ರಶ್ಮಿಕಾ ಮಂದಣ್ಣ ನಿಜಕ್ಕೂ ತುಂಬಾ ಲಕ್ಕಿ. ಆಕೆ ನಟಿಸಿದ ಮೊದಲ ಚಿತ್ರದ ಟ್ರೇಲರ್ ಬಿಡುಗಡೆಯಾದಾಗ ಸ್ಟಾರ್‌ ಸಿನಿಮಾವೊಂದು ಸಿಕ್ಕಿತ್ತು. ಈಗ ಸಿನಿಮಾ ಬಿಡುಗಡೆಯಾದಾಗ ಮತ್ತೂಂದು ಸ್ಟಾರ್‌ ಸಿನಿಮಾ ಸಿಕ್ಕಿದೆ. ಇಂತಹ ಅವಕಾಶ ಯಾರಿಗೆ ಸಿಗುತ್ತೆ ಹೇಳಿ. ರಶ್ಮಿಕಾ ಮಾತ್ರ ತಮಗೆ ಇಷ್ಟವಾದ ಸಿನಿಮಾಗಳನ್ನು ಒಪ್ಪಿಕೊಳ್ಳುತ್ತಿದ್ದಾರೆ. ಯಾವ ರಶ್ಮಿಕಾ ಎಂದರೆ “ಕಿರಿಕ್‌ ಪಾರ್ಟಿ’ ಸಿನಿಮಾ ತೋರಿಸಬೇಕು.
ರಕ್ಷಿತ್‌ ಶೆಟ್ಟಿ ನಾಯಕರಾಗಿರುವ “ಕಿರಿಕ್‌ ಪಾರ್ಟಿ’ ಚಿತ್ರದ ಇಬ್ಬರು ನಾಯಕಿಯರಲ್ಲಿ ರಶ್ಮಿಕಾ ಕೂಡಾ ಒಬ್ಬರು. ಸಾನ್ವಿ ಪಾತ್ರದ ಮೂಲಕ ಎಲ್ಲರ ಮೆಚ್ಚುಗೆಗೆ ಪಾತ್ರರಾಗಿರುವ ರಶ್ಮಿಕಾ ಈಗ ಗಣೇಶ್‌ ನಾಯಕರಾಗಿರುವ ಸಿನಿಮಾವೊಂದರಲ್ಲಿ ನಟಿಸುತ್ತಿದ್ದಾರೆ. ಅದು “ಚಮಕ್‌’ ಚಿತ್ರದಲ್ಲಿ. ಸುನಿ ನಿರ್ದೇಶನದ “ಚಮಕ್‌’ ಚಿತ್ರದಲ್ಲಿ ಗಣೇಶ್‌ ನಾಯಕರಾಗಿ ನಟಿಸುತ್ತಿರೋದು ನಿಮಗೆ ಗೊತ್ತೇ ಇದೆ.
ಈ ಚಿತ್ರಕ್ಕೆ ನಾಯಕಿಯ ಆಯ್ಕೆಯಾಗಿರಲಿಲ್ಲ. ನಾಯಕಿಯ ಹುಡುಕಾಟದಲ್ಲಿದ್ದ ಸುನಿ ಕಣ್ಣಿಗೆ ಬಿದ್ದಿದ್ದು ರಶ್ಮಿಕಾ. “ಕಿರಿಕ್‌ ಪಾರ್ಟಿ’ ಸಿನಿಮಾ ನೋಡಿದ ಸುನಿಗೆ ರಶ್ಮಿಕಾ ಪರ್‌ಫಾರ್ಮೆನ್ಸ್‌ ಇಷ್ಟವಾಗಿದೆ. ತಮ್ಮ “ಚಮಕ್‌’ ಕಥೆಗೆ ಹೊಂದಿಕೆಯಾಗುವ ಹುಡುಗಿ ಎಂದುಕೊಂಡು ರಶ್ಮಿಕಾ ಅವರನ್ನು ಕೇಳಿದಾಗ, ಆಕೆ ಕೂಡಾ ಖುಷಿಯಿಂದಲೇ ಒಪ್ಪಿಕೊಂಡಿದ್ದಾರೆ. ಮುಂದಿನ ತಿಂಗಳಿನಿಂದ ಚಿತ್ರೀಕರಣ ಆರಂಭವಾಗಲಿದೆ.
ಸುನಿ ಸಿನಿಮಾದಲ್ಲಿ ನಾಯಕಿಯರಿಗೂ ಹೆಚ್ಚಿನ ಪ್ರಾಮುಖ್ಯತೆ ಇರುತ್ತದೆ. ಅದರಂತೆ ಈ ಸಿನಿಮಾದಲ್ಲಿ ರಶ್ಮಿಕಾಗೂ ಒಳ್ಳೆಯ ಪಾತ್ರ ಸಿಕ್ಕಿದೆಯಂತೆ. ಈಗಾಗಲೇ ರಶ್ಮಿಕಾ ದರ್ಶನ್‌ ನಾಯಕರಾಗಿರುವ “ಮಿಲನ’ ಪ್ರಕಾಶ್‌ ನಿರ್ದೇಶನದ ಸಿನಿಮಾಕ್ಕೆ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. “ಕಿರಿಕ್‌ ಪಾರ್ಟಿ’ ಚಿತ್ರದ ಟ್ರೇಲರ್ ಬಿಡುಗಡೆಯಾಗುತ್ತಿದ್ದಂತೆ ರಶ್ಮಿಕಾಗೆ ದರ್ಶನ್‌ ಸಿನಿಮಾ ಸಿಕ್ಕಿತ್ತು. ಈಗ ಪೂರ್ತಿ ಸಿನಿಮಾ ಬಿಡುಗಡೆಯಾಗುತ್ತಿದ್ದಂತೆ ಗಣೇಶ್‌ ಸಿನಿಮಾ ಸಿಕ್ಕಿದೆ.
ಮೂಲತಃ ವಿರಾಜಪೇಟೆಯ ರಶ್ಮಿಕಾ ಮಾಡೆಲಿಂಗ್‌ನಿಂದ ಬಂದವರು. ರಶ್ಮಿಕಾ ಫೋಟೋ ನೋಡಿದ ತಂಡ “ಕಿರಿಕ್‌ ಪಾರ್ಟಿ’ಗೆ ಆಯ್ಕೆ ಮಾಡಿಕೊಂಡಿತ್ತು. ಈಗ ಆ ಅವಕಾಶ ರಶ್ಮಿಕಾ ಅದೃಷ್ಟದ ಬಾಗಿಲು ತೆರೆಯುವಂತೆ ಮಾಡಿದೆ. ಸದ್ಯ ಸುನಿ ನಿರ್ದೇಶನದ “ಆಪರೇಷನ್‌ ಅಲಮೇಲಮ್ಮ’ ಬಿಡುಗಡೆಗೆ ಸಿದ್ಧವಾಗಿದೆ. ಅದು ಬಿಡುಗಡೆಯಾಗುತ್ತಿದ್ದಂತೆ “ಚಮಕ್‌’ ಆರಂಭವಾಗಿದೆ.
