ನು ಸಮರ್ಥವಾಗಿ ನಿಭಾಯಿಸಬಹುದಾಗಿತ್ತು. ಕೊಪ್ಪಳ, ರಾಯಚೂರು, ಬಳ್ಳಾರಿ ಜಿಲ್ಲೆಯಲ್ಲಿ ಸಮರ್ಥ ರೈತ ಹೋರಾಟಗಾರರು ಮತ್ತು ನೀರಾವರಿ ತಜ್ಞರಿದ್ದರೂ ಸರಕಾರ ಮಾತ್ರ ಕಾಡಾ ಅಧ್ಯಕ್ಷ ಸ್ಥಾನವನ್ನು ಉಪಚುನಾವಣೆಯನ್ನು ದೃಷ್ಟಿಯಲ್ಲಿಟ್ಟುಕೊಂಡು ನೀಡಲಾಗಿದೆ.

ಸುಮಾರು 34 ಟಿಎಂಸಿ ಅಡಿಯಷ್ಟು ಹೂಳು ತುಂಬಿರುವ ಡ್ಯಾಂನಲ್ಲಿ ಸದ್ಯ 100.855 ಟಿಎಂಸಿ ಅಡಿ ನೀರು ಸಂಗ್ರಹವಾಗಿದೆ. ಒಳ ಹರಿವು ಸಹ ಚೆನ್ನಾಗಿದ್ದು, ಬೇಸಿಗೆ ಬೆಳೆಗೆ ನೀರು ಉಳಿಸಿಕೊಂಡು ನೀರಿನ ನಿರ್ವಹಣೆ ಮಾಡಲು ಸೂಕ್ತ ಮಾರ್ಗದರ್ಶನ ಮೇಲ್ವಿಚಾರಣೆ ಮಾಡಲು ಸಮರ್ಥ ಕಾಡಾ ಅಧ್ಯಕ್ಷರ ಅಗತ್ಯವಿದೆ.

ಕಳೆದ ಆಗಸ್ಟ್‌ನಲ್ಲಿ ಡ್ಯಾಂ ಭರ್ತಿಯಾಗಿದ್ದು, ಇದುವರೆಗೆ ಯಾವ ಕಾಲುವೆಗೆ ಎಲ್ಲಿವರೆಗೆ ನೀರು ಹರಿಸಬೇಕು. ಎಷ್ಟು ಪ್ರಮಾಣ ಹರಿಸಬೇಕು. ಕಾರ್ಖಾನೆಗಳಿಗೆ ಎಷ್ಟು ಟಿಎಂಸಿ ನೀರು ಹರಿಸಬೇಕು ಹೀಗೆ ಹತ್ತು ಹಲವು ನಿರ್ಣಯ ಮಾಡಲು ಹಿಂದಿನ ಸಮಿಶ್ರ ಸರಕಾರ, ಈಗಿರುವ ಬಿಜೆಪಿ ಸರಕಾರ ಇಚ್ಛಾಶಕ್ತಿ ತೋರುತ್ತಿಲ್ಲ. ಕಾವೇರಿ ನೀರಾವರಿ ಅಚ್ಚುಕಟ್ಟು ಪ್ರದೇಶದ ಬಗ್ಗೆ ರಾಜ್ಯ ಸರಕಾರ ವಿಶೇಷ ಕಾಳಜಿ ತೋರುತ್ತದೆ.

ಕೃಷ್ಣ, ತುಂಗಭದ್ರಾ ಅಚ್ಚುಕಟ್ಟು ಪ್ರದೇಶದ ನೀರಾವರಿ ಮತ್ತು ರೈತರ ಬಗ್ಗೆ ಸರಕಾರಗಳು ಇದುವರೆಗೂ ನಿರ್ಲಕ್ಷ್ಯ ತೋರುತ್ತಿವೆ. 2008-09ರಲ್ಲಿ ರೈತ ಮುಖಂಡ ಎಚ್‌. ಗಿರೇಗೌಡ ಕಾಡಾ ಅಧ್ಯಕ್ಷ ಸ್ಥಾನ ನಿರ್ವಹಿಸದ ನಂತರ ಕೊಪ್ಪಳ ಮತ್ತು ಬಳ್ಳಾರಿ ಜಿಲ್ಲೆಗೆ ಕಾಡಾ ಅಧ್ಯಕ್ಷ ಸ್ಥಾನ ಲಭ್ಯವಾಗಿಲ್ಲ.

ಕಾಂಗ್ರೆಸ್‌, ಸಮಿಶ್ರ ಹಾಗೂ ಸದ್ಯ ಬಿಜೆಪಿ ಸರಕಾರ ಅವಧಿಯಲ್ಲಿ ರಾಯಚೂರು ಜಿಲ್ಲೆಯವರಿಗೆ ಆದ್ಯತೆ ನೀಡಲಾಗಿದೆ. ರಾಜ್ಯ ಸರಕಾರ ತುಂಗಭದ್ರಾ ಕಾಡಾವನ್ನು ಅನುಷ್ಠಾನ ಮಾಡಿದ ನಂತರ ಕೊಪ್ಪಳ ಜಿಲ್ಲೆಯ ಶ್ರೀರಂಗದೇವರಾಯಲು, ಎಚ್‌.ಆರ್‌. ಶ್ರೀನಾಥ, ಎಚ್‌. ಗಿರೇಗೌಡ ಮಾತ್ರ ಅಧ್ಯಕ್ಷರಾಗಿದ್ದು, ಹೆಚ್ಚಿನ ಅವಕಾಶ ರಾಯಚೂರು ಮತ್ತು ಬಳ್ಳಾರಿ ಜಿಲ್ಲೆಯವರಿಗೆ ಕಾಂಗ್ರೆಸ್‌ ಮತ್ತು ಬಿಜೆಪಿ ಪಕ್ಷದ ಸರಕಾರ ಆದ್ಯತೆ ನೀಡುತ್ತಿವೆ. ಈ ಮೂಲಕ ಕೊಪ್ಪಳ ಜಿಲ್ಲೆಯ ರೈತ ಮುಖಂಡರನ್ನು ಮತ್ತು ನೀರಾವರಿ ತಜ್ಞರನ್ನು ನಿರ್ಲಕ್ಷ್ಯ ಮಾಡಲಾಗುತ್ತಿದೆ.

ಕಾಡಾ ಅಧ್ಯಕ್ಷ ಸ್ಥಾನಕ್ಕಾಗಿ ಕೊಪ್ಪಳ ಜಿಲ್ಲೆಯಿಂದ ರೈತ ಮುಖಂಡ ತಿಪ್ಪೇರುದ್ರಸ್ವಾಮಿ, ಎಚ್‌. ಗಿರೇಗೌಡ, ಶಾಸಕರಾದ ದಡೇಸುಗೂರು ಬಸವರಾಜ, ಪರಣ್ಣ ಮುನವಳ್ಳಿ, ಬಿಲ್ಗಾರ ನಾಗರಾಜ ಸೇರಿ ಹಲವು ಮುಖಂಡರು ಪೈಪೋಟಿ ನಡೆಸಿದ್ದರು. ಆದರೆ ಮಸ್ಕಿ ಕ್ಷೇತ್ರದ ಬಸವನಗೌಡ ತುರ್ವಿಹಾಳ ಅವರಿಗೆ ಕಾಡಾ ಅಧ್ಯಕ್ಷ ಸ್ಥಾನ ಲಭಿಸಿದೆ.

ಮುಂಬರುವ ಉಪಚುನಾವಣೆಯಲ್ಲಿ ಮಸ್ಕಿ ಕ್ಷೇತ್ರದಿಂದ ಬಿಜೆಪಿ ಟಿಕೆಟ್‌ ಆಕಾಂಕ್ಷಿಯಾಗಿರುವ ಬಸನಗೌಡ ಅವರನ್ನು ಸಮಾಧಾನ ಪಡಿಸಲು ಕಾಡಾ ಅಧ್ಯಕ್ಷ ಸ್ಥಾನ ನೀಡಲಾಗಿದೆ. ಕಳೆದ ಚುನಾವಣೆಯಲ್ಲಿ ಬಿಜೆಪಿಯಿಂದ ಸ್ಪರ್ಧಿಸಿದ್ದ ಬಸನಗೌಡ ತುರ್ವಿಹಾಳ ಅಲ್ಪ ಮತಗಳಿಂದ ಪ್ರತಾಪಗೌಡ ಪಾಟೀಲ ವಿರುದ್ಧ ಸೋಲುಂಡಿದ್ದರು. ಅಚ್ಚುಕಟ್ಟು ಪ್ರದೇಶದ ಸಮಸ್ಯೆ ಪರಿಹಾರಕ್ಕೆ ಆದ್ಯತೆ ನೀಡದೇ ಟಿಕೆಟ್‌ ವಂಚಿತರನ್ನು ತೃಪ್ತಿಪಡಿಸಲು ಕಾಡಾ ಅಧ್ಯಕ್ಷ ಸ್ಥಾನ ಬಳಕೆಯಾಗಿರುವುದಕ್ಕೆ ಖಂಡನೆ ವ್ಯಕ್ತವಾಗುತ್ತಿದೆ.